Hiziqeeli 12 - Kafa Linguistics Project

Hiziqeeli Kecceyoon Malletoona Bekkiyoo

¹ Doono Yeeri taach ishichiye:

² “Ashi bushoocho, hukkechi macceenaꞌo daggooch koteto neene; ciinoyich aafoo beetaa ciinaacheete; waayoyich waamo beetaa waayeyaacheete; ebiyoo hukkechi yareenaꞌo boonoshi tunetoyichiye.

³ “Ebich ashi bushoocho, kecooch hammii beeton shaahiree ne qiicoon qanniibe; boonoshi ciini beetaa kecooch hammii beeton shaahiree areddoon tibe; boonoshi ciini beetaa keccetochoommon ne xaaꞌoochee bare xaaꞌooch hambe; hukkechi macceenaꞌo boonoshi tunetaanoona diqqich shalligemminaꞌone.

⁴ Boonoshi ciini beetaa areddoon ne qiicoon maach kichibe; boonoshi ciini beetaa keccetochoommon xumoon keyi hambe.

⁵ Boonoshi ciini beetaa ne kechi duuhoon hottiree ne qiicoon aroona kichibe.

⁶ Boonoshi ciini beetaa qiicoon tiijji ne gogooch shaagi, showoon ne ciinaachemmoyich ne aafoon ufiree manderoona keyi hambe; tawoo Israꞌeelee macceenaꞌoyich malletoo neen tuniito taane” iye.

⁷ Tawoo taach getteetoommon tuniiho. Kecee hammii beetochoommon areddoon ta qiicoon maach kichiyo; xumoona ta hajjee kishoona kechi duuhoon hottaꞌa aahoon kichiyo; boonoshi ciinnii beetaa ta qiicoon ta gogooch shaaggaꞌa manderoona kechaa hammeho.

⁸ Maaddoona Doono Yeeri taach ishichiye:

⁹ “Ashi bushoocho, hukkechi Israꞌeelee macceenaꞌo, ‘Ebi ne tuniibeeto amoone?’ iꞌi neen echeyaacheete?

¹⁰ Boonoshich ishichibe: ‘Nuggishoo Doono Yeeri “Ebi keemee qaaro Yerusaalem beeti iraashoonaa arooch beeti Israꞌeelee macceenaꞌo bullinoyichiye” itone’ gete.

¹¹ Ebi ne tuniibeeti mooyo bulli boonoshi toommooch tunemmi mooyoyich malletoo bi tunoon boonoshich arichiibe; boonoshiyoo kecaa hammemminaꞌone.

¹² “Boonoshi daggooch beeti iraashoo bi qiicoon gogooch shaagiree xumoona kechemmone; duuhoon boonoshi hotaa aroona shoki besheree kechemmone; bi showoonoo aafoona bi ciinaachemmoyich aafoon oppemmone.

¹³ Ta dabboon bi toommooch yaggemmo taane; ta shaachoona yecheyemmone; Kalideenaꞌochi showoo tuneti Baabloon biin deebemmo taane; tunebaani are katemeen beegaanoon aroochaa qitemmone.

¹⁴ Bi guudoona beeti bi gaacheenaꞌonaa bi ginee naayinaꞌo bullinon kaatti kaatta shaccemmo taane; goraadoon kaaciree boonoshin yookkemmo taane.

¹⁵ “Aageteenaꞌo daggooch boonoshin ta shaciyooba, showee toommoochoo boonoshin ta yoohiyooba, Doono Yeeri ta tunoon ariyemminaꞌone.

¹⁶ Tunebaani boonoshi hammiti aageteenaꞌo daggoochaa ciigiiti boonoshi mooyichon boonoshi shalligemmoyich, boonoshi daggoochee giishecheenaꞌon goraadoochee, shaacoonaa biiyoonoochee quye echiyemmo taane; ebiyooba Doono Yeeri ta tunoon ariyemminaꞌone” iye.

Keqqoona Qewemmi Keemechochi Malletoo

¹⁷ Doono Yeeri taach ishichiye:

¹⁸ “Ashi bushoocho, ne maayoon keqqoona mame; aaconoo shati qewebee uye!

¹⁹ Showee toommeexi macceenaꞌoyich ishichibe: ‘Nuggishoo Doono Yeeri Israꞌeelee showee daggooch, Yerusaalem beetinaꞌoyich ishichii beetone: “Arooch beetinaꞌochi xuꞌee naboona showoo shokko echemmo bi tunetoyich, boonoshi maayoon shatona maayemminaꞌone; aaconoo xuuxoona uchemminaꞌone.

²⁰ Asho beebee echeti katemeenaꞌo aalleminaꞌone; showoo shokkoon echemmone; ebiyooba Doono Yeeri ta tunoon ariyemmo ittoshine” itone’ gete” iye.

Gaawe Shaahiyoonaa Shicheti Keemee Qaaroona

²¹ Aroochee Doono Yeeri taach ishichiye:

²² “Ashi bushoocho, Israꞌeelee showeechon, ‘Yemeeno genjetone; yaaꞌoo bulli naayitone’ ittoshi ii beeti ebi shaahiyee yibbaatoo amoone?

²³ Ebich boonoshich ishichibe: ‘Nuggishoo Doono Yeeri ishichiye: Ebi shaahiyee yibbaatoon echiyemmo taane; ebiyee bekk Israꞌeelee showoochaa getteyaachemmone’ gete. Boonoshichoo ‘Yaaꞌoo bulli ceennemmi aabo katinnitone.

²⁴ Ebiyoo, ebiyee bekk Israꞌeelee asheenaꞌo daggooch koote yaaꞌoo woyee muriciyechi qaaxo daneyaachemmo bi tunetoyichiye.

²⁵ Tunebaani Doono Yeeri ta gettemmo taane; ta gettemmi qaaroo tatoona ceennemmone; hini hukkechi macceenaꞌote, ta gettemmo bullin ittoshi yemeenooch ceechemmo taane, iye Nuggishoo Doono Yeeri’ gete” iye.

²⁶ Andoo Doono Yeeri taach ishichiye:

²⁷ “Ashi bushoocho, ebiyoche Israꞌeelee macceenaꞌo ‘Ebi bi beeggiibeeti yaaꞌoo batt meeti yemeeneechone; bi keemmii beetoo wohi yemeeneechoniye’ ii beetinaꞌone.

²⁸ Ebich boonoshich ishichibe: ‘Nuggishoo Doono Yeeri ishichiye: “Ta qaaro ceennemmone; ebiyee bekk ta qaaroochee yagemmo amolla aalloone” iye Nuggishoo Doono Yeeri’ gete” iye.