Hiziqeeli 11 - Kafa Linguistics Project

Israꞌeelee Ukkireenaꞌo Toommooch Nalleeti Nalloo

¹ Ayaano kaama taan tiijjiye; aroochee Doono Yeerichi yaafee kechi aabi-keyo waani kellooch taan deebiye; tawoo uxeree kellooch beeti hiyaa uuche asheenaꞌon beeggeho; boonoshi daggoochoo macceenaꞌochi ukkireenaꞌo tuneti Azuurichi bushoo Yazaniyinaa Beenayichi bushoo Felaaxiyina beemon beeggeho.

² Doono Yeeriyoo taach ishichiye: “Ashi bushoocho, ebi asheenaꞌo gonde mooyon yamii beetinaꞌone; hini katemee asheenaꞌoyichoo gonde mooyon koccii beetinaꞌonane.

³ ‘Kexon wochi no haggemmi aabo katino toone? Hini katemee qondeene; nowoo meeno noone’ itinaꞌone.

⁴ Ebich ashi bushoocho, keemoon boonoshi toommooch keembe; keemoon keembe” iye.

⁵ Doono Yeerichi Ayaano ta toommooch kindiꞌi taach ishichiye: “Doono Yeeri ishichiye gete: Israꞌeelee macceenaꞌote, ebi mooyon gettito ittoshine; tawoo ittoshi mullooch beeton ariibeeto taane.

⁶ Hini katemooch ashi dubenoon meechito ittoshine; bi gomminaꞌoochoo dubenoon ceechito ittoshine.

⁷ “Ebich Nuggishoo Doono Yeeri ishichiye: Qondooch beeti meeno, hini katemee daggoochaa ittoshi wuxiti asheenaꞌochi dubenoone; hini katemoo qondoone; tunebaani bi daggoochee ittoshin yoohi kichemmo taane.

⁸ Ginoon shattito ittoshine; tawoo ginoon ittoshi toommooch deebemmo taane, iye Nuggishoo Doono Yeeri.

⁹ Bi daggoochee ittoshin kichemmo taane; ashi showee asheenaꞌochi kishooch ittoshin beshiiree immemmo taane; ittoshi toommoochoo naxoon kindiyemmo taane.

¹⁰ Ginoona dihemmo ittoshine; Israꞌeelee showee daaroochaa ittoshi toommooch nallemmo taane; ebiyooba Doono Yeeri ta tunoon ariyemmo ittoshine.

¹¹ Hini katemoo ittoshich qondoo tuneyaachemmone; ittoshiyoo bi daggoochaa meeno tuneyaachemmo ittoshine; tawoo Israꞌeelee daaroochaa ittoshi toommooch nallemmo taane.

¹² Ittoshi guudoona beeti aageteenaꞌo sheeroon quyehotalli ta qociyoona hamaano ittoshi tunetoyich, ta getoon quyo ittoshi qajjitoyich, ebiyooba Doono Yeeri ta tunoon ariyemmo ittoshine” iye.

¹³ Ebi keemoon ta keemmemmona Beenayichi bushoo Felaaxiyi qitiye; tawoo baroona showooch guufeechaa “Yeeh, Nuggishoo Doono Yeero, iberoochaa Israꞌeelee curoon aallii ciichiyane ne ii beeto?” iyaꞌa qaaroon oogichaa cookiyo.

Keccetinaꞌoyich Yeeri Gibenikkiti Gibeno

¹⁴ Doono Yeeri taach ishichiye:

¹⁵ “Ashi bushoocho, Yerusaalem beeti asheenaꞌo bulla, ne maneenaꞌo, ne xibeenaꞌo, ne asheenaꞌonaa Israꞌeelee macceenaꞌo bullina, ‘Doono Yeer waanee wokkitinaꞌone; hini showoo iristo tuniitaa nooch ichetone’ itinaꞌone.

¹⁶ “Ebich boonoshich ishichibe: ‘Nuggishoo Doono Yeeri ishichiye: Ta, aageteenaꞌo waan boonoshin daachiito taane; showeenaꞌoochoo boonoshin shacceto taane; tunebaani boonoshi hammiti showeenaꞌoochaa giisheche aaboon boonoshich yaafee kexon tunemmo taane itone.

¹⁷ “ ‘Ebichoo Nuggishoo Doono Yeeri ishichitone: Aageteenaꞌo daggoochee, shaceꞌi ittoshi beeti showoo bulliichee ittoshin kicemmo taane; Israꞌeelee showoonoo ittoshich immemmo taane itone’ gete.

¹⁸ “Arooch boonoshi waahooba ciigiitonaa eeꞌoona tuneti mooyon bi daggoochee wokkiyemminaꞌone.

¹⁹ Qoodeyaani mulloon boonoshich immemmo taane; boonoshi kashooch andire ayaanoon kotiyemmo taane; xaqqoommi boonoshi mulloon kichiichi meechi mulloon boonoshich immemmo taane.

²⁰ Ebich ta qociyoommona shaaddemminaꞌone; ta getonoo quyemminaꞌone; aroyichoo deꞌa gettemminaꞌone; boonoshiyoo ta asheenaꞌon tunemminaꞌone; tawoo boonoshi Nuggishoon tunemmo taane.

²¹ Tunebaani boonoshi mulloona ciigiitonaa eeꞌe mooyonon dabbitinaꞌon boonoshi shuunoommon boonoshich qoccemmo taane” iye Nuggishoo Doono Yeeri.

Yeerichi Oogee Yiiroo Yerusaalemee Tiyii Hamo

²² Aroochee kiruubeenaꞌo boonoshi qoshoon yaggiyeete; gengeenaꞌoo boonoshi gaꞌooch beetinaꞌone; Israꞌeelee Nuggishoochi oogee yiiroo boonoshi tookk beetone.

²³ Doono Yeerichi oogee yiiroo katemee daggoochee tiyii hammiꞌi, katemee aabi-keyo waan beeti guudi toommooch kotehe.

²⁴ Ebi taach bekketi yaaꞌoona Yeerichi Ayaano taan kaama tiijjiꞌi Baabloonee showooch beeti keceenaꞌo waan deebiye. Aroochee ta beeggeti yaaꞌoo ta waanee kuxehe.

²⁵ Tawoo Doono Yeeri taach bekkiiti mooyo bullin keccetinaꞌoyich getteho.