Hibireena'o 7 - Kafa Linguistics ProjectQeeshee Guudo Tuneti Meleekitsedeqi 1 Ebi Meleekitsedeqi Saalemi taatoonaa Beshe Nuggishoo Yeerich maddeebeeti qeeshoonane. Abrahaminaa bi aafee bushiisheenaꞌona awudde taateenaꞌon kochii wochiꞌi boonoshi wottehooba, Meleekitsedeqi Abrahamina tookkii daneꞌi biin diiriye. 2 Abrahami wotta keccii bi deebiti mooyo bulliichee, asraatoon Meleekitsedeqich immiye. Ebi Meleekitsedeqichi shigo shiichiꞌi “cadiqee taatoo” getteehe; baroo wotta “Saalemi taatoo” getteehe; ebi geto, “diggee taatoo” getone. 3 Meleekitsedeqichi nihoonaa indeenocho, bi shiijjee yoodoochoo kooreeti mooyo aalloone; bi shiijjeti aaboonaa bi qititi aaboonon gettiibeeti mooyo kooreyaanoone; tunebaani Yeerichi Bushoona shaahiitaa bulli yemeenoon qeeshoo tuneree beeyemmone. 4 Illa ebi uro am shaahe ooge uro bi gaata ciinote. Qaabbechinaꞌochi nihoo Abrahami keccii bi deebiti mooyoochee asraatoon biich immiye. 5 Boonoshi maneenaꞌo tuneti Israꞌeeleenaꞌo Abrahamichi gutenoochee kechitinaꞌo boonoshi tunetaanoona, qeesheenaꞌo tuneꞌi kaacheti Lewichi bushiisheenaꞌo boonoshi waanee asraatoon boonoshi kichiyemmoyich Muusichi Sheerooch kooreetone. 6 Meleekitsedeqichi shiijjeroo Lewi yaroochee toonoone; tunebaani Abraham waanee asraatoon deqqitone; Yeeri gibenee qaaroon bi gibenikkiti Abrahamin diiritone. 7 Diireebeeti asho diiriibeeti ashoyee desho bi tuno aricheti mooyone. 8 Ebi Lewichi yareenaꞌo tuneti qeesheenaꞌo, boonoshiyoo qitemmi asheenaꞌo tuneechii, asraatoon kichiiꞌi deqqii beetinaꞌone; tunebaani are asraatoon deqqiti Meleekitsedeqi kashoona beeto bi tunoon Yaafe Macaafoochaa miixeetone. 9 Ishichii geton hakkiyo: Asraatoon deꞌon hakkimmi Lewiyolla, Abrahami asraatoon imiyooba, biyoo wotta immitone. 10 Ebiyoo, Meleekitsedeqi Abrahamina bi danehooba, Lewi qaabbechi bi nihoo Abrahamichi gutenooch bi beetoyichiye. 11 Illa Muusichi Sheeroo Lewichi qeeshittinoona tookkii Israꞌeeleenaꞌoyich ichetone; ebi are qeeshittino shappaano bi tuneto gaata, Haroonichi qeeshittinoommon tuneyaanoon, Meleekitsedeqichi qeeshittinoommon tuneti bare qeeshoo gubbich amoyich qaawiihe? 12 Qeeshittino shaddee gaata, sheeroo wotta shaddeyoo echeyaani mooyone. 13 Ebi bulli bi mooyo getteeti aroo, bi yoodo baroone; ebi are yoodoochee qeeshoo tuneꞌi deejjoon Yeerich giddiyoona maddeto koniyoona aalloone. 14 No Doono Yesuusi Yihudi yoodoochee bi shiijjo arichetone; tunebaani Muusi qeeshoo tuneechon ebi yoodoochee bi gettiti mooyo aalloone. Kiristoosi Meleekitsedeqiyoommi Qeeshoo Bi Tuno 15 Hini mooyo beshaa beshoon xalle bekketo tunehe; Meleekitsedeqin shaahiibeeti, bare qeeshoo bekketone. 16 Biyoo ashi sheeroona tuneyaanoon, ciiro aalli kashoochee daneebeeti giidoona qeeshoo tunehe. 17 Yaafe Macaafo, “Meleekitsedeqi qeeshoo tunetoommi gommona ne bulli yemeenoon qeeshoo neene” iꞌi miixehe. 18-19 Muusichi Sheeroo ikke mooyinona ceeno tuniyaanoone; ebich yiingaalli, gaacaallo bi tunetoyich, are wonnee sheeroo echetone; tunebaani and Yeer waan noon giddiibeeti beshe gaawe gibeno ichetone. 20-21 Eboshi qeesheenaꞌo tuneꞌi boonoshi ukkirehooba, Yeeri wogo giyaanoone; tunebaani Yeeri Yesuusich, “Doono Yeeri ta ‘Ne, bulli yemeenoon qeeshoo neene’ iyaꞌa wogeto taane; ta heciyoon shaddaache” iꞌi bi gettiti wogoona qeeshoo tunetone. 22 Ebich ebi wogoona Yesuusi beshe andire wogee buushaaroo tunetone. 23 Ebi qeesheenaꞌo meetinaꞌo boonoshi tuneto, shuunee toommooch boonoshi yagaachemmoyich qitechi asheenaꞌo boonoshi tunetoyichiye. 24 Tunebaani Yesuusi bulli yemeenoon beeyecho bi tunetoyich, shaddeyaani qeeshittinee ukkirittino biich beetone. 25 Biyoo boonoshicha iꞌi shoobba bulli aaboon kashoona beetone; ebich wotta bi waanaa Yeer waan giddee beetinaꞌon andoo bulli yemeenoonoo wodiyoon hakkiye. 26 Yaafoo, bachaallo, muricaallo, axaaxechinaꞌoyee barito, shimaayoyee damba kechito, ebiyoommi qeeshee guudo nooch qaawiihe. 27 Bare qeeshee guudeenaꞌochoommon shiichiꞌi bi qelli axaaxoyich, gubb wotta asheenaꞌochi axaaxoyich qemi qemona deejjoon Yeerich giddiyoo biich qaawiyaanoone. Asheenaꞌochi axaaxoyich bi qelloon deejjoo tuniiꞌi Yeerich bi giddiihooba, ebi deejjoon ikke wottoon ceechiꞌi tuniitone. 28 Muusichi Sheeroo hakka guutoo tuneti ashoon qeeshee guudoon tuniiꞌi ukkiriihe; tunebaani Muusichi Sheeroyee gubb waati wogee qaaro, bulli aaboon ceeno tuneti Yeerichi Bushoon ukkiriihe. |
SIM International, 2020.