Hibireena'o 6 - Kafa Linguistics Project

^1-2 Kiristoosichi mooyon gettiibeeti aafi wocho, ebiyoo axaaxoochee xalliyoon hakkaani, gaacaalli doyoochee wotteꞌi, Yeeri toommooch mulloon tooꞌiyeechon, aacona afaalleyeechon, kishoon ashi toommooch kotiyeechon, qititinaꞌo timichon, Yeeri nallemmi bulli yemeenee nalleechon dojjoone. Ebi are aafi doyoon wochii wochii geton qayiichi, mullechi ariiti asheenaꞌoyich tunemmi doyooch beshebone.

³ Yeerichi daaggoo bi tunegaata, ebin tuniyemmo noone.

⁴ Ikke wottoon Yeerichi wocho iberoo bi tunoon ariitinaꞌon, Yeerichi wojjoochee quupphii beeggitinaꞌon, Yaafe Ayaanoochee qoodeyecho tunetinaꞌon,

⁵ Yeerichi qaaro gaaweto bi tunoon ariiꞌi, gubb woyemmi yemeenooch Yeeri taatemmi giidoon quupphii beeggitinaꞌon,

⁶ aroyee gubb qajjii wotteꞌi nookketinaꞌon, wochinnoon Yeer waan wochiꞌi boonoshin andiriyoo hakkeyaanoone. Ebiyoo, Yeerichi Bushoon wochinnoon boonoshi yooddii beetoyich, ashi aafoochoo boonoshi giishii beetoyichiye.

⁷ Wodde wottoon bi toommooch dihiibeeti amiyon uchaabeeti, biin gochii beetinaꞌoyich maayoon colliibeeti showee Yeer waanee diiroon danemmine;

⁸ tunebaani angixonaa guccinonon bi colliigaata, gaacaalleene; Yeerina uppeyaniye bi ii beeto; ciiroochaanoo qaaqqoona miccemmine.

⁹ Tunebaani ta shunechinaꞌote! Ittoshich ebiyoommi magge qaaroona ta gettetaanona, Yeerina wodiꞌi ittoshi daneti wojjoo beshaa beshoo bi tunoon xiishito taane.

¹⁰ Yeeri cadiqoone; yaafeenaꞌon ittoshi deggitoyich, and beddaahaanoo ittoshi deggii beetoyich, ittoshi shuuneti shuunoonaa biich ittoshi bekkiibeeti shunoonon batteyaache.

^11-12 Kiristoosi toommooch mullee tooꞌiyoonaa haaꞌiyoona Yeeri gibenikkiti mooyon woraashii beetinaꞌoommon ittoshi tunemmoyichalli, beenechinaꞌo ittoshi tunemmoyich ta qaatoo toonoone; are gibeno ceennimmi wottoon ittoshi ikkikkoo ebiyee aaf ittoshi kupphetoommon, ciirooch beddaahaa ittoshi kupphemmoyich qaataabeeto taane.

Yeeri Gibenikkiti Gibeno

^13-14 Yeeri Abrahamich bi gibenikkiyooba, “Iberoon neen diiremmo taane; ne yaroon meechemmo taane” iꞌi, biyee beshe baroo aallo bi tunetoyich, bi qelloona wochii wogehe.

¹⁵ Ebich Abrahami haaꞌiiꞌi ebi gibeno biich ceenaa danoon hakkitone.

¹⁶ Asheenaꞌo boonoshi wogee beegaata, boonoshiyee beshoochi shigoona wogeheete; boonoshi yibbaatoon wogoona manjiiꞌi boonoshi daggooch beeti hayo bullin wokkiiheete.

¹⁷ Ebich Yeeri gibenikkiti mooyon danemminaꞌoyich, bi gabiti gaboon shaddaachemmo bi tunoon xalla bekkiiya bi qaawitoyich, bi gibenikkiti gibenee toommooch wogoon daakkiye.

¹⁸ Illa hini are gutte mooyinaꞌo shaddeyaachemminaꞌone; Yeeri kootoone getaachemmi mooyinaꞌone; ebich no aafooch beeti gibenoon danoyich Yeerichi shoobooch giyeti no, oogeton goggemmo noone.

¹⁹ Shuuraanoon no beeyemmoyich, ebi no gibenaabeeti gibeno no kashoon quyee beetone; ebi are no gibeno Yesuusine; biyoo shimaajji yaafee kechi maaci Yaafe Xaaꞌooch maccillaatoon beshee giyitone.

²⁰ Meleekitsedeqi qeeshee guudo bi tunetoommon, Yesuusi bulli yemeenoon qeeshee guudo tuneꞌi, noyee shiichii arooch noocha iꞌi giyitone.