Hibireena'o 2 - Kafa Linguistics Project

Worganikkiibeeti Wodoo

¹ Ebich no waayeti mooyoochee muriciree no dihaachemmoyich, no waayeti mooyoyich beshoon no qelloon quyo nooch qaawiihe.

² No qaabbechinaꞌoyich maraakeenaꞌo gettiti qaaro manjoone; are qaaroon shaaddetonaa deꞌa getaache ito bullinochi toommooch tato tuneti bede nalloo nalleetone.

³ Ebich nowochi, ebiyoommi worganikkiti wodoon no qayenegaata, aabichiree muricon hakkehone? Ebi wodeechon shiichiꞌi gettito Doono Yesuusine; waayetinaꞌoo ebi iberoo bi tunoon nooch manjiitinaꞌone.

⁴ Yeeriyoo wotta worganikkiti malletoonaa gaakkechi shuunoonon, baribare gaakkechi mooyonoo bi shuunoona, bi qelloona bi daaggitoommon, Yaafe Ayaanee wojjoonoo qoodoona boonoshina tookkii miixetone.

⁵ Asheenaꞌo beeyemmi, gubb woyemmi andire showoon, aroo no gettaabeeti showoon maraakeenaꞌoyich hajjiyaanoone.

⁶ Tunebaani ikke asho Yaafe Macaafooch ikke xaaꞌooch ishichitone: “Biin ne gabemmoyich asho amoone? Woyee biich ne aaxxiyemmoyich ashi bushoo amoone?

⁷ Maraakeenaꞌoyee giisheche wottoon baach shappiihine; oogoonaa oogee yiiroonochi gubbichoon biich ukiihine;

⁸ bullin biyee deshoon tuniiꞌa biich hajjiihine” iꞌi miixetone. Bullin biyee deshoon tuniiꞌi biich bi hajjiihooba, ikke mooyonona echiyaanoone; tunetaa and bulli mooyo biich hajjeeto bi tunoon batt beegaano noone.

⁹ Tunebaani Yeerichi wojjoona asho bullich bi qitemmoyich, giisheche wottoon maraakeenaꞌoyee bi shappemmoyich tuneti Yesuusin, qitee xuuxoon bi beeggitoyich, oogoonaa oogee yiiroonochi gubbichoon uketon beeggehone.

¹⁰ Bulli mooyon halliti, bulli mooyo biich beeti Yeeri meeti bushiisheenaꞌon oogee yiirooch deeboyich, boonoshi wodee shimbo tuneti Yesuusin xuuxoon beegona beddito bi tunemmoyich bi tuniyoo tatoone.

¹¹ Yaafii beetonaa yaafee beetinaꞌo bullina ikke Nihoo Yeerichi bushiisheenaꞌone; ebichi naboyich Yesuusi “ta maneenaꞌo” iꞌi ceegoyich yeelleyaanoone.

¹² Ebich ishichiye: “Ne shigoon ta maneenaꞌoyich awaajjemmo taane; iitee daggoochaanoo neen shoddoona galletemmo taane” iye.

¹³ Daakkiꞌi wotta, “Yeerin gibenaabeeto taane” iye. Daakkiꞌinoo wotta, “Ebiyoche, taannaa Yeeri taach immiti bushiisheenaꞌona!” iye.

¹⁴ Illa ebi bushiisheenaꞌo meenon taheti asheenaꞌo boonoshi tunetoyich, Yesuusiyoo wotta boonoshichoommon meenon taheti ashoon tunehe. Ebin Yesuusi tuneto, bi qitoona ashoon wuxee hakkoo biich beeti daabiloosin ebi bi hakkoon bi mucciyemmoyichiye.

¹⁵ Wotta boonoshi beemi yemeeno bullin qitoon shatona guuchittinooch hajjeeꞌi beetinaꞌon biishe bi kichemmoyichiye.

¹⁶ Ebina Abrahamichi yaroon gaachehalli, maraakeenaꞌon toonoone.

¹⁷ Ebich asheenaꞌochi axaaxoon maariyoyich, Yeerich bi maddoona ariqqechonaa gibeneetona tuneti qeeshee guudo bi tunemmoyich, mooyo bullina bi maneenaꞌon shaahoo biich qaawiitone.

¹⁸ Yesuusi bi qelloona phireeꞌi xuuxoon bi beeggitoyich, and phireebeeti asheenaꞌon gaachoon hakkiye.