Hiziqeeli 14 - Kafa Linguistics Project

Yeeri Shahalloyich Goyinnoon Shixo

¹ Israꞌeelee geeneenaꞌoochee asheenaꞌo waaꞌi ta aafooch koteheete.

² Doono Yeeriyoo taach ishichiye:

³ “Ashi bushoocho, ebi asheenaꞌo boonoshi mulloon shahalloyich hajjiitinaꞌone; ebi boonoshi gonde shuunoon xugoon tuniiꞌi boonoshi aafooch kotiitinaꞌone. Ishigaata ta waanee eche waayeya boonoshi qaawoo tatoone?

⁴ Ebich boonoshich yibbaatebe; ishichishoo gete: Nuggishoo Doono Yeeri ishichiye: Israꞌeelee maccoochee bi mulloon shahalloyich hajjiichii, ebi bi gonde shuunoon xugoon tuniiꞌi bi aafooch kotiichii, keemecho waan waabeeto koninolla Doono Yeeri ta, ta qelloona bi shahallee meetoommona bi shuunetoommon bi toommooch shuunemmo taane.

⁵ Ebiyoo shahallee naboona boonoshi mulloon ta waanee bariiti, Israꞌeelee maccoo bullichi mulloon ta waan wochoyichiye.

⁶ “Ebich Israꞌeelee macceenaꞌoyich ishichibe: Nuggishoo Doono Yeeri ishichiye: ‘Shahalleenaꞌoyich goyinnoon qayiichi ta waan wottebote; ciigiiti ittoshi mooyinaꞌon qayiichi hach guudote’ gete.

⁷ “Israꞌeelo tuneba Israꞌeelee daggooch beeti shiqqoo, tayee biin bariiti shahalloyich bi mulloon hajjiichii, ebi bi gonde shuunoon xugoon tuniiꞌi bi aafooch kotiichii, ta waanee echee waayoyich keemecho waan bi waagaata, ta qelloona Doono Yeeri ta biich wochemmo taane.

⁸ Are uro toommooch ta aafoon maggiyemmo taane; cooqqireyechonaa sheeree malletoonon biin tuniyemmo taane; ta asheenaꞌo daggoochee biin waaxxemmo taane. Aroochee Doono Yeeri ta tunoon ariyemmo ittoshine.

⁹ “Are keemecho dacheeꞌi bi wochigaata, are keemechon dachito Doono Yeeri taane; ta mochoon bi toommooch tiijjemmo taane; ta asheenaꞌo tuneti Israꞌeeleenaꞌo daggoochee biin aalliyemmo taane.

¹⁰ Keemechonaa biinna keemii beetona ikke shaahe naxoon naxeyemminaꞌone.

¹¹ Ebiyoo Israꞌeelee macceenaꞌo wotta tayee wohiree boonoshi muricaachemmonaa boonoshi axaaxoo bullina boonoshi eeꞌeyaachemmonoyichiye. Ebiyoo, boonoshiyoo taach maccoo boono tunemmoyich, tawoo boonoshich Nuggishoo ta tunemmoyichiye” iye Nuggishoo Doono Yeeri.

Nallee Kindoo Echeyaachemmo Tuno

¹² Doono Yeeri taach ishichiye:

¹³ “Ashi bushoocho, ikke showee asheenaꞌo taach gibeneyaache ii axaaxoon boonoshi shuunetaa, tawoo ta mochoon boonoshi toommooch tiijjaꞌa boonoshi maayi woretoon ta kuxigaata, shaacoon deebaa ashoonaa gijjoonon ta wuxigaata,

¹⁴ ebi keejje asheenaꞌo Noohi, Daaneelinaa Iyoobina arooch boonoshi beetaanona, boonoshi cadiqittinoona boonoshi wodiyemmo boonoshi qelloon baachiye; ebin getteto Nuggishoo Doono Yeeri taane.

¹⁵ “Are showooch kubbi cooxon ta daachiitaa, koniyoona aroona besheyaachemmon tuniiꞌi showoon boonoshi yexxii aalliigaata,

¹⁶ Nuggishoo Doono Yeeri ta, beeyecho ta tunoona wogehoye: Ebi keejje asheenaꞌo arooch boonoshi beetaanona boonoshi qelloon baachalli boonoshi anaami woyee maache bushiisheenaꞌon wodiyoon hakkaachemminaꞌone; tunebaani showoo shokkoon echemmone.

¹⁷ “Woyee ‘Goraado showoona beshebe’ iyaꞌa are showooch ginoon ta deejjaa, ashoonaa gijjoonon bi aalliigaata,

¹⁸ Nuggishoo Doono Yeeri ta, beeyecho ta tunoona wogehoye: Ebi keejje asheenaꞌo arooch boonoshi beetaanona boonoshi qelloon baachalli boonoshi anaami woyee maache bushiisheenaꞌon wodiyoon hakkaacheminaꞌone.

¹⁹ “Woyee are showooch biiyoon ta deejjaa, ta neboon damoona tookkii ta woniitaa, ashoonaa gijjoonon bi aalliigaata,

²⁰ Nuggishoo Doono Yeeri ta, beeyecho ta tunoona wogehoye: Noohi, Daaneelinaa Iyoobina arooch beetaanona, boonoshi cadiqoona boonoshi wodiyemmo boonoshi qelloon baachalli boonoshi anaami woyee maache bushiishoon wodiyoon hakkaachemminaꞌone.

²¹ “Ebich Nuggishoo Doono Yeeri ishichiye: Ashoonaa gijjoonon aroochee aalliyoyich kupphe magge awudde ta naxeenaꞌon, eboshiyoo, ginoon, shaacoon, gonde cooxinaꞌonaa biiyoonon Yerusaalemi toommooch ta deejjiyooba magge mooyo tunemmone.

²² Tunebaani anaami bushiisheenaꞌonaa maache bushiisheenaꞌonon yaabi deebemminaꞌo murici echemminaꞌone; ittoshi waanoo woyemminaꞌone; ittoshiyoo boonoshi gommonaa boonoshi shuunoonon beeggemmo ittoshine. Yerusaalemi toommooch ta deebeti gonde mooyo bullich goggemmo ittoshine.

²³ Boonoshi gommonaa shuunoonon ittoshi beegiyooba, ta tuniito bullin nabaalloon tuniyaano ta tunoon ariiree goggemmo ittoshine” iye Nuggishoo Doono Yeeri.