Hiziqeeli 2 - Kafa Linguistics Project

Hiziqeeli Keemecho Bi Tunemmoyich Ceekko

¹ Biyoo taach ishichiye: “Ashi bushoocho, ne baatoona tiyi neexebe; ta neenna tookki yibbaatemmo taane” iye.

² Taach bi yibbaatemmona Ayaano ta maac giyiꞌi ta baatoona taan neechiye; taach bi yibbaatee beetonoo waayeho.

³ Aroochee taach ishichiye: “Ashi bushoocho, Israꞌeelee asheenaꞌo waan, ta toommooch tiyiti hukkechi macceenaꞌo waan, neen daachiyemmo taane; boonoshiyoo boonoshi qaabbechinaꞌochoommon hanaach beddaahaa ta toommooch tiyii beetinaꞌone.

⁴ Boonoshi getaa giyaaneenaꞌonaa babbereenaꞌonane; newoo boonoshich, ‘Nuggishoo Doono Yeeri ishichiye’ ne gettemmoyich neen daachiibeeto taane.

⁵ Hukkechinaꞌo boonoshi tunetoyich boonoshi waayetaa woyee waayo qajjitaa keemecho boonoshi daggooch bi beemon ariyemminaꞌone.

⁶ “Ashi bushoocho, boonoshich tuneba boonoshi qaaroyich shattaahine; guccinonaa angixona ne guudoona bi beetaa, barahee macheenaꞌo daggooch ne kotetaa, shattaahine; hukkechi asheenaꞌo boonoshi tunetoyich boonoshi qaaroon woyee sheexon shati keqqiyaahine.

⁷ Hukkechi asheenaꞌo boonoshi tunetoyich, boonoshi waayetaa woyee waayo qajjitaa boonoshich ta qaaroon gettemmo neene.

⁸ “Ashi bushoocho, ta gettaa beeton waayebe; ebi hukkechi asheenaꞌochoommon hukkechon tuneyaahine; ne kookkoon gaxxibe; ta immaa beeton mame” iye.

⁹ Tawoo qoddeti macaafoon yechiti kishoo ta waan yaggeeton beeggeho.

¹⁰ Ebi kishoo macaafoon ta aafooch yaggiye; ebi macaafo aafinaa gubbinooch kooreetone; ebi arooch shooshee qaaro, eeppi qaaroonaa caagee qaaroona kooreeꞌi beetone.