Hiziqeeli 10 - Kafa Linguistics Project

Yeerichi Oogee Yiiroo Yaafee Kexoochee Woho

¹ Ciinnaa ta iyaa, ebiyoche kiruubeenaꞌochi qelloyee tookk beeti gumoyee tookk, sapiiroochee shuuneeti taatee qeenoommi mooyo beete.

² Doono Yeeri, muttee tuppoochee shippeti tahoon taheti ashoyich ishichiye: “Kiruubeenaꞌochi dechiich beeti gengeenaꞌochi daggooch hamiree, boonoshi gutte daggooch beeti qaaqqee bunoochee ne kishee ceenon ushe; katemee toommoochoo shace” iye. Uroo ta ciinnaa beetaa hammiye.

³ Uro bi giyaahaa kiruubeenaꞌo yaafee kechi deshi-waan neexeꞌi beeteete; maaci addibaaboochoo qubo ceenniye.

⁴ Aroochee Doono Yeerichi oogee yiiroo kiruubeenaꞌochi toommoochee yaafee kechi kellooch hammiye; qubo kexooch ceenniye; addibaaboo Doono Yeerichi oogee yiiree phaqqoona ceenniye.

⁵ Kiruubeenaꞌochi qosheenaꞌoochee kechiibeeti qaaro maachi addibaabooch beddaahaa waayeehe. Ebi qaaro Beshe Hakkechi Yeerichi yibbaatee qaaroommone.

⁶ Muttee tuppoochee shippeti tahoon taheti uroon “Kiruubeenaꞌochi dechiich beeti gengeenaꞌo daggoochee qaaqqoon daambe” bi getaa hammiꞌi gengee gaꞌooch neexehe.

⁷ Ikke kiruubo bi kishoon kiruubeenaꞌo daggooch beeti qaaqqoo waan daachiiꞌi giisheche qaaqqoon tiijjii muttee tuppoochee shippeti tahoon taheti uroochi kishooch geddiye; uroo yechiꞌi kechiye.

⁸ Kiruubeenaꞌo boonoshi ikkikkoona ashi kishoommi kishoo boonoshi qoshee dechiich beetone.

⁹ Tawoo ciinnaꞌa arooch ikkikke kiruubee gaꞌooch ikkiikkoo tuneꞌi beeti awudde gengoon beeggeho; gengeenaꞌochi malleto wacciibeeti kirisilooboommone.

¹⁰ Awuddeenaꞌochi malletolla shaahoone; gengoo bi ikkikkoona bare gengee daggooch kocee kotetoniye bi shaahiibeeto.

¹¹ Boonoshi qaxirii beegaata guuddii wotteyaanoon awudde kaattoonolla qaxiriyeete; gengoo hammimmooch bareenaꞌoo hammiyeete.

¹² Boonoshi gubbooch, kishooch, qoshooch, ebi awuddeenaꞌochi gengooch beddaahaa boonoshi achooch aafo ceennitone.

¹³ Geengeenaꞌo ta waayaa beetaa, “Geengeebeeti gengeenaꞌo” getaa ceekkeheete.

¹⁴ Ebi kiruubeenaꞌo boonoshi ikkikkoyich awudd awudde shaahoo beetone; batti batticho bi shaahiibeeto kiruuboon, guttinnoo ashoon, keejjinnoo daaheroon, awuddinnoo booyon shaahoone.

¹⁵ Kiruubeenaꞌoo kaama tiyiyeete; eboshiyoo Kebaari aachi gashoochaa ta beeggeti kashechi halleenaꞌone.

¹⁶ Kiruubeenaꞌo hammimmona, gengeenaꞌoo boonoshi gaꞌoona hammiyeete; kiruubeenaꞌo showoochee kaama tiya boonoshi qoshoon boonoshi yaggimmona, gengeenaꞌoo boonoshi gaꞌoochee badd wotteyaaneenaꞌone.

¹⁷ Kashechi halleenaꞌochi ayaano gengeenaꞌooch bi beetoyich, kiruubeenaꞌo neexemmona boonoshiyoo neexee beeheete; kiruubeenaꞌo tiyimmona boonoshiyoo tookkii tiyii beeheete.

¹⁸ Doono Yeerichi oogee yiiroo yaafee kechi kelloochee tiyiꞌi, kiruubeenaꞌo tookk neexehe.

¹⁹ Ebin ta ciinnaa beetaa, kiruubeenaꞌo boonoshi qoshoon yaggiꞌi, showoochee tiyii hammiyeete; gengeenaꞌoo tookkii tiyii hammiyeete; Doono Yeerichi yaafee kechi uxeree aabi-keyo waani kellooch neexeheete; Israꞌeelee Nuggishoochi oogee yiiroo boonoshi tookk beetone.

²⁰ Eboshi Kebaari aachi gashoochaa Israꞌeelee Nuggishoyee deshi qach ta beeggeti kashechi halleenaꞌone; tawoo kiruubeenaꞌo boonoshi tunoon ariiho.

²¹ Boonoshi ikkikkoyich awudde shaahoonaa awudde qoshoona beetone; boonoshi qoshee dechiich ashi kishoommi kishoo beetone.

²² Boonoshi shaahoo Kebaari aacoochaa ta beeggeti kashechi halleenaꞌochi shaahoommone; boonoshi ikkikkoona kaamooch aaf qaxirii beeheete.