Hiziqeeli 30 - Kafa Linguistics Project

Gibitsich Shoosheeti Shoosho

¹ Doono Yeeri taach ishichiye:

² “Ashi bushoocho, ishichi keemoon keembe: ‘Nuggishoo Doono Yeeri ishichii beetone: “Ebi aaboyich woowo!” getibee eefe.

³ Ebi aabo katinnitone; Doono Yeerichi aabo katinnitone; ebiyoo qubee aaboone; aageteenaꞌoyichoo aallee aaboone.

⁴ Goraado Gibitsi toommooch woyemmone; xuuxo Topphiyee toommooch tunemmone. Guuraa qititinaꞌo Gibitsi daggooch dihiyooba, bi gaanno qacaa hamiyooba, bi showee heco shekiremmone.

⁵ “ ‘Topphiyee, Fuuxi, Luudi, Arabee showoo bulli, Liibiyi, wogee showee asheenaꞌooch beddaahaa Gibitsina tookki goraadoona dihemminaꞌone.

⁶ “ ‘Doono Yeeri ishichiye: Gibitseenaꞌon gaachee beetinaꞌo dihemminaꞌone; bi geeciibeeti bi giidoo niremmone; Migidoolee tiijji Aswaan beddaahaa beetinaꞌo biinna tookki goraadoona dihemminaꞌone; Nuggishoo Doono Yeeri ta ebin getteto taane.

⁷ Shokkoon echeti showeenaꞌoyee beshoon, ebi showoo shokkoon echemmone; tiishee aalleti katemeenaꞌoyee beshoon, bi katemeenaꞌoo tiishemminaꞌone.

⁸ Qaaqqoon Gibits ta gediyooba, bi gaacheenaꞌo bulliyoo tiishehooba, Doono Yeeri ta tunoon ariyemminaꞌone.

⁹ “ ‘Ebiyooba amoonolla keqqaanoon koteꞌi beeti Topphiyeenaꞌon keqqichoyich wocheyechinaꞌo markaboona ta waanee hammemminaꞌone; Gibitsi aalloona xuuxo boonoshi toommooch tunemmone; illa ebiyoche, ebi tunemmone.

¹⁰ “ ‘Nuggishoo Doono Yeeri ishichiye: Baabloonee taatoo Nabukadinatsori kishoona, dofee Gibitsee asheenaꞌon aalliyemmo taane.

¹¹ Biinnaa oogeti maacmanje bi ginee naayinaꞌona, showoon aalliyoyich woyemminaꞌone; boonoshi goraadoon Gibitsi toommooch kaaccemminaꞌone; dubenoonoo showee ikko tuniyemminaꞌone.

¹² Abbaayi aacon takkemmo taane; showoonoo gonde asheenaꞌoyich hajjiyemmo taane; ashi showee asheenaꞌochi kishoona showoonaa bi daggooch beeto bullinon aalliyemmo taane; Doono Yeeri ta, ebin getteto taane.

¹³ “ ‘Nuggishoo Doono Yeeri ishichiye: Shahalleenaꞌon aalliyemmo taane; Memifisi beeti misileenaꞌon aalliyemmo taane; ebiyee bekk Gibitsee showooch iraashoo beetaachemmone; Gibitsee showoochoo shaton deejjemmo taane.

¹⁴ Phaxiroosin tiishaa aalleti katemeen tuniyemmo taane; Tsoꞌaan qaaqqoon geddemmo taane; Tebeesi toommooch nallemmo taane.

¹⁵ Gibitsi manje katemoo tuneti Felusiyeemi toommooch ta kaaroon kindiyemmo taane; dofee Tebeesee asheenaꞌon aalliyemmo taane.

¹⁶ Gibits qaaqqoon geddemmo taane; Felusiyeemi oogichi xuuxemmine; Tebeesi uxeree duuho tiishemmone; Memifisiyoo ooge xuuxoona beeyemmine.

¹⁷ Heliyootinaa Fibisetinooch beeti gurimaasheenaꞌo, goraadoona dihemminaꞌone; maacheenaꞌoo kecceyemminaꞌone.

¹⁸ Gibitsi giidoon ta tiishiyooba, Xafinaasich areddee showoo xumemmone; bi geeciibeeti bi giidoo niremmone; qubo biin guuppemmone; bi asheenaꞌoo kecceyemminaꞌone.

¹⁹ Gibitseenaꞌochi toommooch nallemmo taane; aroochee boonoshiyoo Doono Yeeri ta tunoon ariyemminaꞌone’ itone gete” iye.

²⁰ Kecee no hammeti aaraa ikkinnee natooba, ikkinnee agenee shabaattinnee qemooba Doono Yeeri taach ishichiye:

²¹ “Ashi bushoocho, Gibitsee taatoo Faroonichi kishoon tiicheto taane; bi wodemmoyich, tahoona kaappeyaanoone; wodiree wochinnoon goraadoon bi yechemmoyich guuccii kaappiꞌi sheppheto aalloone.

²² Ebich Nuggishoo Doono Yeeri ishichiye: ‘Ta, Gibitsee taatoo Farooni toommooch tiyeto taane; iiwe bi mochoonaa tiishe bi mochoonon tiichemmo taane; goraadoon bi kishoochee holliyemmo taane.

²³ Gibitsee asheenaꞌon aageteenaꞌo daggooch shaccemmo taane; showee toommoochoo bitinnemmo taane.

²⁴ Baabloonee taatoochi mochoon kupphiyemmo taane; ta goraadoonoo bi kishooch immemmo taane; tunebaani Faroonichi mochoon tiichemmo taane; biyoo oogichii mayeti ashichoommon bi aafoochaa maaceremmone.

²⁵ Baabloonee taatoochi mochoon kupphiyemmo taane; Faroonichi mochoo dihemmone; ta goraadoon Baabloonee taatoo kishooch ta imiyooba, biyoo Gibitsee showee toommooch bi yaggiyooba, boonoshiyoo Doono Yeeri ta tunoon ariyemminaꞌone.

²⁶ Gibitsee asheenaꞌon aageteenaꞌo daggooch shaccemmo taane; showee toommoochoo bitinnemmo taane; aroochee boonoshiyoo Doono Yeeri ta tunoon ariyemminaꞌone’ ” iye.