Hiziqeeli 16 - Kafa Linguistics Project

Yerusaalemi Gibeneyaane Tuno

¹ Wochinnoon Doono Yeeri taach ishichiye:

² “Ashi bushoocho, ciigiiti bi mooyon Yerusaalemich arichiibe.

³ ‘Yerusaalemich, Nuggishoo Doono Yeeri ishichiye: Ne yaroonaa ne shiijje showoona Kanaaniye; ne nihoo Amooree ashoone; ne indee Hitee asheene.

⁴ Ne shiijjehooba, ne yundo maacheyaanoone; ne xallemmoyich aacona badireyaane neene; kiihon yopphetaa tahoona kaappeyaane neene.

⁵ Ne shiijjehooba shixxiiti ne tunetoyich, gaddooch duppehinalli koniyoona ariqqeꞌi ebi mooyoochee ikkeenolla neech tuniito aalloone.

⁶ “ ‘Ne gaꞌoona ta beshemmona, damoona wooraꞌa qaferaa ne beetaa daneho; damoona kaapaꞌa ne beetaa “Kashoona beebe” iyo; eeha damoona kaapaꞌa ne beetaa “Kashoona beebe” iyoye.

⁷ Gaddeexi mocoochoommon ne diccemmoyich tuniihoye; newoo diccaa genjaꞌa mallet gaawe gidiideen tunehine; xano kichihine; ne shurubboo genjehe; tunebaani andoo shokkaachee neene.

⁸ “ ‘Wochinnoon ne gaꞌoona beshaabee neen ciinnaꞌa, shaakkeya ne bedon beeggeho; tawoo ta tahoon ne toommooch yaggii, ne achoon qeriyoye; wogaa neenna tookkii wogoon giyaꞌa neen taachi tuniihoye, iye Nuggishoo Doono Yeeri.

⁹ “ ‘Aroochee aacona neen machaꞌa, damoochee neen xalliihoye; zayitoonoo neen huuttoye.

¹⁰ Shashe qamisoon neech tajjiyoye; gaawe gooqqoochee shuuneeti caammoon neech geddoye; muttee tuppoochee shippeti shaashoon ne qellooch kaappoye; aaxxe tahoonoo ne toommooch xappiyoye.

¹¹ Macecikkiti shashoona neen shashiihoye; ne kishooch shagaamoon geddoye; ne qettoochoo shashoon tippoye.

¹² Ne muddooch axxaamittoon, ne waamooch gudichoon geddoye; ne qelloochoo gaawe gubbichoon ukiihoye.

¹³ Aachoonaa birewoonon geddaꞌa shasheti neene; muttee tuppoochee shippeti gaawe taho, shashe qamisoonaa aaxxe tahoona neech beetone; ne maayo gaawe buddino, eeyonaa zayitoonane. Newoo beshoon mallet gaawee tunaꞌa diccehine; taatee tunoyichoo beddehine.

¹⁴ Neech ta immeti oogoochee tiyitona ne malleto gaawetoyich ne woroo aagetoo bulliich waayeehe, iye Nuggishoo Doono Yeeri.

¹⁵ “ ‘Tunebaani ne, ne malletoonaa aricheti ne tunoonon gibenaꞌa gommo beshina tookkii shunee mamooch giyehine.

¹⁶ Ne tahoochee daammaꞌa ne goyinnemmi goyinnee xaaꞌoon macecikkihine; aroocheenoo shunoo maahine; ebiyoommi mooyo ebiyee aaf tunee ariyaanoone; ebiyee bekkoo tuneyaachemmone.

¹⁷ Neech ta immeti ta aachoonaa birewoonoochee shuuneeti ne shashoon daammaa anaaminaꞌochi misiloon shuunaꞌa boonoshina tookkii shunoo maahine.

¹⁸ Shashe ne tahoon daammaꞌa boonoshich tajjihine; ta zayitoonaa ta ixaanoonon daammaꞌa boonoshich deejjoo giddiihine.

¹⁹ Ne maayemmoyich neech ta immeti maayoon, ebiyoo gaawe buddinoon, eeyonaa zayitoonon gaawe cinnoon bi cinnemmoyich tuniiꞌa boonoshich giddiihine; ebiyoommi mooyo tunetone, iye Nuggishoo Doono Yeeri.

²⁰ “ ‘Taach ne shiyeti anaami bushiisheenaꞌonaa maache bushiisheenaꞌonon, maayo boonoshi tunemmoyich, boonoshich deejjihine. Ebi ne yahiti yahoo kette mooyone?

²¹ Ta bushiisheenaꞌon guurii qaaqqooch michaa boonoshich deejjihine.

²² Ebi ciigiiti ne yahee yemeenooba, shokkaachee tunaa damoona wooraꞌa ne beehoobee ne bushittinee yemeenoon gabaane neene.

²³ “ ‘Neech woowo, woowo! iye Nuggishoo Doono Yeeri. Ebi bulli gondoon tuniichaa,

²⁴ ne qellich xoobe xaaꞌoon qanniihine; addibaaboo bulliichoo hashekkimiti xaaꞌoon qanniihine.

²⁵ Gamini gamine gommi gashooch hashekkimiti xaaꞌoon shuunehine; ne malletoonoo eeꞌiihine; aroona besheebeeto bullich ne qelloon beshii imona yahoon meechihine.

²⁶ Yahiichii wotteyaani Gibitsee asheenaꞌona tookkii yahihine; taan ippiyoyich woddii yahihine.

²⁷ Ebich neen sheeroyich ta mochoon ne toommooch tiijjito taane; neech ta immaabeeti ne qoodoon shappiito taane; ne gonde shuunoon ciigeebeeti ne etteenaꞌochi qaatooch, Filsixeemee asheenaꞌochi kishooch, neen beshiyaa immeto taane.

²⁸ Neech bedo bi qajjitoyich Asooreenaꞌona tookkii yahihine; tunebaani andoo tooꞌaanee neene.

²⁹ Giixee showoo Baabloon beddaahaa woddii yahihine; ebinoo tooꞌaanee neene.

³⁰ “ ‘Yeellaalli yahechi maachechoommon ebi bulli mooyon ne tuniito am shaahe mullaalle tunaꞌaaniye? iye Nuggishoo Doono Yeeri.

³¹ Gommi gommi gashooch ne yahemmi xoobe xaaꞌoon shuuneti neene; addibaaboo bulliichoo hashekkimiti xaaꞌoon qanniiti neene; tunebaani yahechi maachechoommonolla gijjee kicoon qaawaanee neene.

³² “ ‘Hini yahechine! Bi kenoon qajjaachaa dallaawoona tookkii qeyaabeeti maacheen tuneti neene.

³³ Yahechi maachee asheenaꞌo waanee gijjoon deqqaa beetine; tunebaani ne, shunimaayeenaꞌoyich wojjoon immehine; xaaꞌoo bulliichee waaree neenna tookki shunoon boonoshi maayemmoyich xuccoon immehine.

³⁴ Ne yahoona bare maacheenaꞌoyee baree neene; yahecho koniyoona neen danoyich maanjoo biich qaawiyaache; gijjoon ne qoccehinalli koniyoona gijjoon neech qocaache; ebich ne bariti neene.

³⁵ “ ‘Ebich yahechine, Doono Yeerichi qaaroon waayebe:

³⁶ Nuggishoo Doono Yeeri ishichiye: Ne shunimaayeenaꞌona tookkii yahoona eeꞌe ne mooyo bi ufetoyich, ne achoo bi shoottetoyich, ciigiiti shahalleenaꞌoyich ne goyinnetonaa ne bushiisheenaꞌochi damoon ukkoona ebi shahalleenaꞌoyich ne deejjitonoyich,

³⁷ boonoshina tookkii ne emiriti ne shunimaayeenaꞌo bullin, ne shunnetinaꞌonaa ne shixxetinaꞌonon, bulli xaaꞌoochee ne toommooch kicemmo taane; kiciichi ne achoon boonoshi beeggemmoyich, gaxxemmo taane.

³⁸ Shaddechinaꞌonaa damee ukkechinaꞌona tuneti maacheenaꞌochi toommooch nalleebeeti nalloon ne toommooch nallemmo taane; ta neboonaa qanaatee ta kaaroonon ne toommooch kindiiree damoona ne wooremmoyich tuniyemmo taane.

³⁹ Ne shunimaayeenaꞌochi kishooch neen beshii immemmo taane; boonoshiyoo ne xoobe xaaꞌoonaa ne goyinnee xaaꞌoonon happemminaꞌone; ne tahoon shooti, ne shashoon daami neen shokke hulloo echiyemminaꞌone.

⁴⁰ Xaqqoona neen qiccemmi, goraadoonoo neen qeccemmi macceenaꞌon ne toommooch tiijjemminaꞌone.

⁴¹ Ne kexinaꞌon qaaqqoona michemminaꞌone; meeti maacheenaꞌo aafoochaa ne toommooch nallemminaꞌone; yahoon ne neechemmoyich tuniyemmo taane; ebiyee bekk ne shunechinaꞌoyich gatiyoon qocaachemmi neene.

⁴² Ebina ne toommooch ta ippeti ippo aqqemmone; ta qanaato ne waanee wokkemmone; cikkiyemmo taane, wochinnoonoo kaareyaachemmo taane.

⁴³ “ ‘Ne bushittinee gooroon gaboo ne qajjetoyich, ne shuuneti mooyo bullinoo taan ne ippiitoyich, ne shuunetoommon neech shuunemmo taane; bare ciigiiti ne mooyo bulli toommooch yahoon meechaane neene? iye Nuggishoo Doono Yeeri.

⁴⁴ “ ‘Yerusaaleme, asheenaꞌo ne mooyon, “Bushee bi indeyoommin tunehane” geti tochemminaꞌone.

⁴⁵ Ne, bi kenoonaa bi bushiishoonon shixxeti ne indeechi bushee neene; ne, boonoshi keneenaꞌonaa bushiisheenaꞌonon shixxiti ne maache maneenaꞌochi manee neene. Ne indee Hitee asheene; ne nihoo Amooree ashoone.

⁴⁶ Ne qaabbe manee, bi maache bushiishoona tookkii neyee dambi-waan beeti Shamaarine; ne guuche manee bi maache bushiishoona tookkii neyee deshi-waan beeti Sodoomine.

⁴⁷ Ne, boonoshi gommon dabboo woyee ciigiiti boonoshi mooyon tuniyoo baach tuneyaanoon, giisheche aabee daggooch ne gommo bullina boonoshiyee beshe gonde mooyon tuniihine.

⁴⁸ Beeyecho ta tunoona wogehoye: Ne manee Sodoominaa bi bushiisheenaꞌona neennaa ne bushiisheenaꞌona tuniitoommon tuniyaaneenaꞌone, iye Nuggishoo Doono Yeeri.

⁴⁹ “ ‘Ne manee Sodoomichi xuꞌo ebine: Biinnaa bi bushiisheenaꞌona geecechinaꞌone; wodde maayoonaa mashaamiti beemona boonoshich beetaa girechinaꞌonaa iritechinaꞌonon gaacheyaacheete.

⁵⁰ Geeciyeete; ta aafoochoo ciigiiti mooyon tuniiheete; ebin ta beegiyooba boonoshin aalliihoye.

⁵¹ Shamaari ne shuuneti axaaxee qaton shuuneyaaneene; ne biyee beshe ciigiiti mooyon tuniyoona biin deꞌe shaahiihine.

⁵² Ne maneenaꞌochoyee beshe ciigiiti mooyon tuniyoona ne boonoshi nalloon kettoo ne tuniitoyich, boonoshiyoo neyee beshe cadiqoon boonoshi tunetoyich ne yeelloon shaage; ne maneenaꞌon deꞌoon ne shaahiitoyich, yeellebe; ne yeelloonoo shaage.

Sodoominaa Shamaarina Wochinnoon Shuuneyemminaꞌo Tuno

⁵³ “ ‘Sodoominaa bi bushiisheenaꞌonochi kecoon, wottoo Shamaarinaa bi bushiisheenaꞌonochi kecoon wochemmo taane; ne hajjee kecoonoo boonoshi daggoochaa neech wochemmo taane.

⁵⁴ Ebiyoo yeelloon ne shaaggemmonaa ne tuniito bullich ne yeellemmonoyichiye; Sodoominaa Shamaarina gondoona neenominaꞌo tuno boonoshi qajjitoyich goggemminaꞌone.

⁵⁵ Ne maneenaꞌo tuneti Sodoominaa Shamaarina boonoshi bushiisheenaꞌoo wonnee boonoshi goorooch wottemminaꞌone; neennaa ne bushiisheenaꞌonoo wonnee ittoshi goorooch wottemmo ittoshine.

⁵⁶ Ne geecee aabooba ne manee Sodoomin cooqqiraane neene?

⁵⁷ Ebiyoo ne axaaxoo gaxxeeyoye aafiye. And Sooriyee maache bushiisheenaꞌonaa bi giyeenaꞌo bullina, ne guudoona beechi neen hoxeebeeti Filsixeemee maache bushiishoo bullina cooneeti neene.

⁵⁸ Qocaallee ne tunoonaa ciigiiti ne shuunoonoyich naxeyemmi neene, iye Doono Yeeri.

Bulli Yemeenoon Manjemmi Wogo

⁵⁹ “ ‘Nuggishoo Doono Yeeri ishichiye: Wogoon happoona ta wogoon ne hoxetoyich ne tuniitoommon ne toommooch tuniyemmo taane.

⁶⁰ Tunebaani ne bushittinooba neenna tookkii ta giyeti wogoon shalligemmo taane; neenna tookki bulli yemeenee wogoon manjiyemmo taane.

⁶¹ Ne qaabbe maneenaa ne guuche maneenon bushiishoochoommon neech ta imiyooba ne gommon gabiree yeellemmi neene; boonoshin neech ta immemmo neenna tookkii ta giyeti wogoommon toonoone.

⁶² Neenna tookkii ta wogeti wogoon manjiyemmo taane; newoo Doono Yeeri ta tunoon ariyemmi neene.

⁶³ Ne tuniiti mooyo bullin echebe ta iyooba ne xuꞌo neech bi tipphiimmona yeellemmi neene; yeellee naboona wochinnoon noonoo wochaachemmi neene, iye Nuggishoo Doono Yeeri’ gete” iye.