Hiziqeeli 13 - Kafa Linguistics Project

Koote Keemechinaꞌo Toommooch Keemmeti Keemo

¹ Doono Yeeri taach ishichiye:

² “Ashi bushoocho, boonoshi mulloochee kichiꞌi keemoon keemmiibeeti Israꞌeelee keemechinaꞌochi toommooch keembe; boonoshichoo ishichibe: ‘Doono Yeerichi qaaroon waayebote!

³ Nuggishoo Doono Yeeri ishichiye: Amoonolla beegaanoon boonoshi mullee gaboon dabbiibeeti mullaalli keemechinaꞌoyich woowo!

⁴ Israꞌeeleenaꞌote, ittoshi keemechinaꞌo happeeti katemee gutee daggooch beeti boqqelloomminaꞌone.

⁵ Doono Yeerichi koyee aabooba manji bi neexemmoyich tiisheti uxerooch hammiꞌi Israꞌeelee macceenaꞌoyich uxeroon uxereyaano ittoshine.

⁶ Boonoshi yaaꞌoo kootoone; boonoshi qaaxo kootoone; Doono Yeeri boonoshin wocheyaanoon “Doono Yeeri ishichiye” iyeete; aroochee boonoshi keemmito ceennemmoyich quyeheete.

⁷ Ta getaanoon “Doono Yeeri ishichiye” ittoshi geto, koote yaaꞌoon beego, koote qaaxoonoo qaaxo toone?

⁸ “ ‘Ebich Nuggishoo Doono Yeeri ishichiye: Duube mooyon ittoshi yibbaatetonaa koote yaaꞌoon ittoshi beeggitonoyich, ittoshi toommooch tiyeto taane, iye Nuggishoo Doono Yeeri.

⁹ Ta kishoo duube yaaꞌoon beeggii beetinaꞌonaa kootoon qaaxee beetinaꞌonochi toommooch tiyemmone; boonoshi ta asheenaꞌochi iitee daggooch daneyaachemminaꞌone; Israꞌeelee yaree macaafooch kooreyaachemminaꞌone; Israꞌeelee showoochoo giyaachemminaꞌone; ebinoo Nuggishoo Doono Yeeri ta tunoon ariyemmo ittoshine.

¹⁰ “ ‘Ebi keemechinaꞌo diggoo aalloon diggoone iibee ta asheenaꞌon muriciiheete; ta asheenaꞌo xaqqoon kecimmona boonoshi arooch booroon dikkeheete;

¹¹ booroon dikkee beetinaꞌoyich dihemmo bi tunoon gete; amiyoo dudemmone; baderee gaagoo kindemmone; yubee yongoo gaakkemmone.

¹² Keceeti xaqqo dihiyooba asheenaꞌo, “Ittoshi dikketi booro aaye?” getaacheheete?

¹³ “ ‘Ebich Nuggishoo Doono Yeeri ishichiye: Ta neboona yubee yongoon deejjemmo taane; ta kaaroona baderee gaagoon deejjemmo taane; amiyoo dudi kindiree aalliyemmone.

¹⁴ Booroona ittoshi dikketi xaqqee kecoon happemmo taane; bi heco bekkemmooch beddaahaa dichemmo taane; bi dihiyooba, ittoshiyoo bi daggoochaa aallemmo ittoshine; aroochee Doono Yeeri ta tunoon ariyemmo ittoshine.

¹⁵ Xaqqee kecoonaa arooch booroon dikketi asheenaꞌonochi toommooch ta neboon kindiichi, “Xaqqee keco tuneba, aree toommooch booroon dikketinaꞌo aalletinaꞌone” gettemmo taane.

¹⁶ Boonoshiyoo Yerusaalemichon keemoon keemmiti, diggoo aalloon diggee yaaꞌoon beeggiti Israꞌeelee keemechinaꞌone, iye Nuggishoo Doono Yeeri’ gete” iye.

Koote Keemechi Maacheenaꞌo Toommooch Keemmeti Keemo

¹⁷ Doono Yeeri ishichiye: “Andoo ashi bushoocho, boonoshi mulloochee kichiꞌi keemoon keemmiibeeti ne asheenaꞌochi maacheenaꞌo waan ne aafoon wochibe; boonoshi toommoochoo keemoon keembe.

¹⁸ Boonoshich ishichibe: ‘Nuggishoo Doono Yeeri ishichiye: Ashi kashoon olloyich mochooch geddeyemmi xifetoon kochiibeeti, baribare qelli kaafoonoo shuuneebeeti maacheenaꞌoyich woowo! Ta asheenaꞌochi kashoon kamboona ittoshi kashoon wodiyehote?

¹⁹ Ittoshi kootoon waayaabeeti ta asheenaꞌoyich koottiibee, qita bedaani kasheen wuxoona, woda bedaani kasheenoo wodiyoona ikke ushi sheqoonaa ikke tiishi koshonoyicha iꞌi ta shigoon eeꞌiito ittoshine.

²⁰ “ ‘Ebich Nuggishoo Doono Yeeri ishichiye: Ashi kashoon kafoochoommon ittoshi olleebeeti xifetoon shixxoye; ittoshi mochee toommoochee kuxi bajjemmo taane; kafoochoommon ittoshi olleti ashoon aroochee kichemmo taane.

²¹ Qelli kaafoonoo keexi shootiree ta asheenaꞌon aroochee wodiyemmo taane; ebiyee bekk ittoshi kishooch dihaachemminaꞌone; ebiyooba Doono Yeeri ta tunoon ariyemmo ittoshine.

²² Gibeno ta kuchiyaani cadiqe ashoon kootoon koottiꞌi gibeno kuchiito ittoshine; axaaxecho bi gondoochee wotteree bi wodaachemmoyich biin kupphiito ittoshine.

²³ Ebiyee bekk koote yaaꞌoon beegaachemmo ittoshine; qaaxoonoo qaaxeyaachemmo ittoshine; ta asheenaꞌon ittoshi kishoochee wodiyemmo taane; ebiyooba Doono Yeeri ta tunoon ariyemmo ittoshine, itone’ gete” iye.