Hibireena'o 13 - Kafa Linguistics Project

Yeerin Emirikkoon Hakkeyemmi Gommo

¹ Ittoshinaa ittoshina manaamanoochoommon shunoona beebote.

² Iibbeenaꞌon iibbiyoon batteyaahote; ikkikkeenaꞌo ariyaanoon eechii iibbiibee Yeerichi maraakeenaꞌon iibbiitinaꞌo beetinaꞌone.

³ Boonoshina tookkii cucheton shaahiree cuchetinaꞌon gabibote; xuuxee toommooch beetinaꞌon ittoshi wotta boonoshichoommon xuuxee toommooch beeton shaahiree gabibote.

⁴ Asho bulli shaageyoon oogiibe; shunimaayeenaꞌonaa yahechinaꞌonochi toommooch Yeeri nallemmo bi tunetoyich, kenoonaa mecheena ikkoo baroyich gibeneetinaꞌo tunebeete.

⁵ Ittoshi beemo gijjee shunona tunaaye; ittoshich beeto baach beddiye. Yeeri bi qelloona “Neen gawukkaache; ciroona neen qayaache” itone.

⁶ Ebich aafee kupphoona, “Taan gaacheebeeto Doono Yeerine; shataache; asho taan amoon halleshone?” geton hakkiyone.

⁷ Yeerichi qaaroon ittoshich gettiti, ittoshi yaabii qeejjechinaꞌon gabibote. Boonoshi beemi qocoon ciiniree, Yeeri toommooch boonoshi mullee tooꞌiyoommon, ebiyoommon ittoshiyoo boonoshin shaahibote.

⁸ Yesuus Kiristoosi yiichoo, hanaachoo, bulli yemeenoonoo biine.

⁹ Baribare dallaawe doyoon dabbiree tate gommoochee kechaahote. No mullo manjemmo Yeerichi wojjoonalli maayoyich icheti doyoon quyoona toonoone; ebi doyoon quyee beetinaꞌo amee gaacoonolla daneyaaneenaꞌone.

¹⁰ Duukkaanoochaa maddee beetinaꞌo aroochee boonoshi maayemmoyich daaggeyaani deejjee gudo nooch beetone.

¹¹ Qeeshee guudo axaaxoon maariyoyich tunemmi gijjeenaꞌochi damoon Yaafe Xaaꞌeexi Yaafooch giddii beetone; ebi deejjoyich giddeti gijjeenaꞌochi meeno kaamboyee maach kichaa micciye.

¹² Ebich Yesuusi wotta bi hajjee damoona asheenaꞌon yaafiya katemee kelloyee maach kichaa xuuxoon beeggiye.

¹³ Illa no wotta, bi cooneetoommon cooneebee, kaamboyee maach, bi waan hambone.

¹⁴ Bulli yemeenoon beeyemmi katemoo hini showooch nooch aalloone; tunebaani gubbich woyemmi katemoon qaawaabeeto noone.

¹⁵ [Illa] bulli aaboon Yesuus waanaa Yeerich galletoon deejjoommon tuniiree giddiibone; ebiyoo Yeeri no Doono bi tunoon no miixee deejjoone.

¹⁶ Tunebaani gaaweton tuniyoon, ittoshich beetoochee bareenaꞌoyich qoodoonoo batteyaahote. Ebiyoommi deejjoon no giddiyoo Yeerin emirikkii beetone.

¹⁷ Ittoshin yaabii qeejjii beetinaꞌoyich deꞌa getote; boonoshi getoonoo waayebote; ittoshichon Yeeri aafoochaa echeyemminaꞌo boonoshi tunetoyich, tokketaalli aafoona qeyiibee ittoshin gabii beetinaꞌone. Boonoshich ittoshi deꞌa getigaata, boonoshi shuunoon emiroonalli ayinoona tuniyaachemminaꞌone. Ayinoona boonoshi tuniigaata, ittoshich amoonolla gaacaache.

¹⁸ Nooch corootibote; bulli mooyona gaawe qocoona beemon no qaawaa beetoyich, xalle mullo nooch beemon ariito noone.

¹⁹ Ittoshi waan kaate ta wottemmoyich ittoshi corootemmoyich manjii qollaabeeto taane.

Corootoonaa Galletoona

²⁰ Ufeti bi damoona bulli yemeenee wogoon manjiiti, bi bageenaꞌochi ooge Qiddoo tuneti no Doono Yesuusin qitoochee tiijjiti Diggee Nuggishoo,

²¹ bi daaggoon ittoshi tuniyemmoyich, gaaweto tuneti mooyo bullin ittoshich imbe; biin emirikkiibeeti mooyon Yesuus Kiristoos waanaa no bullina shuunebe. Yesuus Kiristoosichoo bulli yemeenoon galleto tunebe. Ameena.

Ciireexi Wocho

²² Ta maneenaꞌote! Ebin qaminona ittoshich koorito taane. Ebich ebi ta ciicoon haaꞌiyoona ittoshi waayemmoyich ittoshin qollaabeeto taane.

²³ No manoo Ximootiyoosi cuyee kexoochee biicheto bi tunoon ittoshi ariyemmoyich shunnoye. Kaateꞌi ta waan bi waagaata, biin yeshi ittoshi waan waaree ittoshin beeggemmo taane.

²⁴ Ittoshin yaabii qeejjii beetinaꞌo bullinaa yaafeenaꞌo bullinoyich ta diggiyoon getote. Xaaliyaanee kittinneenaꞌo ittoshin diggiitinaꞌone.

²⁵ Yeerichi wojjoo ittoshi bullina tookki tunebe.