Hiziqeeli 22 - Kafa Linguistics Project

Yerusaalemi Asheenaꞌo Shuuneti Axaaxoo

¹ Doono Yeeri taach ishichiye:

² “Ashi bushoocho, nalloyich qannitine? Damoon ukkiibeeti katemee toommooch nalloyich qannitine? Bi shuuneti ciigiiti shuunoo bullin bi toommooch awaajjibe.

³ Ishichiree gete: ‘Nuggishoo Doono Yeeri ishichiye: Ne aabo shaggemmoyich ne daggoochaa damoo ufeebeeti, shahalloon shuunoona ne qelloon eeꞌiiti katemeene!

⁴ Ne ukkiti damoona xuꞌechi tuneti neene; ne shuuneti shahalloona eeꞌeti neene; ne aaboon katichihine; ne yemeenoonoo qamichihine; ebich aageteenaꞌona ne naakkemmoyich, showeenaꞌonoo ne cooneyemmoyich tuniito taane.

⁵ Ne shigo aalleti, hukkoona ceenneti katemeene! Ne katinooch beetinaꞌonaa wohooch beetinaꞌona neen coonemminaꞌone.

⁶ “ ‘Ebiyoche, ne daggooch beeti Israꞌeelee iraasheenaꞌo, boono ikkikkoona, damoon ukkoyich boonoshi giidoon gaachee beetinaꞌone.

⁷ Ne daggoochaa indeenaa nihoona qallayeeheete; ne daggoochaa dallaaweenaꞌo xukkeheete; ne daggoochaa nihaalleenaꞌonaa xuumeenaꞌona duꞌeheete.

⁸ Ta yaafe mooyinaꞌon hoxeeton tuniihote; ta shambetoonoo eeꞌiihote.

⁹ Ashi damoon ukkiyoyich koottii beetinaꞌo ne daggooch beetinaꞌone; guudi toommoochaa deejjeeton maa beetinaꞌonaa yahechinaꞌona ne daggooch beetinaꞌone.

¹⁰ Ne daggoochaa boonoshi nihimecheen qemona boonoshi niheenaꞌon giishiiheete; ne daggoochaa qechechi maacheen giidoona yechii qeyiyeete.

¹¹ Ikkikkeenaꞌo boonoshi giyoochi mecheena tookkii shunoon maaheete; bareenaꞌo boonoshi naamecheenaꞌon qeyiyeete; bareenaꞌo wotta boonoshi nihoo bushee tuneti boonoshi hajjee maneen qeyiyeete.

¹² Ne daggoochaa damoon ukkoyich xucco maaheete; newoo shimonaa koyitoonon deqqeti neene; ne xibeenaꞌo waanee daboona gaacoon daneti neene; taanoo batteti neene, iye Nuggishoo Doono Yeeri.

¹³ “ ‘Daboona ne daneti gaacoonaa ne daggooch ufeti damoonoyich ta kishoon qahemmo taane.

¹⁴ Neen ta naxehooba kuppheree neexoon hakkenne? Ne mochoo kupphoon hakkehe? Doono Yeeri ta getteto taane; ebinoo tuniyemmo taane.

¹⁵ Aageteenaꞌo daggooch neen shaccemmo taane; showee toommoochoo neen bitinnemmo taane; ne eeꞌittinoonoo ne waanee aalliyemmo taane.

¹⁶ Ne, aageteenaꞌo aafooch cooneyemmi neene; Doono Yeeri ta tunoonoo ariyemmi neene’ itone gete” iye.

¹⁷ Doono Yeeri taach ishichiye:

¹⁸ “Ashi bushoocho, Israꞌeelee macceenaꞌo taach gaacaani mooyon tunetinaꞌone; boonoshi bulli xure birewoo wocciibeeti gemmooch echeebeeti, gaacaalli gooshoon, qoriqoroon, xuuroonaa budoonon taach shaahiyeete.

¹⁹ Ebich Nuggishoo Doono Yeeri ta ishichiyoye: Ittoshi bulliyona ebiyoommi gaacaallo ittoshi tunetoyich Yerusaalem ittoshin kicemmo taane.

²⁰ Asho birewoon, gooshoon, xuuroon, budoonaa qoriqoroonon xuuroo wocciibeeti mooyooch geddiichii bi woccemmoyich qaaqqoon bi yooppoommon ta kaaroona wottoo ta neboona ittoshin kiciichi wociyemmo taane.

²¹ Ittoshin kicemmo taane; ta kaaree qaaqqoonoo ittoshi toommooch yooppemmo taane; bi daggoochaanoo woccemmo ittoshine.

²² Birewoo xuuroo wocciibeeti qiicoochaa bi wocoommon ittoshiyoo aroochaa woccemmo ittoshine; Doono Yeeri tawoo ta neboon ittoshi toommooch woniito ta tunoon ariyemmo ittoshine” iye.

Israꞌeelee Ukkireenaꞌochi Axaaxoo

²³ Doono Yeeri taach ishichiye:

²⁴ “Ashi bushoocho, Israꞌeelee showoon ‘Hini xalleyaaneene, ta kaaree aabooba amiyo ne toommooch dihaachemmine’ gete.

²⁵ Bi daggooch beeti iraasheenaꞌo, boonoshi dabbee yechiti moochi guudoona guuddiichii gigeebeeti daahereenaꞌoomminaꞌone; ashoon maatinaꞌone; ashi yaaphoonaa aaxxe mooyinaꞌonon boggiyeete; wodde maacheenaꞌonoo xuumeenaꞌon tuniiheete.

²⁶ Bi qeesheenaꞌo ta sheeroon shaaddeheete; ta yaafee kechi mooyinaꞌon eeꞌiiheete; yaafeetonaa yaafeyaanoonon bariyaacheete; xalloonaa eeꞌoonochi daggooch beeti barbarittinoon dojjaacheete; ta shambetoon qallayiyeete; ebina boonoshi daggoochaa qallayehoye.

²⁷ Bi daggooch beeti iraasheenaꞌo bi wuxiton yangixxiibeeti okeroomminaꞌone. Tateyaani gommona gaace danoyich ashi damoon ukkii beetinaꞌone.

²⁸ Bi keemechinaꞌo dufooch booroon huutoommon huuttiibee eboshichi axaaxoon qeriyeete. Koote yaaꞌoon beeggiyeete; kootoon boonoshich kaayiyeete; Doono Yeeri ta boonoshich getaanoon ‘Ebi Nuggishoo Doono Yeerichi qaaroone’ iyeete.

²⁹ Showee asheenaꞌo xuqqiyeete; boggiyeete; girechinaꞌonaa iritechinaꞌonon xuuxiiheete; shiqqoon xuqqiyeete.

³⁰ “Showoon ta aalliyaachemmoyich, uxeroon wochi uxeremmi, tiishetoochaa ta aafooch neexemmi ashoon boonoshi daggooch qaawiyoye; tunebaani daneyaano taane.

³¹ Ebich ta kaaroon boonoshi toommooch kindiihoye; ta nebee qaaqqoona boonoshin aalliihoye; boonoshi shuunetoommon boonoshich shuunehoye” iye Nuggishoo Doono Yeeri.