Hibireena'o 9 - Kafa Linguistics Project

Showoochaa Shimaayoochaanoo Yeerich Maddoo

¹ Aafi wogoyich wotta Yeerich maddee doyoonaa hini showeexi yaafee kexona beetone.

² Gutte gatoona kucheti duukkaanoo xogeetone. Duukkaanee ikke kuxi Yaafe Xaaꞌoo getteetooch maqirajjoonaa Yeerich giddeebeeti deejjee kosho arooch beeti madelloona beetone.

³ Maccillaatoyee bekk beeti maaci gato Yaafe Xaaꞌeexi Yaafoo gettee beehe.

⁴ Ebi are xaaꞌooch ixaano shookkeebeeti deejjee qiico beetone; ebi deejjee qiico aachoona dikkeetone; wotta bi guude gawo bulli aachoona dikkeeti wogee taaboote beetine; ebi taabootee daggooch mannoo beeti aachee qullo, atee waajjeti Haroonichi gumbeenaa Yeerichi sheeroo kooreeti gutte xaqqeenaꞌona beetinaꞌone.

⁵ Ebi are taabootee toommooch axaaxoon maariyee guufoon boonoshi qoshoona yiireebeeti, gutte Yeerichi oogee yiiree kiruubeenaꞌo beetinaꞌone. Ebi boonoshi ikkikkeenaꞌochon getoyich and hakkaachone.

⁶ Ebi bulliyoo ebiyoommon qanniꞌi bi beetaa, qeesheenaꞌo boonoshi maddee doyoon ceechiibee, bulli aaboon duukkaanee daggeexi kelli badd giyii beetinaꞌone.

⁷ Tunebaani duukkaanee daggooch gati maac qeeshee guudo natooch ikke wottoon bi ikkeeto baach giyii beetone; biyoo biinnaa asheenaꞌona tuushoona shuuneti axaaxoyich deejjee damoon yeshaanoon giyaanoone.

⁸ Aafi duukkaanoo batt xogeeꞌi beetaa, shimaajj beeti Yaafe Xaaꞌeexi Yaafooch giijjiibeeti gommo batt qecheyaano bi tunoon Yaafe Ayaano ebiyoommona bekkii beetone.

⁹ Ebiyoo andi yemeenooch beetinaꞌoyich bekkiibeeti shaahiyoone. Ebiyoommon Yeerich giddeebeeti buuroonaa deejjoona Yeerich goyinneebeeti ashi mulloon xalliyoon hakkaanoone.

¹⁰ Ebiyoo, eboshi Yeeri bullin bi andiriimmi yemeenee wottoon tuneebeeti maayoonaa uyoonochi doyoo, baribare xallittinee doyoo tuneebeeti, maach bekkeebeeti ashittinee doyeenaꞌo baach boonoshi tunetoyichiye.

¹¹ Tunebaani Kiristoosi bi waanaa nooch shaggiti gaawe mooyoyich qeeshee guudo tunetone. Beshoonaa gaawetona, ashi kishoona shuuneyaani, ebi getoo hini halleeti showoochee tuneyaani duukkaanooch

¹² ikke wottoon ciichiꞌi, shimaayooch beeti Yaafe Xaaꞌeexi Yaafooch emmisheenaꞌonaa gubbeneenaꞌonochi damoona tuneyaanoon, bi hajjee damoona giyiye; arooch giyiꞌi bulli yemeenoon axaaxoochee biicheyoon nooch daniihe.

¹³ Qeesheenaꞌo eeꞌeti asheenaꞌochi ashittinoon xalliyoyich gubbeneenaꞌonaa emmisheenaꞌonochi damoon, ebiyoommon wotta gideree meeno miccii oojjiti tulloon boonoshi wucaa, ebi doyoo asheenaꞌon yaafemmo bi tunegaata,

¹⁴ kiinaallo tuneꞌi bulli yemeenoon beeyemmi Yeerichi Ayaanoona bi qelloon deejjoo tuniiꞌi Yeerich giddiiti Kiristoosichi damoo aabichiree beshoon beeyechi Yeerich no maddemmoyich, qitoo tuneti shuunoochee no mulloon xalliyemmo tunehe!

¹⁵ Ebich aafi wogo batt manjiꞌi bi beetaa, sheeroon shaaddetinaꞌon boonoshi shuuneti axaaxoochee biishe kichiya Kiristoosi qititoyich, Yeeri bi ceeggiti asheenaꞌoyich bi gibenikkiti bulli yemeenee iristoon boonoshi deqqemmoyich Kiristoosi andire wogee shoobbechone.

¹⁶ Ichebe getaa aanneeti mooyo beegaata, aanniti uro qitito bi tunoon manjiiꞌi ariyoo qaawiihe.

¹⁷ Ebich ikke asho bi aanniti mooyo manjoo bi tunemmo bi qititoyee gubb baachiye; tunebaani aanniti uro qitaani bi beetaa, bi aanniti aannoo amoonolla gaacaache.

¹⁸ Ebich aafi wogolla damoonane bi diireeto.

^19-20 Muusiyoo shiichiꞌi sheerooch kooreeti mooyo bullin asheenaꞌoyich gettiye; aroyee gubb maaminaꞌochi damoon[aa emmisheenaꞌochi damoonon] aacona bacciꞌi ceelle bagee eexona cucheti hisoophee michi waamona haccii yechiꞌi tiyii, “Yeeri ittoshin quyebote iꞌi bi gettiti wogoon manjiiti damoo hinine” iꞌi sheeree macaafoonaa asheenaꞌo bullinochi toommooch wuciye.

²¹ Ebiyoommon danee duukkaanoonaa maddee qiiceenaꞌo bullinochi toommooch damoon wuciye.

²² Sheerooch kooreetoommon, giisheche mooyoyee beshetaa bulli mooyo damoona xallehe. Damoo ufeyaanoon ashi axaaxoo maareyaache.

Deejjoo Tuneꞌi Ashi Axaaxoon Kiristoosi Wokkiyoo

²³ Illa shimaayooch beeti mooyinaꞌochi shaahiyeenaꞌo ebiyoommi gommona xallo boonoshich qaawiihe; tunebaani shimaayooch beeti mooyinaꞌo boonoshi qelloona ebi aroyee beshe deejjoona xallo boonoshich qaawiihe.

²⁴ Kiristoosi ashi kishoona shuuneeti Yaafe Xaaꞌooch, ebiyoo ibere yaafe xaaꞌeexi shaahiyoona tuneti xaaꞌooch giyaanoone; tunebaani shimaayooch giyiichii, and noocha iꞌi Yeeri aafooch giddetone.

²⁵ Qeeshee guudo gijjeenaꞌochi damoon yechiꞌi, Yaafe Xaaꞌeexi Yaafooch nati natona giyii beetone; tunebaani Kiristoosi shimaajj bi giyito, bi qelloon deejjoo tuniiꞌi wochii wochii giddiyoyich toonoone.

²⁶ Ebi tunesho gaata, hini alemo halleetoochee tiijjiree, wodde wottoon xuuxoon beego biich qaawiyeshone; tunebaani and yemeenee ciiro katinaa, bi qelloon beshii deejjoon tuniiꞌi, axaaxoon wokkiiya koshiyoo aalli ikke wottoon bekketone.

²⁷ Ikke wottoon qitemmo bi tuno asho bullich echeyaani mooyone; aroyee gubb Yeeri boonoshi toommooch nallemmone.

²⁸ Ebiyoommon Kiristoosi wotta meetinaꞌochi axaaxoon shaagga ikke wottoon bi qelloon deejjoo tuniiꞌi bi giddiitoyee gubb, axaaxoon shaagoyich tuneyaanoon, biin quyee beetinaꞌon wodiyoyich, boonoshicha getiree guttinnoon woyemmone.