Hiziqeeli 19 - Kafa Linguistics Project

Israꞌeelee Iraasheenaꞌoyich Hichoon Caago

¹ Doono Yeeri Israꞌeelee iraasheenaꞌoyich ishichi hichoon ta caaggemmoyich gettiye:

² “Ne indee daahereenaꞌochi daggooch am shaahe daahereene! More daahereenaꞌochi daggoochaa teeqqaacha bi bushiishoon dichiyane.

³ Bi bushiishoochee ikkoon dichiyane; biyoo oogeꞌi more daaheroon tunehe; dabbee yeshon doyiye; asheenaꞌonoo maahe.

⁴ Aageteenaꞌo bi mooyon waayeheete; boonoshi iijjiti oppooch giyiꞌi yechehe; boonoshiyoo qamaaxiroona yechiꞌi Gibitsee showooch daammiyeete.

⁵ “Bi indee bi gaboo ceeni qayonaa bi gibenee kuxonon beeggaꞌa bi bushiishoochee ikkoon more daaheroon tuniihan.

⁶ Biyoo daahereenaꞌo daggooch shaꞌehe; more daaheroo tunehe; dabbee yeshon doyiye; asheenaꞌonoo maahe.

⁷ Boonoshi mishigeenaꞌon happiye; boonoshi katemeenaꞌon aalliihe; bi gigee qaaroochee tiyitona showoonaa arooch beeto bullina keqqiye.

⁸ Bi guudoona beeti aageteenaꞌo bulla bi toommooch tiyiyeete; bi toommooch boono dabboon yagiyeete; boonoshi iijjiti oppoochoo yechehe.

⁹ Qamaaxiroona yechiꞌi guubee daggooch geddiyeete; Baabloonee taatoo waan deebiyeete; bi qaaro Israꞌeelee guudinaꞌooch, aroyee hach bi waayeyaachemmoyich cuyee kexooch giijjiyeete.

¹⁰ “Ne indee aachi gashooch becheeti woyinoommine; aachi woddoochee tiyitona aafeebeeti wottoo wodde atechi woyinee qombeyoommine.

¹¹ Bi ato kuppho bi tunetoyich, taatee gumbo aroochee danee beetone. Woyinee qomboo dunjunje kubboyee beshoon dicciye; bi neexo mixinaꞌochi daggooch genjee bekkehe; bi genjittino wodde ateenaꞌona tookkii hubbimii bekkehe.

¹² Tunebaani ebi woyino kaaroona waachehe; showoochoo duppehe. Aabi-keyo waani yongoona shuuqqiye; bi aafoo shekirehe; kupphe bi ateenaꞌoo shuuqqiyeete; qaaqqoo boonoshin maahe.

¹³ Andoo barahooch, shuuqqii baggiti showooch daamaa becheehe.

¹⁴ Bi giindoochee qaaqqoo kechiye; bi qaakkoonaa bi aafoonon maahe; ebich arooch kupphe ato aallehe; taatee gumbo aroochee dano qajjiye” iye. Ebi eefooba wochi wochaa caaggeyemmi hichoone.