Hibireena'o 5 - Kafa Linguistics Project

¹ Qeeshee guudo bulli, asheenaꞌo shuuneti axaaxoon wokkiyoyich buuroonaa deejjoonon bi giddiyemmoyich, ashi daggoochee Yeeri biin kaacciꞌi, Yeerichi maddee shuunoo bullich asheenaꞌochi qoodoon neechiye.

² Ebi are qeeshee guudo bi qelloona wotta meeno taheti asho bi tunetoyich, tuushoo tuneꞌi muriccii beetinaꞌoyich ariqqoon hakkiye.

³ Ebich asheenaꞌochi axaaxoyich deejjoon Yeerich bi giddii beetoommon, bi qelli axaaxee deejjoon wotta giddiyoo biich qaawiihe.

⁴ Haroonin qeeshee guudo bi tunemmoyich kaaccito, Yeerine; Yeeri kaaccitoyee beshetaa, koniyoona qeeshee guudoon tunee oogoon bi qellich qaawi danemmo aalloone.

⁵ Ebiyoommon Kiristoosi wotta “Qeeshee guudo tunebona” iꞌi bi qelloon oogiyaanoone; tunebaani Yeeri biich, “Ne, ta Bushoo neene; hanaach neen shiyeto taane” iye.

⁶ Yaafe Macaafooch bare xaaꞌoochaa wotta, “Meleekitsedeqi qeeshoo tunetoommi gommona, ne, bulli yemeenoon qeeshoo neene” iye.

⁷ Yesuusiyoo hini showee toommooch bi beehooba, qitoochee biin wodiyoon hakkemmi Yeer waan oogeti cookoonaa acimoona corootoonaa qolloonon giddiihe; bi qelloon giishiiꞌi Yeerich bi hajjeetoyich, Yeeriyoo waayehe.

⁸ Amoommon Yeerichi Bushoo bi tunetaanoona, bi toommooch shaggiti qaaꞌi mooyona Yeeri tuniibe iti mooyo bullin tuniyoon doyiye.

⁹ Ebi bullin bi ceechitoyee gubb, biich deꞌa ii beeto bullich, bulli yemeenee wodoon immiibeeto tunetone.

¹⁰ Meleekitsedeqi qeeshee guudo tunetoommi gommona qeeshee guudo tuneꞌi Yeerina ukkiretone.

“Mullee Tooꞌiyoochee Gubb Wotteyaahote” Immi Shalligichoo

¹¹ Ebi moochichon no gettemmi wodde mooyo beetone. Tunebaani waayoyich ittoshi waamo qecheyaano bi tunetoyich, ittoshich biichii geto oogeti maggoone.

¹² And ebichi wottoon bareenaꞌon dojjiya bedo ittoshine; tunebaani ikke asho ittoshich Yeerichi qaaroon batt ikka getiree xepphooch beeti mooyinaꞌon bi dojjemmoyich wochinnoon ittoshich qaawiihe. Kupphe maayoon ittoshi maayemmi qoodoon gaggere bushiishoochoommon batt ittoshich qaawiibeeto ejjoone.

¹³ Batt ejjo biich qaawiibeeto bulli gaggeroo bi tunetoyich cadiqittinee doyoon ariyaanoone;

¹⁴ tunebaani kupphe maayo qaawiibeeto, gaawetonaa gondoonon bariiꞌi doyiti, mullechi, ariiti asheenaꞌoyichiye.