Hibireena'o 4 - Kafa Linguistics Project

Kashee Xaaꞌooch Yeerichi Asheenaꞌo Gimo

¹ Illa Yeeri no kashemmoyich imma bi gabiti xaaꞌooch no giyemmoyich gibeno nooch beetone; diqqich ittoshi daggoochee koniyoona bedaano tuneree bi daneyaachemmoyich shatone.

² Israꞌeeleenaꞌo barahooch boonoshi beehooba mishiraachee qaaro boonoshich getteetoommon, noochoo getteetone; tunebaani Yeeri toommooch mulloon tooꞌiyaaneenaꞌo boonoshi tunetoyich, boonoshi waayeti qaaro amoonolla boonoshich gaacaanoone.

³ Illa no mulloon Yeeri toommooch tooꞌiiti no, Yeeri no kashemmoyich imma bi gabiti xaaꞌooch giyaabeeto noone. Yeeri tuniiya bi gabiti gaboo alemo halleetoochee tiijjiꞌi ceeno bi tunetaanoona, Yeeri “ ‘Boonoshi kashemmoyich imma ta gabiti showooch ciroona giyaachemminaꞌone’ iyaꞌa kaaroona wogeto taane” bi itoommone.

⁴ Shabaattinnee qemichon Yaafe Macaafooch ikke xaaꞌoochaa “Yeeri showoonaa shimaayoonon halliꞌi, shabaattinnee qemooba bi shuuneti shuunoo bulliichee kashehe” itone.

⁵ Are xaaꞌoochaa wotta Yeeri “Boonoshi kashemmoyich imma ta gabiti showooch ciroona giyaachemminaꞌone” itone.

⁶ Illa shiichiꞌi mishiraachee qaaro boonoshich getaa waayetinaꞌo deꞌa getaache boonoshi itoyich, are boonoshi kashemmoyich Yeeri imma gabiti xaaꞌooch giyaaneenaꞌone; tunebaani arooch boonoshi giyemmoyich Yeeri daaggiti ikkikkeenaꞌo beetinaꞌone.

⁷ Ebin no ariibeeto, Yeeri hanaacha iꞌi ikke bare areddoon wochinnoon bi taajjetoyichiye. Wodde yemeenoyee gubb Yaafe Macaafooch Daawitichi noonoona ebichon gettiibee, “Hanaach Yeerichi qaaroon ittoshi waayegaata, ittoshi mulloon muumiyaahote” itone.

⁸ Yaasi boonoshin bi kashiito gaata, Yeeri aroyee gubb bare areddeechon getaacheshone.

⁹ Illa Yeerichi asheenaꞌoyich, shambetee kashoommi kasho batt echetone.

¹⁰ Yeeri gibenikkiti xaaꞌooch giyiti asho, Yeeri bi shuunoo bullin ciichiꞌi bi kashetoommon, biyoo wotta bi shuunoochee kashemmone.

¹¹ Illa ebi areenaꞌo deꞌa boonoshi getti qayi naboona boonoshi dihitoommon koniyoona bi dihaachemmoyich, Yeeri nooch bi immemmi kashee xaaꞌooch gimoyich kupphebone.

¹² Yeerichi qaaro beeyechonaa shuunee beetonane; gutte baddaa gayireeti goraadoyee beshe acone; kashoonaa ayaanoonochi daggooch, achee quumee kocoonaa haashoonochi daggooch hottii giyiꞌi, boonoshi barbarimmi wottoon kochii beetone; mullee gaboonaa qaatoonon gaxxii barbariiꞌi nallii beetone.

¹³ Halleeti mooyinaꞌo bulli Yeeri aafooch xalle bekketinaꞌoani, bi aafooch aacheeti, oppeeti ikke mooyolla aalloone; Yeeri aafoochaanane no shuuneti mooyo bullich no echeyemmo.

Yesuusi Bulliyee Beshiti Qeeshee Guudo Bi Tuno

¹⁴ Illa shimaayoon besheꞌi Yeer waan giyiti, bulliyee beshiti qeeshee guudo, Yeerichi Bushoo Yesuusi nooch bi beetoyich, no miixeti gibenoon manjiiree yeshone.

¹⁵ Axaaxoon baach shuuneyaachalli, bulli gommona noochoommon daabiloosi biin gondoon shuuniiya qiiccetaa beeggitone; ebich no maraato biich waayeyaani, qeeshee guudo toonoone.

¹⁶ Illa maaroon no danemmonaa nooch qaawiihooba noon gaachemmi wojjoon no deqqemmonoyich, wojjoon immiibeeti Yeerichi taatee qeechi aafooch gaabbaanoon giddebone.