Hiziqeeli 28 - Kafa Linguistics Project

Xiroosi Taatoo Toommooch Keemmeti Keemo

¹ Doono Yeeri taach ishichiye:

² “Ashi bushoocho, Xiroosi taatoyich, Nuggishoo Doono Yeeri ishichiye, gete: ‘Ne mullo geecitoyich, “Ta, nuggishoo taane; baharee daggooch, nuggisheenaꞌo taatee qeenooch kotemmo taane” ito neene. Ne mulloona nuggishoo taane iyaꞌa ne gabitaanona ne, asho nealli nuggishoo toono neene.

³ Daaneeliyee beshi ariyecho neene? Neech aacheeti mooyo amolla aalloone getone?

⁴ Ne ariyoona, ne shalligoonoo gaannoon neech daneto neene; aachoonaa birewoonon ne ginjabeetooch kicito neene.

⁵ Giixoona oogeti ariyecho ne tunetoyich, woddii gaanneto neene; ne gaannee naboona ne mullo geecitone.

⁶ “ ‘Ebich Nuggishoo Doono Yeeri ishichiye: Nuggishoommi ariyecho taane iyaꞌa ne gabitoyich,

⁷ ebiyoche aagetee asheenaꞌoochee oogeti maacmanje etteenaꞌon ne toommooch deebemmo taane; boonoshiyoo ne toommooch goraadoon kaaci gaawe ne ariyoon aalliyemminaꞌone; ne oogoonoo giishiyemminaꞌone.

⁸ Neen maash daachiyemminaꞌone; baharee daggooch gonde qitoon qitemmo neene.

⁹ Neen wuxemminaꞌo aafoochaa “Ta, nuggishoo taane” gettenne? Tunebaani neen wuxemminaꞌo kishooch ne dihiyooba asho nealli nuggishoo ne tunee qayo arichemmone.

¹⁰ Ashi showee asheenaꞌochi kishoona dokireyaaneenaꞌo qitoommon qitemmo neene; ta ebin getteto taane, iye Nuggishoo Doono Yeeri’ ” iye.

¹¹ Doono Yeeri daakkiꞌi taach ishichiye:

¹² “Ashi bushoocho, Xiroosi taatoyich shooshebe: Nuggishoo Doono Yeeri ta gettaa beeton ishichi biich gete: ‘Ariyoona ceenneto, malleteechi gaawe shaahiyoo neene.

¹³ Yeerichi bechee xaaꞌoo tuneti Eden beehine; aaxxe xaqqo bulli ne tahoone; saridiyoono, topphaziyoono, almaazo, beruullo, shohaamo, yasphiido, sapiiro, maarigido, wacciibeeti inqoo, aachoo eboshin tahaa beehine; ne halleehooba, eboshi neech qanniyeete.

¹⁴ Quyechi kiruubo tunaꞌa huutteeto neene; Doono Yeeri ta yaafe guudooch neen kotiihoye; qaaqqee aaxxoommon aaxxeebeeti aaxxe xaqqeenaꞌochi daggoona shaꞌehine.

¹⁵ Ne halleetoochee tiijjiꞌi gondo ne waanee danemmooch beddaahaa ne shaaddoona xalloo neene.

¹⁶ Ne giixee woddoochee tiyitona xuꞌoona ceennehine; axaaxoonoo shuunehine. Ebich eeꞌe mooyochoommon Yeeri ta guudoochee neen yookkehoye; quyechi kiruuboocho, qaaqqee aaxxoommon aaxxeebeeti aaxxe xaqqeenaꞌochi daggoochee neen duppehoye.

¹⁷ Mallet gaawoo ne tunoona ne mullo geecitone; ne oogoyicha iyaꞌa ne ariyoon eeꞌiihine. Ebich showooch neen duppehoye; neenna boonoshi cuuqqemmoyich taateenaꞌo aafooch neen duppehoye.

¹⁸ Ne xuꞌee woddoona, axaaxe ne giixoona, ne yaafe xaaꞌoon eeꞌiito neene; ebich qaaqqoon ne daggoochee ta kichaa aroo neen maatone; and neen ciinnimmo bulli tulloo baach ne tunoon beeggemmone.

¹⁹ Aageteenaꞌo daggoochee neen arii beetinaꞌo bulli ne naboona keqqitinaꞌone; ne ciiro keqqichito tunetone; ebiyee bekk daneyaachemmo neene’ itone gete” iye.

Sidooni Toommooch Keemmeti Keemo

²⁰ Doono Yeeri taach ishichiye:

²¹ “Ashi bushoocho, Sidoon waan ne aafoon wochiichi bi toommooch keemoon keembe.

²² ‘Nuggishoo Doono Yeeri ishichiye: Sidoone, ne toommooch tiyeto taane; ne daggoochaa oogoon danemmo taane; ne toommooch ta nalliyooba, ta yaafittinoonoo ne daggooch ta bekkiihooba asheenaꞌo Doono Yeeri ta tunoon ariyemminaꞌone.

²³ Kupphe biiyoon ittoshi toommooch deejjemmo taane; gomminaꞌooch damoo ufemmoyich tuniyemmo taane; ittoshi guudo bulliichee waabeeti goraadoona ittoshi daggoochee asheenaꞌo qitemminaꞌone. Ebina boonoshi Doono Yeeri ta tunoon ariyemminaꞌone’ gete” iye.

Israꞌeeli Diireyoo

²⁴ Doono Yeeri ishichiye: “Ebiyee bekk biin hoxeti bi giyeenaꞌo bulli daggooch Israꞌeelich shooddiibeeti guccinonaa biijjiibeeti angixonon tunemmo daneyaachemmone; ebina ta, Nuggishoo Doono Yeeri ta tunoon ariyemminaꞌone” iye.

²⁵ Nuggishoo Doono Yeeri ishichiye: “Israꞌeelee macceenaꞌon boonoshi shaceti aageteenaꞌo daggoochee ta kiciyooba, aageteenaꞌo ciini beetaa boonoshi daggoochaa ta yaafittinoon ta bekkiihooba, ta guuno Yaaqobich ta immeti boonoshi hajjee showooch kotemminaꞌone.

²⁶ Keqqaalloon kotemminaꞌone; kexinaꞌon haggemminaꞌone; woyinoonoo bechemminaꞌone. Boonoshin hoxeebeeti giyeenaꞌo bulli toommooch ta nalliyooba, keqqaalloon kotemminaꞌone; ebina boonoshi Nuggishoo Doono Yeeri ta tunoon ariyemminaꞌone” iye.