Hiziqeeli 17 - Kafa Linguistics Project

Booyonaa Woyinee Qomboonochi Shaahiyoo

¹ Doono Yeeri taach ishichiye:

² “Ashi bushoocho, turitebe; Israꞌeelee macceenaꞌoyich shaahiyoona yibbaatebe.

³ Boonoshich, Nuggishoo Doono Yeeri ishichiye, gete: ‘Ogooge qoshoonaa genje wulloona biich beeti ikke xuphaaxuphe ooge booyo Libanoos yoobbii waaꞌi, yigee michi waamon yechiye.

⁴ Bi cilloonoo tiichiꞌi giixechinaꞌochi showooch daammiye; daammiꞌi giixechinaꞌochi katemooch kotiihe.

⁵ “ ‘Aroochee Israꞌeelee showoochee yaroon daammiye; daammiꞌi wodde aaco beeti qeemi showooch bechiye.

⁶ Bi collehooba qamini wottoo dengich gafgappiti woyinoon tunehe; bi ateenaꞌoo ebi booyo waan wotteꞌi dicciyeete; bi cammoo dugilla gaawichii dicciye. Ebi woyino waajjee ateꞌi woyinee qomboon tunehe.

⁷ “ ‘Aroochee wotta ogooge qoshoonaa wodde huushoona biich beeti bare ooge booyo beehe; ebi woyinee qomboo aacon danoyich bi cammon ebi booyo waan awurehe; bi atoonoo bi waan yaggiye.

⁸ Tunebaani ebi woyino bi becheeto bi atemmoyich, bi aafemmonaa gaawe woyinoon bi tunemmonoyich, wodde aaco beeti gaawe showoochiye’ gete.

⁹ “Nuggishoo Doono Yeeri ishichiye, gete: ‘Ebi woyino diccehe? Aafi booyo cammona waaxi, bi aafoon shekiriree, nolle bi waamoo shoollemmoyich tuniyaachehe? Biin cammona waaxoyich kupphe mochoo woyee meeti asho qaawiyaachemmone.

¹⁰ Ebi woyino becheyoon becheetone; tunebaani dicon hakkehe? Aabi-keyo waani yongo biin yexiyooba ciroona shoollaachehe? Bi becheeti tagoochaa shoollaachehe?’ itone gete” iye.

Shaahiyeechi Biisho

¹¹ Aroochee Doono Yeeri taach ishichiye:

¹² “Hukkechi macceenaꞌoyich ishichibe: ‘Ebi moochi biisho amo gaata ariyaachote? Ebiyoche, Baabloonee taatoo Yerusaalem waaꞌi bi taatoonaa bi iraasheenaꞌonon Baabloonee showooch bi waan daammitone.

¹³ Taatee yaroochee ikkoon daammiꞌi biich gibeneeto bi tunemmoyich wogiiꞌi, biinna tookkii wogoon giyiye; biyoo wotta aricheti asheenaꞌonoo keccii daammiye.

¹⁴ Ebin bi tuniito, ebi taatee showoo yittemmoyich, wochinnoon qaallaanoon biinna tookkii geddeti wogoon manjii bi quyemmoyichiye.

¹⁵ Tunebaani Yihudee taatoo bi toommooch hukkeꞌi haresheenaꞌonaa meeti ginee naayinaꞌonon bi danemmoyich wocheyechinaꞌon Gibits daachiihe. Biich kaamehe? Ebiyoommi mooyon tuniimmi asho muriccehe? Wogoon happiichi muricon hakkehe?

¹⁶ “ ‘Beeyecho ta tunoona wogehoye, iye Nuggishoo Doono Yeeri: Wogoon bi qallayiti, biinna tookkii bi giyiti wogoon bi happiti, biin taatiiti taatoo beeti xaaꞌoochaa, Baabloonaa qitemmone.

¹⁷ Baablooneenaꞌo meeti asheenaꞌon aalliyoyich showoon boonoshi gutiyoobinaa mishigoon boonoshi shuunehoobina, Farooni, giidechi bi ginee naayinaꞌonaa dofee koyechinaꞌona tookkii waaꞌi biin gaachoon hakkaache.

¹⁸ Bi giyiti wogoon happoona wogoon bi qallayitoyich, kishoon bi immitoyee gubb ebi bullinoo bi tuniitoyich, muricaachemmone’ gete.

¹⁹ “Ebich Nuggishoo Doono Yeeri ishichiye: ‘Beeyecho ta tunoona wogehoye: Bi qallayiti ta wogo, bi happiti ta wogo, biin yechemmoyich tuniyemmo taane.

²⁰ Ta dabboona biin dabbe yechemmo taane; Baabloonee showooch biin daammemmo taane; taach gibeneyoo bi qajjitoyich aroochaa bi toommooch nallemmo taane.

²¹ Aricheti bi ginee naayinaꞌo bulli goraadoona dihemminaꞌone; aroochee echemminaꞌo kaatti kaatta shacemminaꞌone; ebin getteto Doono Yeeri ta tunoon ariyemmo ittoshine’ iye.

Yeeri Gibenikkiti Gibeno

²² “Nuggishoo Doono Yeeri ishichiye: ‘Genje yigee michi toommoochee, ta qelloona cilloon daami kotiyemmo taane. Aree cilloochee ikke nolloon haxxemmo taane; genje, ooge guudi toommooch bechemmo taane.

²³ Ta bechemmo genje, ooge Israꞌeelee guudi toommoochiye; biyoo atemmone; aafemmone; aricheti yigoon tunemmone; bi baatoochoo kafeenaꞌo kashemminaꞌone; bi ateenaꞌochi yiiroochoo qoshoona yoobbiibeeto bulli kexon haggemmone.

²⁴ Kubbeexi mixinaꞌo bulli, genje mixinaꞌon qamichito, qamini mixinaꞌon genjiito, gaare mixon shuuꞌiito, shuuqqiti mixinaꞌonoo gaariito, Doono Yeeri ta tunoon ariyemminaꞌone. Doono Yeeri ta, ebin getteto taane; ebinoo tuniyemmo taane’ itone gete” iye.