Hiziqeeli 25 - Kafa Linguistics Project

Amooni Toommooch Keemmeti Keemo

¹ Doono Yeeri taach ishichiye:

² “Ashi bushoocho, ne aafoon Amoonee showoo waan wochiree Amooneenaꞌo toommooch keemoon keembe.

³ Amooneenaꞌoyich, Nuggishoo Doono Yeerichi qaaroon waayebote: Nuggishoo Doono Yeeri ishichiye: ‘Ta yaafee kexo eeꞌehooba, Israꞌeelee showoo shokkoon echehooba, Yihudee macceenaꞌo kecaa hamiyooba, usha ittoshi itoyich,

⁴ ebich aabi-keyo waani asheenaꞌoyich ittoshi hajjeyemmoyich, ittoshin beshiiree immemmo taane; boonoshiyoo ittoshi daggooch kotemminaꞌone; boonoshi beeyi xaaꞌoon ittoshi daggooch tuniyemminaꞌone; ittoshi michi aafoon maayemminaꞌone; ittoshi ejjoon uchemminaꞌone.

⁵ Raabi katemoon, gaaleenaꞌochi gaddoon, Amooneenaꞌochi showoonoo bageenaꞌochi gaddoon tuniyemmo taane. Ebina Doono Yeeri ta tunoon ariyemmo ittoshine’ iye.

⁶ “Ebich Nuggishoo Doono Yeeri ishichiye: ‘Ittoshi kishoona koppee, ittoshi baatoona capphii Israꞌeelee dihoona emiriibee boonoshin qallayito ittoshine.

⁷ Ebich ittoshi toommooch ta mochoon tiijjemmo taane; ittoshi bosheyemmoyich aageteenaꞌoyich ittoshin beshii immemmo taane; asheenaꞌo daggoochee ittoshin aalliyemmo taane; showoochee ittoshin ciroona aalliyemmo taane; ittoshin ciichemmo taane; aroochee Doono Yeeri ta tunoon ariyemmo ittoshine’ iye.

Moꞌabi Toommooch Keemmeti Keemo

⁸ “Nuggishoo Doono Yeeri ishichiye: ‘Moꞌabeenaꞌonaa Seyireenaꞌona, “Yihudee macceenaꞌo bare aageteenaꞌoomminaꞌone” itinaꞌone.

⁹ Ebich Moꞌabin, bi showee daarooch beeti wottoo biich oogo tuneti katemeenaꞌo, Beet Yeshimooti, Baꞌaal Meꞌooninaa Qiriyatayiminoochee tiijjiree Moꞌabichi manje katemeenaꞌon yexxemmo taane.

¹⁰ Ebiyee bekk taatittinee daggooch bi shalligeyaachemmoyich, Amoonina tookki biin aabi-keyo waani asheenaꞌoyich beshiiree immemmo taane.

¹¹ Moꞌabi toommooch nallemmo taane; ebina boonoshiyoo Doono Yeeri ta tunoon ariyemminaꞌone’ iye.

Edoomi Toommooch Keemmeti Keemo

¹² “Nuggishoo Doono Yeeri ishichiye: ‘Edoomi Yihudee macceenaꞌochi toommooch nichoon bi gaaccitoyich, ebina xuꞌechon tunetone.

¹³ Ebich Nuggishoo Doono Yeeri ta ishichiyoye: Ta mochoon Edoomi toommooch yaggemmo taane; bi daggoochee ashoonaa gijjoonon aalliiree, hulloo echiyemmo taane. Temaani katemoochee tiijji Dedaani katemooch beddaahaa goraadoona dihemminaꞌone.

¹⁴ Ta asheenaꞌo tuneti Israꞌeeleenaꞌochi kishoona Edoomi toommooch nichoon kichemmo taane; boonoshiyoo ta kaaroommonaa ta neboommona Edoomi toommooch tuniyemminaꞌone; aroochee Edoomeenaꞌo boonoshi toommooch nichoon kichito ta tunoon ariyemminaꞌone; ebin getteto Nuggishoo Doono Yeeri taane’ iye.

Filsixeemeenaꞌo Toommooch Keemmeti Keemo

¹⁵ “Nuggishoo Doono Yeeri ishichiye: ‘Filsixeemeenaꞌo mullooch mooyon yeshona Yihudee macceenaꞌochi toommooch nichoon boonoshi gaaccitoyich, bulli aaboon ettoon tuneꞌi aalliyoyich boonoshi qaawitoyich,

¹⁶ ebich Nuggishoo Doono Yeeri ishichiye: Filsixeemeenaꞌochi toommooch ta mochoon tiijjemmo taane; Kereeteenaꞌonoo aalliyemmo taane; baharee gashooch echetinaꞌonoo aalliyemmo taane.

¹⁷ Oogeti nichoon boonoshi toommooch gaaccemmo taane; neboonoo boonoshi toommooch kindiyemmo taane; boonoshi toommooch nichoon ta gaaciyooba Doono Yeeri ta tunoon ariyemminaꞌone’ itone gete” iye.