Hiziqeeli 1 - Kafa Linguistics Project

Hiziqeelich Bekketi Batti Batti Yaaꞌoo ( 1:1–7:27 ) Yeerichi Taatee Qeeno Bekko

¹ Shaashinnee natooba, awuddinnee agenee uuchinnee qemooba Kebaari aachi gashooch, keccetinaꞌo daggooch ta beetaa shimaayoo qecheetaa Yeerichi yaaꞌoon beeggeho.

² Ebi ageno giyiti uuchinnee qemooba, ebiyoo taatoo Yoyakiini kecceti uuche natooba,

³ Doono Yeerichi qaaro Kalideenaꞌochi showoochaa, Kebaari aachi gashoochaa, Buuzichi bushoo tuneti qeeshoo Hiziqeeli ta waan waahe; Doono Yeerichi giidoo aroochaanoo ta toommooch waatone.

⁴ Ciinnaa ta iyaa, ebiyoche dambi-waanee yubee yongo waa beete; ooge quboochee phaqqoo phaqqiye; bi guudoona beeti shimaayoo aaxxehe; bi gutte daggoochaa gooshoommi mooyo waccii aaxxehe.

⁵ Bi daggoochoo boonoshi halloo ashoon shaahe kashechi awudde halleenaꞌon beeggeho.

⁶ Boonoshi ikkikkoyich awudd awudde aafeenaꞌonaa awudd awudde qosheenaꞌona beetinaꞌone.

⁷ Boonoshi baateenaꞌo kaameenaꞌone; boonoshi shanekkoo maamochi shanekkoommone; ebi shanekkoo yoppheeti gooshoochoommon waccii beetone.

⁸ Awudde baddi boonoshi qosheenaꞌochi dechiich ashi kishoommi kisheenaꞌo beetinaꞌone. Ebi awuddeenaꞌoyichona aafeenaꞌonaa qosheenaꞌona beetinaꞌone.

⁹ Boonoshi qosheenaꞌo ikkoo baroochona danee beetone; okk hach guudaanoon boonoshi ikkikkoona kaamooch aafi qaxirii beeheete.

¹⁰ Boonoshi shaahoo, aafaa ashoommo, qanne baddaa daaheroommo, yooche baddaa gattoommo, gubbaa booyoommone.

¹¹ Boonoshi shaahoo ebiyoommone. Ebi halleenaꞌochi gutti gutte qoshoo damba yaggeechii ikkoo baroochona danee beetone; bare gutti gutte qoshoo boonoshi achoon qerii beetone.

¹² Ebi halleenaꞌo boonoshi ikkikkoona kaamooch aafi qaxirii beeheete; boonoshi hammii beegaata okk hach guudaanoon ayaano hammimmo bulliich hammii beeheete.

¹³ Kashechi halleenaꞌo daggooch aaxxee gecheti qaaqqoommi mooyo, wotta boonoshi daggooch okk hach xeelliibee conjiibeeti conjoommi mooyo beetone; qaaqqoo tobbimoone; xeeyoo aroochee xeejjii beehe.

¹⁴ Kashechi halleenaꞌo xeeyo xeeyoommon okk hach xeejjiyeete.

¹⁵ Ebi kashechi halleenaꞌon ciinnaa ta iyaa kashechi awudde halleenaꞌo boonoshi ikkikkoochi gaꞌooch gengoo showooch beeton beeggeho.

¹⁶ Geengeenaꞌochi shaahoonaa halloona kirisiloobeechoommon waccii beetone; awudde gengeenaꞌolla shaaheenaꞌone; boonoshi halloo, ikke gengoo bare gengee daggooch kocaa kotetoniye bi shaahiibeeto.

¹⁷ Boonoshi qaxirii beegaata, guuddii wotteyaanoon awudde kaattoonolla qaxiriyeete.

¹⁸ Geengeenaꞌochi guude goco genjoonaa shattiitonane; awudde gengeenaꞌochi guude gocooch aafo ceennitone.

¹⁹ Kashechi halleenaꞌo hammimmona gengeenaꞌo tookkii hammii beeheete; kashechi halleenaꞌo showoochee kaama tiyimmona gengeenaꞌoo tookkii tiyii beeheete.

²⁰ Ayaano hammimmo aabiichona halleenaꞌona tookkii hammii beeheete; kashechi halleenaꞌochi ayaano boonoshi maac bi beetoyich, gengeenaꞌo boonoshina tookkii tiyii beeheete.

²¹ Kashechi halleenaꞌochi ayaano gengeenaꞌochi maac bi beetoyich, halleenaꞌo shuurimmona gengeenaꞌo tookkii shuurii beeheete; boonoshi neexemmonoo tookkii neexee beeheete; showoochee kaama boonoshi tiyimmonoo tookkii tiyii beeheete.

²² Kashechi halleenaꞌoyee damba, boonoshi tookk yaggeeti gumoommi, baderoochoommonoo wacciibeeti mooyo beetone.

²³ Gumoyee deshaa boonoshi qosheenaꞌon, ikkoon baroo waan wochiꞌi yaggitinaꞌone; boonoshi ikkikkoyich boonoshi achoon qeremmi gutti gutte qoshoo beetone.

²⁴ Boonoshi hammii beegaata boonoshi qoshee qaaro ooge aachi qaaroommo, Beshe Hakkechi Yeerichi qaaroommo, meeti ginee naayinaꞌochi qaaroommo bi tunoon waayeho. Boonoshi neexee beegaata boonoshi qosheenaꞌon qoddii beeheete.

²⁵ Boonoshiyee damba beeti gumoochee qaaro waayee beehe; boonoshi neexee beegaata, boonoshi qoshoon qoddii beeheete.

²⁶ Boonoshiyee damba beeti gumoyee tookk sapiiroommi taatee qeechi shaahiyoo beetone; taatee qeechi toommoochoo ashoon shaahoo kotetone.

²⁷ Biyoo shimetoyee damba qaaqqee aaxxoommon aaxxeebeeti gaame xuuroommo, shimetoyee desh aaxxeebeeti qaaqqoommone; bi guudoochoo tobbimiti bekko beetone.

²⁸ Bi guudoonoo beeti phaqqoo amichi goorooch qubee daggoochaa bekkeebeeti ximbittoommone. Doono Yeerichi oogee yiiroo bi bekketo eechiꞌiniye; ebin ta beegiyooba baroona showooch guufeho; aroocheenoo yibbaatee qaaroon waayeho.