Hibireena'o 12 - Kafa Linguistics Project

Yeeri No Nihoo Tuno

^1-2 Illa ebi shaahe miixeenaꞌo quboochoommon no guudoona boonoshi beetoyich, no wotta shaago bullin, kaafi noon yechemmi axaaxoonoo wokkiibone; no mullee tooꞌiyee shimboonaa tuggoonon tuneti Yesuusin ciinibee, noyee aaf beeti gommon haaꞌiyoona wocone. Biyoo gubb bi danemmi emiroon ciinniꞌi, masqalee toommooch qitoo yeelliibeeto bi tunetaanoona, yeelleyaanoon bi haaꞌiitoyee gubb and Yeerichi taatee qeenooch qanne badd kotetone.

³ Ittoshi qelloona taahiree gubb ittoshi echeyaachemmoyich, axaaxechinaꞌo bi toommooch deebiti ebi shaahe xuuxoon bi haaꞌiyoon gabibote.

⁴ Damoon ittoshi ukkimmi wottoon axaaxoona tookkii batt qiicceyaano ittoshine.

^5-6 Yeeriyoo bi hajjee bushiishoommon tuniiꞌi ittoshina tookkii bi yibbaateebeeti ciicoon batteyaahote: “Ta bushoochoo, Doono Yeeri bi shunnii beeton sheerii beetone; ‘Ta bushoone’ bi iton yexxii beetone. Ebich Doono Yeerichi sheeroon hoxeyaahine; kaaree ciiccii bi beehooba, taahiyaahine” itone.

⁷ Yeeri ittoshin sheerigaata, haaꞌiibote. Ebiyoo, Yeeri ittoshin bi hajjee bushiisheenaꞌoommon tuniyemmo bi tunetoyichiye. Bi nihoo biin sheeraani bushoo, konine?

⁸ Yeeri bi bushiisheenaꞌo bullin sheerii beetone; sheereyaanoon ittoshi beegaata, dabboo waati bushoommoani, bi hajjee bushoommo toono ittoshine getone.

⁹ Ebiyee aaf wotta noon sheeriibeeti no niheenaꞌo nooch beetinaꞌone; boonoshinoo oogiibeeto noone. Ebich wotta shimaajji no Nihoo Yeerich amoyich beshoon hajjeeꞌa kashoona beetaachone?

¹⁰ No hajjee niheenaꞌo gaaweto tuneꞌi boonoshich bi bekketoommon, bushaa no beetaa, noon sheerii beetinaꞌone; tunebaani Yeeri noon bi sheeriibeeto, bi yaafittinoochee no qoodeyemmoyich nooch bi gaaccemmoyichiye.

¹¹ Sheeroo bulli andich ayinikkii beetoani, emirikkiibeeto nooch shaahaanoone; tunebaani ebi sheeroona doyitinaꞌo bulli cadiqee shuunoon boonoshi shuunee beetoyich diggoona beeyemminaꞌone.

Kittinneenaꞌoyich Icheti Ciicoonaa Shalligichoona

¹² Ebich taahiti ittoshi kishoon, qeweebeeti ittoshi tingoonoo kupphiibote.

¹³ Hekkelleebeeti baatoo wodemmoyichalli, are bi hekkelleto waan dege bi echeyaachemmoyich, ittoshi baatoyich naqqe gommon qanniibote.

¹⁴ Asho bullina tookki diggoona beemon qaawibote; yaafeyaanoon Doono Yeerin beegon hakkemmo aalloone; ebich yaafittinoona beemoyich qaawibote.

¹⁵ Koniyoona Yeerichi wojjoon qayiree gubb bi wotteyaachemmoyich, meetinaꞌon eeꞌiyemmi, caammiibeeti xepphoommi amee mooyolla kaama diciree kittinnee guuphon bi xuuxiyaachemmoyich,

¹⁶ ittoshi daggooch yahiibeeti asho bi daneyaachemmoyich woyee ikke wottoon bi maayemmi maayoyicha iꞌi bi qaabbittinoon kemmiti Esayichoommon, yaafe mooyinaꞌon qallayemmi asho bi daneyaachemmoyich, ittoshi qelloon ariibot!

¹⁷ Aroyee gubb Esayi bi nihoochi diiroon daneya bi qaawitaanona, bi muccoon ariibeeto ittoshine; amoommon acimoon eeppii bi qolletaanona, ebiyee aaf bi shuuneti mooyon bi tachemmi gommo biich daneyaanoone.

¹⁸ Israꞌeeleenaꞌo boonoshi kishoona yeshon boonoshi hakkiibeeti Siini guudooch shagaano ittoshine; boonoshiyoo aroochaa micciibeeti qaaqqoon, magge yiiboon, manderoon, yongee yuboonoo beeggiyeete.

¹⁹ Tiree qaaroon, Yeerichi yibbaatee qaaroonoo waayeheete. Are Yeerichi qaaroon boonoshi waayeti hillooch Yeeri daakkiree bare qaaroon bi getaachemmoyich qolleheete.

²⁰ Ebiyoo, “Ebi Siini guudi achooch gijjolla tuneba bi shagigaata, xaqqoona yexaa qitibe” Yeeri iti getoon haaꞌiyoon hakkaaneenaꞌo boonoshi tunetoyichiye.

²¹ Bekkeebeeti mooyo oogichii shattiito bi tunetoyich, Muusi “Oogeton shattaꞌa qewaabeeto taane” itone.

²² Tunebaani ittoshi Tsiyooni guudooch, shimaayooch beeti Yerusaalem, beeyechi Yeerichi katemooch shaggito ittoshine. Humaa xume maraakeenaꞌo waan,

²³ boonoshi shigo shimaayooch kobereeꞌi bi waan emiroona kiceeti, Yeeri kaacciti bi bushiisheenaꞌo waan shaggito ittoshine. Wotta asho bullich bi shuuni shuunoommona nallemmi Nallecho tuneti Yeer waan, Yeeri boonoshin shappaalleenaꞌo tuniiti cadiqeenaꞌo waan,

²⁴ andire wogee shoobbecho tuneti Yesuus waan, Abeelichi damoyee beshiti mooyon gettiibeeti, wucaa xalliibeeti damooch shaggito ittoshine.

²⁵ Gettiibeeti Yeerin waayeyaache ittoshi getaachemmoyich ittoshi qelloon ariibote! Ebi areenaꞌo showee toommoochaa Yeeri gettiton waayeyaachone boonoshi iyooba, Yeerichi nalloochee muricaaneenaꞌone; ebich no wotta shimaayoochaa gettiibeeti Yeer waanee gubb no shoki gaata, aabichiree Yeerichi nalloochee muriccehone?

²⁶ Arooba Yeerichi qaaro showoon shuurikkiye; tunebaani “Wochinnoon ikke wottoon showoon baach tuneyaanoon, shimaayoonoo wotta shuurikkemmo taane” iꞌi hini yemeeneechon gettitone.

²⁷ Tunetaa wochinnoon ikke wottoon bi geto, shuuraachemmi mooyinaꞌo manjiree beeyemminaꞌo boonoshi tunoon, halleeti mooyinaꞌo shuuriree hidaa aallemminaꞌo boonoshi tunoon xalla bekkii beetone.

²⁸ Ebich shuuraachemmi taatittinoon deqqemmo no tunetoyich, Yeerin galletebone; biin emirikkiibeeti gommona oogii shatibee biich goyinnebone.

²⁹ Ebiyoo, iberoon no Nuggishoo michii aalliibeeti qaaqqoommo bi tunetoyichiye.