Hiziqeeli 21 - Kafa Linguistics Project

Yerusaalemin Yeeri Naxemmo Tuno

¹ Doono Yeeri taach ishichiye:

² “Ashi bushoocho, Yerusaalem waan ne aafoon wochiree yaafe xaaꞌeenaꞌochi toommoochoo qaaroon gete; Israꞌeelee showee toommoochoo keemoon keembe!

³ Israꞌeelee showoyichoo ‘Doono Yeeri ishichiye: Ebiyoche ne toommooch tiyeto taane; ta goraadoon bi gonenoochee kaaciree cadiqoonaa gonde ashoonon ne daggoochee aalliyemmo taane.

⁴ Ta, cadiqoonaa gonde ashoonon ne daggoochee aalliyemmo ta tunetoyich, ta goraado deshi-waanee tiijji dambi-waan beddaahaa meeno taheto bulli toommooch bi gonenoochee kaachemmone.

⁵ Asho bulli Doono Yeeri ta, ta goraadoon bi gonenoochee kaacceto ta tunoon ariyemmone; ebi goraadoo bi gonenooch wotteyaachemmone, itone’ gete.

⁶ “Ebich ashi bushoocho, tuumbe; tiisheti mulloona wottoo caammeyoona boonoshi aafoochaa tuumbe.

⁷ ‘Amoyichiye ne tuummaabeeto?’ boonoshi getiyooba, ‘Waabeeti woree naboonane; ebi woroo waayeehooba mullo bulli muujjemmone; mochoo bulli taahemmone; kasho bulli niremmone; giidoo bulli aacochoommon ufemmone. Ebiyoo waa beetone; ceenonoo ceennemmone, iye Nuggishoo Doono Yeeri’ gete” iye.

⁸ Doono Yeeri taach ishichiye:

⁹ “Ashi bushoocho, Doono Yeeri ishichiye, getiree keemoon keembe: ‘Ye goraado! Goraado gayireetone; wottoo yoppheetone!

¹⁰ Guuroyich gayireetone; xeeyoochoommon waccoyichoo yoppheetone. Aabichiree emirehone? Ebi goraado ta bushoo taatee gumboon bare mixinaꞌochoommon qallayitone.

¹¹ Goraado yoppheeꞌi qannitone; gayiree yoppheeꞌi guurechochi kishooch giya qannitone.

¹² Ashi bushoocho, ebi mooyo ta asheenaꞌochi toommooch, Israꞌeelee iraasheenaꞌo bulli toommooch, bi waatoyich cookibe; woowo, gete. Eboshi ta asheenaꞌona tookkii beshiitaa goraadoyich ichetinaꞌone; ebich ne getoon qice.

¹³ Phireyoo waataanoon echeyaachemmone; goraado qallayiti Yihudee taatee gumbo bi aallegaata aabichoone? iye Nuggishoo Doono Yeeri’ gete.

¹⁴ “Ebich ashi bushoocho, keemoon keembe; ne kishoon kopperee goraadoon gutte wottoon, keejje wottoonoo tiikkiibe; ebi goraado oogichi wuxemmi, wuxoyichoo tunemmi, bulli kaattoona giichiti goraadoone.

¹⁵ Boonoshi mullo muujjemmoyich, meetinaꞌo tepheyemmoyich, phaqqiibeeti goraadoon boonoshi kello bulliich geddemmo taane; bi waccemmoyich yoppheetone; wuxoyich gayireetone.

¹⁶ Goraadoocho, ne aafo wotteto waanaa yoochinaa qanninon kuxe.

¹⁷ Tawoo ta kishoon koppemmo taane; ta neboonoo ciichemmo taane; Doono Yeeri ta ebin getteto taane” iye.

Baabloonee Taatoonaa Bi Goraadoona

¹⁸ Doono Yeeri wochinnoon taach ishichiye:

¹⁹ “Ashi bushoocho, Baabloonee taatoochi goraado woyemmoyich gutte gommooch malletoon gede; ebi gomminaꞌo ikke showoochee tiyemminaꞌone; gutte kaattoochaa katemooch daammii beetooch malletoon gede.

²⁰ Goraado woyemmoyich Amooneenaꞌochi katemoo Raabinaa xaqqee uxerechi Yihudee katemoo Yerusaaleminochi gommooch malletoon gede.

²¹ Baabloonee taatoo gommi gutte kaattooch neexeechi bi hammemmi gommon xiishoyich shangeenaꞌon tiikkiibee, terafimeenaꞌon echiibee, mareccoon maacibee, qaaxemmone.

²² Uxeroon happemmi qiicoon bi qanniyemmoyich, bi cerbeddemmoyich, oogichiree bi kokkoremmoyich, uxeroon happemmi qiicoon kellee toommooch bi geddemmoyich, showoon bi gutemmoyich, mishigoon bi shuunemmoyich, bi qanne kishoochoo Yerusaalemichi ixoo waahe.

²³ Baabloonee taatoyich gibeneeto tunoyich wogoon giyiti Yerusaalemi asheenaꞌoyich ebi mooyo qaaxooniye bi shaahiibeeto; tunebaani aroo boonoshi xuꞌoon boonoshich arichiyemmone; boonoshinoo keci daammemmone.

²⁴ Ebich Nuggishoo Doono Yeeri ta ishichiyoye: Ittoshi axaaxoo bi gabeyemmoyich ittoshi tuniitoyich, ittoshi xuꞌo bi gaxxeetoyich, ittoshi axaaxoo ittoshi shuunoo bullina bi bekketoyich, kecaa hammemmo ittoshine.

²⁵ “Ne aabo shaggiti, naxeeree ne aallemmi aabo shaggiti, hini yaafeyaani gonde Israꞌeelee iraashoocho,

²⁶ Nuggishoo Doono Yeeri ta ishichiyoye: Ne qelli caacoon shoote; ne gubbichoonoo baye; mooyo ebina beetaachemmone; giisheton oogiibe; oogeton giishiibe.

²⁷ Aallo, aallo, katemoon aalliyemmo taane; tunebaani katemoon bi aalliyemmoyich ta kaacceto waammi wottoon ebi tuneyaachemmone; arooba biich beshii immemmo taane.

Goraadoonaa Amooneenaꞌona

²⁸ “Ashi bushoocho, keemoon keembe; Nuggishoo Doono Yeeri ta Amooneenaꞌonaa boonoshi naagoochonon ta gettaa beeton ishichi gete: ‘Goraado guuroyich kaacceetone; aalliyoyich yoppheetone; xeeyoochoommon waccoyichoo yoppheetone.

²⁹ “ ‘Neech boonoshi beeggiti koote yaaꞌoo, neech getteeti kaayoo bi beetaanona, boonoshi xoofoo ceenniti, boonoshi aabo shaggiti, yaafeyaani gonde asheenaꞌochi qettooch ebi goraado tunemmone.

³⁰ “ ‘Goraadoon bi gonenooch wochibe! Ne halleeti xaaꞌoochaa, ne shiijjeti showoochaa ne toommooch nallemmo taane.

³¹ Ta kaaroon ne toommooch kindiyemmo taane; ta nebee qaaqqoon ne toommooch aaxxiyemmo taane; aalliyoon ariibeeti mulli manje asheenaꞌochi kishooch neen beshii immemmo taane.

³² Qaaqqoyich mixon tunemmo neene; ne damoo ne showoochaa ufemmone; wochinnoon shalligeyaachemmo neene; Doono Yeeri ta ebin getteto taane’ itone gete” iye.