Hibireena'o 8 - Kafa Linguistics Project

Qeeshee Guudo Nooch Beemo

¹ No gettaabeeti mooyoochee aafechi mooyo ebine: Shimaayooch oogee yiirechi Yeerichi qannooch koteti, ebiyoommi qeeshee guudo nooch beetone.

² Biyoo ibere duukkaanoo tuneti yaafee kexooch qeeshee guudo tuneꞌi maddee beetone; ebi duukkaanoon xogito asho tuneyaanoon Doono Yeerine.

³ Qeeshee guudo bulli bi ukkireebeeto buuroonaa deejjoonon Yeerich bi giddiyemmoyichiye; ebich hini are qeeshee guudo Yeerich bi giddiyemmi ikke mooyo biich beemo qaawiihe.

⁴ Aroo showee toommooch beeto bi gaata, qeeshoo tuneyaacheshone. Ebiyoo, sheeree doyoommon buuroonaa deejjoonon Yeerich giddiibeeti qeesheenaꞌo beetoyichiye.

⁵ Boonoshi maddeto shimaayooch beeti yaafee kechi shaahiyoonaa yiirittoona tunetoochaaniye; ebiyoo Muusi duukkaanoon shuuneya bi tiyihooba Yeeri biich, “Siini guudoochaa neech ta bekkiiti shaahoommon bullin ceechi ne tuniyemmoyich neen ariibe” bi itoyichiye.

⁶ Tunebaani and Yeeri gibenikkiti beshe gibenoona manjiti beshe wogoona Yesuusi shoobbecho bi tunetoommon, ebiyoommon Yeeri beshaa beshe qeeshee guudee maddoon biich immitone.

⁷ Aafi wogo shappaano gaata, guttinnee wogo qaawiyaacheshone.

⁸ Yeeri bi asheenaꞌo toommeexi gondoon ciinniꞌi boonoshich ishichitone: “Ebiyoche, Israꞌeelee macceenaꞌonaa Yihudee macceenaꞌona tookki andire wogoon ta giyemmi yemeeno woyemmone, iye Doono Yeeri.

⁹ Ebi wogo, ittoshi qaabbechinaꞌon Gibitsee yaabii kichoyich, boonoshi kishoon ta yeshiyooba, boonoshina tookkaa ta giyeti wogoommo toonoone. Boonoshin cikkii qajjehoye; ebiyoo, boonoshi ta wogoona manjaaneenaꞌo boonoshi tunetoyichiye, iye Doono Yeeri.

¹⁰ Ebi are yemeenoyee gubb Israꞌeelee macceenaꞌona tookki ta giyemmi wogo ebine, iye Doono Yeeri: Ta sheeroon boonoshi mullooch kotiyemmo taane; boonoshi mullee cilloochoo kooremmo taane; tawoo boonoshi Nuggishoo tunemmo taane; boonoshiyoo ta macceenaꞌo tunemminaꞌone.

¹¹ Asho koniyoona bi showee ashoon, asho koniyoona bi manoon ‘Doono Yeerin ariibe’ geti dojjaachemmone. Ebiyoo, giishoochee oogooch beddaahaa, bulliyona taan ariyemmo bi tunetoyichiye.

¹² Boonoshi xuꞌoon maaremmo taane; boonoshi axaaxoonoo wochinnoon gabaachemmo taane” itone.

¹³ Ebi wogoon, andiro bi getona aafichon geeno tuniitone getone; ebich geenetonaa baayetona aallemmi aabo katinnitone.