Hiziqeeli 29 - Kafa Linguistics Project

Gibitsi Toommooch Keemmeti Keemo

¹ Kecaa no hammeti aashirinnee natooba, aashirinnee agenee aaraa guttinnee qemooba Doono Yeeri taach ishichiye:

² “Ashi bushoocho, ne aafoon Gibitsee taatoo Faroon waan wochiichi biinnaa Gibitsee asho bullinochi toommooch keemoon keembe.

³ Faroonichoo yibbaateree ishichibe: Nuggishoo Doono Yeeri ishichiye: ‘ “Abbaayi aaco taachone; taane biin shuuneto” ii beeti aachi daggooch qeyiti ooge aachi aayoommi Gibitsee taatoo Faroono, ebiyoche ta ne toommooch tiyeto taane.

⁴ Ne gammooch qamaaxiroon geddemmo taane; ne aacinaꞌooch beeti haasheenaꞌon ne achoona xaaqqemmo taane; ebi haasheenaꞌo bulli ne achooch boonoshi yeshetoommona ne aacinaꞌoochee neen geechi kichemmo taane.

⁵ Neennaa ne aaceexi haasheenaꞌo bullinon barahooch yugemmo taane; ne meeshoo gaddoochani bi echemmo duukkeyaachemmo neene; shimaajji gaceenaꞌonaa kubbi cooxinaꞌonoyich maayoon tuniiree neen immemmo taane.

⁶ Gibits beetinaꞌo bulla Doono Yeeri ta tunoon ariyemminaꞌone. Gibitsee asheenaꞌo ittoshi Israꞌeeleenaꞌoyich shombeqee gumboommon tuneto ittoshine;

⁷ kishoona ittoshin boonoshi yeshiyooba tiisheꞌi boonoshi mochooch kochiyote; ittoshi toommooch boonoshi degehooba tiisheꞌi boonoshi shimetoon qewiihote.

⁸ “ ‘Ebich Nuggishoo Doono Yeeri ishichiye: Goraadoon ittoshi toommooch deebemmo taane; ashoonaa gijjoonon ittoshi daggoochee aalliyemmo taane.

⁹ Gibitsee showoo shokkaachoonaa amolla aalloona tunemmone; ebiyooba boonoshiyoo Doono Yeeri ta tunoon ariyemminaꞌone. “ ‘Ebiyoo “Abbaayi aaco taachone; ebi aacon shuuneto taane” ne itoyichiye.

¹⁰ Ebich ta, neennaa ne aacinaꞌonochi toommooch tiyeto taane; Gibitsee showoon Migidoolee tiijji Aswaan beddaahaa, ebiyoommon wotta Topphiyee daarooch beddaahaa amolla aalli shokkaachoon echiyemmo taane.

¹¹ Asho tuneba gijjoo aroona besheyaachemmone; aabbe natooch beddaahaa koniyoona arooch beetaachemmone.

¹² Shokkoon echeti showeenaꞌoyee beshoon Gibitsee showoon shokko echiyemmo taane; happeeti katemeenaꞌoyee beshoon bi katemeenaꞌo aabbe naton happeeree echemminaꞌone. Gibitsee asheenaꞌon aageteenaꞌo daggooch shaccemmo taane; showee toommoochoo bitinnemmo taane.

¹³ “ ‘Nuggishoo Doono Yeeri ishichiye: Aabbe natoyee gubb Gibitsee asheenaꞌon boonoshi shaceti aageteenaꞌo daggoochee kicemmo taane.

¹⁴ Gibitsee kecoon wochemmo taane; boonoshi shiijjeti showooch, Phaxiroos boonoshin wochemmo taane; aroochaa giidaalli taatee showoon tunemmone.

¹⁵ Bare taatee showoyee beshoon giishemmone; ebiyee bekk aageteenaꞌo toommooch sharaachemmone; ebiyee bekk aageteenaꞌon boonoshi hajjaachemmoyich boonoshin giishiyemmo taane.

¹⁶ Ebiyee bekk Israꞌeelee asheenaꞌo Gibitseenaꞌona degeyaachemminaꞌone. Gibitsi toommooch shaggiti mooyo Israꞌeeleenaꞌo boonoshina degeyoona am shaahoon boonoshi xuqqito gaata boonoshich shalligichoo tunemmone; ebina Israꞌeeleenaꞌo Nuggishoo Doono Yeeri ta tunoon ariyemminaꞌone’ ” iye.

Nabukadinatsori Gibitsin Koyi Wochemmo Tuno

¹⁷ Kecaa no hammeti hiyaa shabaattinnee natooba, ikkinnee agenee ikkinnee qemooba Doono Yeeri taach ishichiye:

¹⁸ “Ashi bushoocho, Baabloonee taatoo Nabukadinatsori Xiroosin koyoyich bi ginee naayinaꞌon aajjiitone; boonoshi qello hucemmi, boonoshi gogoo mayemmi wottoon magge shaagoon boonoshi shaaggemmoyich tuniitone; tunebaani biyoo tunetaa bi ginee naayinaꞌo ebi boonoshi aayoyich Xiroosee amee gaacoonolla daneyaaneenaꞌone.

¹⁹ Ebich Nuggishoo Doono Yeeri ishichiye: Gibitsee showoon Baabloonee taatoo Nabukadinatsorich beshii immemmo taane; bi ginee naayinaꞌoyichoo shumaayoo bi tunemmoyich bi gaanno bullin bogi keciree daammemmone.

²⁰ Biinnaa bi ginee naayinaꞌona taach boonoshi shuunetoyich, boonoshi maddetoyichoo Gibitsee showoon biich gaaco tuniyaꞌa immeto taane; Nuggishoo Doono Yeeri ta ebin getteto taane.

²¹ “Ebi tunehooba Israꞌeelee macceenaꞌoyich qaroon colliyemmo taane; newoo boonoshich ne qaaroon oogichiree ne yibbaatemmoyich tuniyemmo taane; ebina boonoshiyoo Doono Yeeri ta tunoon ariyemminaꞌone” iye.