Hiziqeeli 31 - Kafa Linguistics Project

Gibitsi Yigee Mixona Shaaheyoo

¹ Kecaa no hammeti aaraa ikkinnee natooba, keejjinnee agenee ikkinnee qemooba Doono Yeeri taach ishichiye:

² “Ashi bushoocho, Gibitsee taatoo Farooninaa meeti bi macceenaꞌonoyich ishichibe: ‘Oogoon neenna koni tatehe?

³ Ne, bi waamo waarwaariibeeti, hubbimiꞌi yiireebeeti, bi neexoo genjoo, bi cilloo gumooch shaggiti, Libanoosi yigee mixoommi Asoorin eke ciine.

⁴ Aacinaꞌo are mixon aariiheete; kote aacinaꞌo bi diccemmoyich tuniiheete; aacinaꞌoo bi becheeti guudoona woccii beeheete; aroochee woce aacinaꞌo kubbooch beeti mixinaꞌooch ufee beeheete.

⁵ Ebich bi neexo kubbeexi mixo bulliyee beshiye; bi qaakkeenaꞌoo woddeheete; aachi woddoochee tiyitona genjeheete.

⁶ Shimaajji kafeenaꞌo bulli boonoshi kexinaꞌon arooch haggiyeete; kubbi cooxinaꞌo bulli bi yiiroochaa bushiishoon shiyiheete; bi yiiroochoo ogooge aageteenaꞌo bulli kotee beeheete.

⁷ Bi cammon wodde aacinaꞌooch bi awuretoyich, bi oogoona, bi atoonoo malletechone.

⁸ Yeerichi bechee mixinaꞌooch beeti yigoo biinna toyeyoon hakkaanoone. Ciideenaꞌo bi ati bedaaneenaꞌone. Asiitee mixinaꞌo bi ateenaꞌona tateyaaneenaꞌone; Yeerichi bechee mixinaꞌoochee malletoona biinna tatemmo aalloone.

⁹ Bi qaakkeenaꞌochi meetona biin gaawichiyoye; Yeerichi bechee xaaꞌoo Eden beeti mixinaꞌo bulli biin qanaateheete.

¹⁰ “ ‘Ebich Nuggishoo Doono Yeeri ishichiye: Bi neexo bi genjetoyich, bi cilloonoo gumee daggooch bi gedditoyich,

¹¹ bi neexee genjoona bi mullo geecitoyich, bi shuunetoommon bi toommooch bi shuunemmoyich, aageteenaꞌo daggoochee giidechochi kishooch beshiyaꞌa biin immeto taane; biinoo yookketo taane.

¹² Ashi showee asheenaꞌo, oogichii keqqichiibeeti aageteenaꞌoo kuxxiꞌi biin duppitinaꞌone. Bi nolleenaꞌo guudinaꞌochi toommonaa bambeenaꞌonooch hollitinaꞌone; bi qaakkeenaꞌoo aachechi showoo bulliich tiisheꞌi hollitinaꞌone; showee toommeexi asheenaꞌo bulli bi yiiroochee qajjii hammitinaꞌone.

¹³ Ebi dihiti michi toommooch shimaajji kafeenaꞌo kotetinaꞌone; bi qaakkeenaꞌonoo kubbi cooxinaꞌo neexxitinaꞌone.

¹⁴ Am shaahoon aachi gocooch boonoshi diccitaanona ebi mixochoommon neexi genjoo tunoon, boonoshi cilloonoo qubee daggooch shakkiyoon hakkemmi mixinaꞌo aalleenaꞌone. Ebiyoo boonoshiyoo qititinaꞌo kiceeti oppooch, maash hammiibeeti ashi bushiisheenaꞌo daggooch, qitooch beshiitaa ichetinaꞌo boonoshi tunetoyichiye’ gete” iye.

¹⁵ “ ‘Nuggishoo Doono Yeeri ishichiye: Ebi mixo maash kindiyooba, ogooge aacinaꞌo biich eeppemmoyich, woce aacinaꞌo kuxemmoyich, wodde aacinaꞌo neexemmoyich tuniito taane; biicha iyaꞌa Libanoosich manderoon tajjiyoye; kubbi mixinaꞌo bulla shuuqqiyeete.

¹⁶ Maash hammii beetinaꞌona tookkii oppooch biin ta dufiyooba, bi dihee qaaroochee tiyitona, aageteenaꞌon qewiito taane; Eden beeti mixinaꞌo bulli, aachi gashooch dicciti mixinaꞌo bulli, phixxaashe Libanoosee mixinaꞌo bulliyoo, bi dihoona dechi showoochaa goggemminaꞌone.

¹⁷ Aageteenaꞌoochee biinna guuphitinaꞌo, bi yiirooch beebee echetinaꞌo, goraadoona qititinaꞌo waan biinna tookkii maash kinditinaꞌone.

¹⁸ “ ‘Faroono, ebi shaahiyoo bi bekkiibeeto neennaa dofee ne asheenaꞌononiye. Oogee yiiroonaa oogoona Edeni mixinaꞌoochee koni neen shaahehe? Tunebaani newoo wotta Edenee mixinaꞌona tookki deshi showooch kindemmo neene; goraadoona qititi dokireyaaneenaꞌochi daggooch qeyemmo neene’ iye Nuggishoo Doono Yeeri, gete” iye.