Hiziqeeli 26 - Kafa Linguistics Project

Xiroosi Toommooch Keemmeti Keemo

¹ Kecee no hammeti aaraa ikkinnee natooba, agenee ikkinnee qemooba Doono Yeeri taach ishichiye:

² “Ashi bushoocho, Xiroosi Yerusaalemi toommooch ishichitine: ‘Usha, macceenaꞌo giyiibeeti kellee tiishetane; bi gifeenaꞌoo wogallimiꞌi taach qecheetinaꞌone; bi tiishetoyich ta oogemmi taane’ itine.

³ “Ebich Nuggishoo Doono Yeeri ishichiye: ‘Xiroose, ne toommooch tiyeto taane; baharo aachi aayon shuurikkii bi tiijjoommon, neen koyoyich meeti aageteenaꞌon tiijjemmo taane.

⁴ Xiroosi xaqqee uxereenaꞌon happemminaꞌone; bi dilaaleenaꞌonoo tiichemminaꞌone; shokke xaqqo echemmi wottoon showoon hidiree aalliyemmo taane.

⁵ Asheenaꞌo boonoshi dabboon shuuꞌiibeeti, baharee daggooch beeti xaaꞌoon tunemmine; Nuggishoo Doono Yeeri ta ebin getteto taane. Aageteenaꞌo biin boggemminaꞌone.

⁶ Inde bi showooch beeti bi asheenaꞌo goraadoona guureyemminaꞌone; ebina Doono Yeeri ta tunoon ariyemmine’ iye.

⁷ “Ebich Nuggishoo Doono Yeeri ishichiye: ‘Dambi-waanee, taateenaꞌo taatoo, Baabloonee taatoo Nabukadinatsorin haresheenaꞌonaa gaarinaꞌona tookki, hareshechinaꞌonaa dofee ginee naayinaꞌona tookki Xiroosi toommooch deebemmo taane.

⁸ Inde showooch beeti ne asheenaꞌon goraadoona wuxemmone; neen kocha ne guudoona giichemmone; ne uxeree cillooch beddaahaa showoon gutemmone; gaachoon ne toommooch tiijjemmone.

⁹ Uxeroon happemmi qiicoona ne uxereenaꞌon happemmone; bi qiicoona ne dilaaloon happemmone.

¹⁰ Bi haresheenaꞌo meetoochee tiyitona boonoshi quttoo neen qeremmone; asho tiisheti xaqqee uxerechi katemooch bi gimoommon, aroo ne uxeree kelloona bi giyiyooba, haresheenaꞌochi, ginee gaarinaꞌonaa bare gaarinaꞌonochi qaaroochee tiyitona ne uxereenaꞌo qewemminaꞌone.

¹¹ Bi hareshechinaꞌo hareshoona ne gomminaꞌo bullin koteree, goraadoona ne asheenaꞌon wuxemminaꞌone; kupphe ne giimbeenaꞌo showooch dihemminaꞌone.

¹² Ne gaannoon keccemminaꞌone; ne giixee qiicoon boggemminaꞌone; ne xaqqee uxeroon dichemminaꞌone; ne emiriibeeti ne kexinaꞌon happemminaꞌone; ne xaqqeenaꞌon, ne mixinaꞌonaa ne buriceenaꞌonon baharee daggooch duppemminaꞌone.

¹³ Ne duubbi dulloon cicirikkaayemmo taane; ne ooge ximbee qaaro ebiyee bekk waayeyaachemmone.

¹⁴ Shokkaache xaqqoon neen tuniyemmo taane; haashe yesheenaꞌo boonoshi dabboon ichiibeeti xaaꞌoon tunemmi neene; ebiyee bekk wochinnoon shuuneyaachemmi neene; ebiyoo Doono Yeeri ta gettetoyichiye’ iye Nuggishoo Doono Yeeri.

¹⁵ “Nuggishoo Doono Yeeri Xiroosich ishichii beetone: ‘Mayetinaꞌo maacerehooba, ne daggoochaa asho wuxeehooba, ne dihee qaaroochee tiyitona baharee gasheexi showeenaꞌo shuuraacheheete?

¹⁶ Baharee gasheexi taateenaꞌo boonoshi taatee qeenoochee kindemminaꞌone; toommeexi boonoshi tahoonoo shoottemminaꞌone; shashechi boonoshi tahoon kichemminaꞌone; boonoshi qellich keqqoon taheree showooch kotemminaꞌone; kuxaanoon qewebee ne toommooch shaggitona geewemminaꞌone.

¹⁷ Ishichiree ne toommooch shooshemminaꞌone: “Baharee toommooch giidechi, ne asheenaꞌona ne guudoona beetinaꞌo bullin shatiibeeti, aricheti katemeene, aabichaꞌa baharoochee aallenne!

¹⁸ Illa ne dihee aabooba baharee gasheexi showeenaꞌo qewemminaꞌone; baharee daggooch beeti buure showeenaꞌo ne aalloochee tiyitona geewemminaꞌone” geti shooshemminaꞌone’ iye.

¹⁹ “Nuggishoo Doono Yeeri ishichiye: ‘Ashaalli shokkaache katemoommon neen ta tuniihooba, ooge aacon ne toommooch ta deebiyooboo aaco neen guuppemmone.

²⁰ Wonnee asheenaꞌo beetooch, maash neen daachiyemmo taane; ne daggooch beeyemmo bi daneyaachemmoyich, oppooch kindii beetinaꞌona tookki wonna happeeti xaaꞌooch, deshi showooch ne beeyemmoyich tuniyemmo taane; ebich ashi beeyi xaaꞌoon tuneyaachemmi neene; kashechinaꞌochi showooch neech xaaꞌoo daneyaachemmone.

²¹ Ne ciiroon keqqichito tuniyemmo taane; ebiyee bekk beetaachemmi neene; qaaweyemmi neene; tunebaani ciroona daneyaachemmi neene, iye Nuggishoo Doono Yeeri’ ” iye.