Hiziqeeli 27 - Kafa Linguistics Project

Xiroosich Shoosheeti Shoosho

¹ Doono Yeeri taach ishichiye:

² “Ashi bushoocho, Xiroosich shooshebe.

³ Baharee gashooch beeti meeti asheenaꞌona tookkii giixeebeeti, baharee gimooch koteti Xiroosich, Nuggishoo Doono Yeeri ishichiye, gete: ‘Xiroose, “Oogeti malletechi taane” iti neene.

⁴ Ne daaro baharee daggoochiye; neen shuunetinaꞌo neen malletiiꞌi shuunetinaꞌone.

⁵ Ne shaaqqeenaꞌo bullin Seniiree ciidoona shuunetinaꞌone; ne giimboon shuunoyich Libanoosee yigee mixon deebiyeete.

⁶ Bashaanee meellee mixinaꞌoochee aachi yooppe ne madelloon shuuneheete; ne godo shuuneeto Qoophiroosee ciidee shaaqqoonane; bi guudo dangeyi gashoona shuuneetone.

⁷ Ne markabeechi sharo, baanderoochoommon wohoochaa bi bekkemmoyich, shashiitaa bi toommooch shippeti Gibitsee waati muttee tuppoochee shippeti qoreddoochee shuuneetone; ne maccillaateenaꞌo Elishee buure showeexi dameroonaa shimaayitoona tuneti qoreddoochee shuuneetinaꞌone.

⁸ Ne markabee gashechinaꞌo, Sidoonee asheenaꞌonaa Arwaadee asheenaꞌonane. Xiroose, ariyechi asheenaꞌo ne daggooch beetinaꞌone; eboshiyoo ne markabee iraasheenaꞌone.

⁹ Ne daggooch beeti ariyechi Gebaalee geeneenaꞌo ne tiishoon qeerii beetinaꞌone; markabechinaꞌo bulli markaboona ne waan waaꞌi, neenna tookkii giixee beeheete.

¹⁰ “ ‘Faariisee, Luudee, wottoo Fuuxee waati ginee naayinaꞌo ne ginee naayinaꞌo daggooch beetinaꞌone; boonoshi gaachoonaa xuuree ukoonon ne gafooch kaqqitinaꞌone; boonoshi neech oogoon daniitinaꞌone.

¹¹ Arwaadee asheenaꞌonaa Heleekee asheenaꞌona ne uxeree toommooch guudoona beetinaꞌone; Gamaadee asheenaꞌoo ne dilaalooch beetinaꞌone; boonoshi gaachoonoo ne xaqqee uxeree guudoona kaqqitonaꞌone; neenoo malletechi tuniitinaꞌone.

¹² “ ‘Ne gaannee woddoochee tiyitona, Tarisheshee asheenaꞌo neenna tookkii giixee beeheete; birewoonaa xuuroonon, shombeqoonaa budoonon deebii bare qiicoona shaddii beeheete.

¹³ “ ‘Yawaanee, Tubaalinaa Mesheekinoochee waatinaꞌo neenna tookkii giixee beeheete; guuninaꞌonaa gooshee qiiceenaꞌonon bare qiicoona neech shaddii beeheete.

¹⁴ “ ‘Beet Togarimi asheenaꞌo haresheenaꞌon, ginee haresheenaꞌonaa bicereenaꞌonon qiicoona neech shaddii beeheete.

¹⁵ “ ‘Dedaanee asheenaꞌo neenna tookkii giixee beeheete; baharee gasheexi showeenaꞌo ne gabiyee godeenaꞌone; boonoshiyoo ne waanee qiicoon kemoyich dangeyi gashoonaa aaꞌi kupphe mixonon deebii beeheete.

¹⁶ “ ‘Wodde qiico neech bi beetoyich, Sooriyee asheenaꞌo neenna tookkii giixee beeheete; ne qiiceenaꞌonoo maarigidoona, damere tahoona, bi toommooch shashiitaa shippeti qoreddoona, muttee tuppoochee shippeti qoreddoona, dooqoona, wottoo ceelle inqoona shaddii beeheete.

¹⁷ “ ‘Yihudinaa Israꞌeelina neenna tookkii giixee beeheete; Minitee showee teepphoon, shaawi mooyon, eeyon, zayitoonaa huutoonon qiicoona neech shaddii beeheete.

¹⁸ “ ‘Ne gaannoonaa qiicee woddoonoochee tiyitona, Damaasiqee asheenaꞌo Heliboonee woyinoonaa Zahaaree bagee huushoonon deebona neenna tookkii giixee beeheete.

¹⁹ “ ‘Wedaanee asheenaꞌonaa Yawaanee asheenaꞌona Uzaalee waaꞌi neenna tookkii giixee beeheete; ukkaa shuuneeti xuuroon, gaawe cinnechi michi goroon, qimaamoon qiicoona shaddii beeheete.

²⁰ “ ‘Dedaanee asheenaꞌo koree gilaashoon deebona neenna tookkii giixee beeheete.

²¹ “ ‘Arabeenaꞌonaa Qedaaree iraasheenaꞌo bullina bagee bushiishoon, bagee baaddoonaa emmishee baaddoonon deebona neenna tookkii giixee beeheete.

²² “ ‘Sheebi giixechinaꞌonaa Raꞌiimi giixechinaꞌona neenna tookkii giixee beetinaꞌone; gaawe qimaamo bullin, aaxxe xaqqo bullinaa aachoonon neenna tookkii giixee beeheete.

²³ “ ‘Haraani, Kanaahinaa Edeninochi katemee asheenaꞌo, Sheebee giixechinaꞌo, Ashuurinaa Kilimaadinochi katemee asheenaꞌoo neenna tookkii giixee beeheete.

²⁴ Eboshi neenna tookkii gaaweti taheenaꞌon, shimaayite taheenaꞌon, shashechi qoreddoon, showooch yaggeebeeti shagoon, gaawichaa mujjeeti woderoona gaawichii cuchiꞌi neenna tookkii giixee beeheete.

²⁵ Tarisheshee ogooge markabeenaꞌo ne qiicoon qaccii beeheete. “ ‘Newoo baharee daggoochaa giixee qiicoona ceenneti neene.

²⁶ Ne markaboon gasheebeetinaꞌo ooge baharooch neen deebiyeete; aabi-keyo waani yongo neen baharee daggooch tiichiye.

²⁷ Ne gaanno, ne qiico, ne giixo, ne markabechinaꞌo, markabee maddechinaꞌo, markaboon shuunechinaꞌo, ne giixechinaꞌo, ne daggooch beeti ne ginee naayinaꞌo bulli, ne daggooch beeti ne asheenaꞌo bulli, ne aallehooba, baharee daggooch qoochemminaꞌone.

²⁸ Markabechinaꞌochi cookoochee tiyitona baharee gashooch beeti showeenaꞌo qewemminaꞌone.

²⁹ Markabee gashechinaꞌo, markabechinaꞌo, markabooch beetinaꞌo bulli, markaboochee kindiree showooch neexemminaꞌone.

³⁰ Buttoon boonoshi qellooch shahibee, tulloochoo gederebee, neech oogichi cooki eeppemminaꞌone.

³¹ Boonoshi qelloon cakkemminaꞌone; dookoon tahemminaꞌone; oogichii ayinoona, boonoshi kashoon caammeree, neech eeppemminaꞌone.

³² Neech ayini eefibee, ishichi neech shooshemminaꞌone: “Baharee daggooch aallee echeti, Xiroosiyoommo koni beete?” gettemminaꞌone.

³³ Ne giixee qiico baharoochee bi waahooba, meeti asheenaꞌon michiiti neene; ne gaannoona wottoo ne giixee woddoona showee toommeexi taateenaꞌon gaanniiti neene.

³⁴ Tunebaani and baharee daggooch tiisheti neene; baharee daggooch qoocheti neene; ne giixee qiicoonaa ne asheenaꞌona, neenna tookkii qoochetinaꞌone.

³⁵ Baharee gashooch beeti asheenaꞌo bulli, ne naboona keqqitinaꞌone; boonoshi taateenaꞌo oogichii shattitinaꞌone; shatona boonoshi aafo niretone.

³⁶ Aageteenaꞌo daggooch beeti giixechinaꞌo ne toommooch shokketinaꞌone; ne ciiro keqqichito tunetone; ebiyee bekk daneyaachemmi neene’ gete” iye.