Hiziqeeli 32 - Kafa Linguistics Project

Faroonich Shoosheeti Shoosho

¹ Kecaa no hammeti aaraa guttinnee natooba, aaraa guttinnee agenee ikkinnee qemooba Doono Yeeri taach ishichiye:

² “Ashi bushoocho, Gibitsee taatoo Faroonich shooshebe; biichoo ishichibe: ‘Aageteenaꞌo daggooch neen daaheroo tuniiꞌa ciinnehine; tunebaani baharooch beeti, shattiibeeti cooxoommo neene; aaconoo ne baatoona kobecaꞌa qudiito neene.

³ Nuggishoo Doono Yeeri ishichiye: Meeti asheenaꞌo beetoochaa dabboon ne toommooch duppemmo taane; boonoshiyoo aroona neen geechi kichemminaꞌone.

⁴ Showooch neen duppemmo taane; gaddooch neen yangemmo taane; shimaajji kafeenaꞌo bulli ne toommooch boonoshi kotemmoyich tuniyemmo taane. Showee toommo bulliich beeti kubbi cooxinaꞌo neen dakoona maayemminaꞌone.

⁵ Ne meenon guudinaꞌooch yangemmo taane; ne meeshoonoo bambeenaꞌooch ceechemmo taane.

⁶ Showoon guudinaꞌooch beddaahaa ne damoona wooriyemmo taane; aachi woretoo ne meeshoona ceennemmone.

⁷ Neen ta aalliihooba shimaayoon qeremmo taane; xojjeneenaꞌonoo manderiyemmo taane; aabeenoo quboona kaappemmo taane; ageneyoo aaxxe bekkiyaachemmine.

⁸ Shimaajji bekkeenaꞌo bullin ne toommooch manderiyemmo taane; ne showoo manderemmoyich tuniyemmo taane, iye Nuggishoo Doono Yeeri.

⁹ “ ‘Aageteenaꞌo daggoochaa, ne ariyaani showeenaꞌoochaanoo neen ta tiishiyooba, meeti showee asheenaꞌochi mulloon keqqichemmo taane.

¹⁰ Meeti asheenaꞌo ne toommooch tuneton beegiree keqqemmoyich tuniyemmo taane; boonoshi aafoochaa ta goraadoon ta tiikkiihooba, boonoshi taateenaꞌo ne naboona shati qewemminaꞌone; ne dihiyooba bi ikkikkoona bi kashoyich shati qewemmone.

¹¹ “ ‘Ebich Nuggishoo Doono Yeeri ishichiye: Baabloonee taatoochi goraado ne toommooch woyemmone.

¹² Ginee anaaminaꞌo goraadoona dofee ne asheenaꞌo dihemmoyich tuniyemmo taane; bulliyona aageteenaꞌo daggeexi maacmanjeenaꞌone. Gibitsee asheenaꞌochi geecoon giishiyemminaꞌone; dofee bi asho bulliyoo aallemmone.

¹³ Wodde aachi gashooch beeti bi gijjeenaꞌon aalliyemmo taane; ebiyee bekk ashi baatoo ciroona aacon qudiyaachemmone; gijjee baatoo qudiyaachemmone.

¹⁴ Aroochee boonoshi aacinaꞌon gariyemmo taane; boonoshi woce aacinaꞌo zayitoochoommon boonoshi ufemmoyich tuniyemmo taane; ebin getteto Nuggishoo Doono Yeeri taane.

¹⁵ Gibitsee showoon shokko ta echiihooba, showoo bi daggooch ceenniton bi muccehooba, arooch beeto bullin ta aalliihooba, ebina Doono Yeeri ta tunoon ariyemminaꞌone’ gete.

¹⁶ “Boonoshi shooshemmi shoosho ebine; aagetee maache bushiisheenaꞌo shooshemminaꞌone; Gibitsinaa dofee bi asheenaꞌonoyich shooshemminaꞌone, iye Nuggishoo Doono Yeeri” iye.

¹⁷ Kecaa no hammeti aaraa guttinnee natooba, batti batti agenee aaraa uuchinnee qemooba Doono Yeeri taach ishichiye:

¹⁸ “Ashi bushoocho, ebi dofee Gibitsee asheenaꞌoyich eefe; boonoshin giidechi aagetee asheenaꞌona tookki maash deeni daachiibe.

¹⁹ Boonoshichoo: ‘Malletoona koniyee beshiyote? Desh kindiree dokireyaaneenaꞌona tookki tokketebote’ gete.

²⁰ “Gibitsee asheenaꞌo goraadoona qititinaꞌochi daggooch dihemminaꞌone; goraado qannitone; dofee asheenaꞌo geechaa hammemminaꞌone.

²¹ Giidechi ukkireenaꞌo maashoochaa Gibitsinaa bi naayinaꞌochonon ishichi boonoshi naayinaꞌona tookki yibbaatemminaꞌone: ‘Desh qappooch waatinaꞌone; dokireyaaneenaꞌona tookkii, wottoo goraadoona qititinaꞌona tookkii tokketetinaꞌone’ gettemminaꞌone.

²² “Asooree showee bi ginee naayinaꞌona tookkii are maashooch beetine; guureetinaꞌo bulli, goraadoona qititinaꞌoo maashooch bi guudoona beetinaꞌone.

²³ Boonoshi maasho beeto oppee duchoochiye; bi ginee naayinaꞌo beeto bi maashee guudoochiye; kashechinaꞌochi showoon keqqichitinaꞌo bulli, guureetinaꞌone; goraadoona dihitinaꞌone.

²⁴ “Elaamee showee arooch beetine; dofee bi asheenaꞌoo bi maashee guudoona beetinaꞌone; showoo bullin keqqichitinaꞌo goraadoona dihitinaꞌone; dokireyaanoonoo desh qappooch kinditinaꞌone; boonoshi yeelloon shaaggiꞌi maash kindii beetinaꞌona tookkii kinditinaꞌone.

²⁵ Boonoshi maasho bi guudoona beeti, guureeti dofee bi asheenaꞌo daggooch bi beeroon heccitinaꞌone; eboshi bulli dokireyaaneenaꞌonaa goraadoona qititinaꞌonane; kashechinaꞌochi showoochaa keqqichiibee echetinaꞌone; boonoshi yeelloon shaaggiꞌi maash kindii beetinaꞌona tookki kinditinaꞌone.

²⁶ “Mesheekee showoonaa Tubaalee showoona arooch beetone; dofee boonoshi asheenaꞌochi maasho boonoshi guudoona beetone; bulliyona dokireyaaneenaꞌo, goraadoonoo qititinaꞌone; ebiyoo kashechinaꞌochi showoochaa keqqichiibee boonoshi echetoyichiye.

²⁷ Kashechinaꞌochi showoochaa keqqichiibee boonoshi echetoyich, goraadoon boonoshi qoyooch, gaachoonoo boonoshi toommooch gedaa boonoshi ginee qiicoona tookkii duukketi, wonna dihiti ginee anaaminaꞌochoommi eeppi doyoo boonoshich geddeyaanoone.

²⁸ “Ebich newoo tiishemmo neene; dokireyaani, goraadoonoo qititi asheenaꞌochi daggooch yangeyemmo neene.

²⁹ “Edoomee showee, bi taateenaꞌo bullinaa bi iraasheenaꞌo bullina arooch beetinaꞌone; hakkechinaꞌo boonoshi tunetaanoona, goraadoona qititinaꞌona tookkii dech qappooch qeyitinaꞌone; maash kindiibeeti dokireyaaneenaꞌona tookkii yangeetinaꞌone.

³⁰ “Dambi-waani iraasheenaꞌo bulli, Sidooneenaꞌo bulliyoo arooch beetinaꞌone; giidechinaꞌo tuneꞌi keqqichiibee boonoshi echetaanona qititinaꞌona tookkii cooneeheete; dokireyaaneenaꞌo tuneꞌi, goraadoona qititinaꞌonoo tookkii maash hammiyeete; aroochaa boonoshi yeelloon shaaggiyeete.

³¹ “Farooninaa bi ginee naayinaꞌona ebin boonoshi beegiyooba, goraadoona qititi dofee boonoshi asheenaꞌoyich goggemminaꞌone, iye Nuggishoo Doono Yeeri.

³² Farooni kashechinaꞌochi showoochaa keqqichibee bi echemmoyich ta tuniitaanona, biinnaa dofee bi asheenaꞌona dokireyaaneenaꞌo daggooch, goraadoona qititinaꞌo daggoochoo yangeyemminaꞌone” iye Nuggishoo Doono Yeeri.