Hibireena'o 3 - Kafa Linguistics Project

Muusiyee Yesuusi Besho Tuno

¹ Ebich noonna tookkii Yeerina ceekketi yaafe ta maneenaꞌote! Biin no gibenoon no miixeti mishiraachechonaa qeeshee guudoona tuneti Yesuusin gabibote.

² Muusi wotta Yeerichi asheenaꞌon yaabiibee bi tuniiti mooyo bullina gibeneeto bi tunetoommon, ebiyoommon Yesuusiyoo ebi shuunoyich biin iraashiiti Yeerich gibeneetone.

³ Kexon haggiibeeti asho ebi are kexoyee beshe oogo biich beemoommon, Yesuusiyoo Muusiyee beshiti oogee yiirecho bi tuno qaawiti mooyone.

⁴ Kexo bullich biin haggiti asho beetone; tunebaani bulli mooyon haggito Yeerine.

⁵ Muusi gubb Yeeri gettemmi mooyoyich miixoo tuneya Yeerichi kechi asheenaꞌo bulli daggooch aafee bushoochoommon gibeneetone.

⁶ Tunebaani Kiristoosiyoo Yeerichi kechi asheenaꞌo bulli toommooch bushoochoommon gibeneetone. No wotta noon aafo kupphiibeeti, geeciibeeti gibenoon [ciirooch beddaahaa manjiiꞌa] no yeshigaata, Yeerichi kechi asho noone.

Yeeri Toommooch Tooꞌaani Mullo Bi Beetaachemmoyich Qelloon Quyo

⁷ Ebich Yaafe Ayaano gettii beetoommon, “Hanaach Yeerichi qaaroon ittoshi waayegaata,

⁸ barahoochaa, phiree aabooba, hukkoon tiijjoona tunetoommon, ittoshi mulloon muumiyaahote.

⁹ Aroochaa ittoshi qaabbechinaꞌo taan phireheete; yeshi beeggoo iyeete. Aabbe naton ta shuuneti shuunoon beeggiyeete.

¹⁰ Ebich are shiijjeroon kaarehoye; ‘Bulli aaboon taan dabboon qajjiyeete; ta gommon ariyaaneenaꞌone’ iyoye.

¹¹ Ebiyoommon ‘Boonoshi kashemmoyich imma ta gabiti showooch ciroona giyaacheete’ iyaꞌa kaaroona wogehoye” itone.

¹² Ta maneenaꞌote! Beeyechi Yeerin qachiyemmi, Yeeri toommooch mullee tooꞌiyoon bajjemmi gonde mullo diqqich ittoshi daggoochee ikkoyichona bi beetaachemmoyich, ittoshi qelloon quyebote.

¹³ Tunebaani ittoshi daggoochee kittinnoo koniyoona axaaxoona dacheeree mulli manjoo bi tuneyaachemmoyich, “Hanaacha” getaa bi ceekkee beegaata, qemi qemona ittoshinaa ittoshina ikkoo baroon kupphiibe.

¹⁴ Shiichiꞌi nooch beeti gibenoon ciirooch beddaahaa manjiiꞌa no yeshigaata, Kiristoosicho tuneto bullin qoodeyecho noone.

¹⁵ Yaafe Macaafooch getteetoommon, “Hanaach Yeerichi qaaroon ittoshi waayegaata, ittoshi qaabbechinaꞌo Yeeri toommooch hukkoon boonoshi shuunehooba, boonoshi tuniitoommon, ittoshi mulloon muumiyaahote.”

¹⁶ Yeerichi qaaroon waayeechii, bi toommooch hukkoon shuunetinaꞌo aaboshine? Muusina yaabeeꞌi Gibitsee kechitinaꞌo bulli tooneenaꞌone?

¹⁷ Aabbe naton Yeeri boonoshi toommooch kaaretinaꞌo, aaboshine? Axaaxoon shuuneꞌi boonoshi dubeno barahooch dihii echetinaꞌo, tooneenaꞌone?

¹⁸ “Boonoshi kashemmoyich imma ta gabiti showooch giyaachemminaꞌone” iꞌi Yeeri wogeti asheenaꞌo, aaboshine? Biich deꞌa getaache itinaꞌo tooneenaꞌone?

¹⁹ Illa Yeeri toommooch mulloon tooꞌiyoon boonoshi qajjitoyich, Yeeri imma bi gabiti showooch gimon hakkaaneenaꞌo boonoshi tunoon beeggehone.