Hibireena'o 11 - Kafa Linguistics Project

Mulloon Yeeri Toommooch Tooꞌiyoo

¹ Illa Yeeri toommooch mulloon tooꞌiyoo geto no gibenaabeeti mooyon manjiyoo, no beegaani mooyonoo xiishoo getone.

² Wonnee yemeenooch beeti asheenaꞌo naadoon boonoshi daneto ebinane.

³ Yeeri alemoon bi qaaroona bi halloonaa ebich bekkeebeeti mooyo bekkeyaani mooyoochee halleeto bi tunoonon no shalligaabeeto, Yeeri toommooch no mulloon tooꞌiyoonane.

⁴ Abeeli mulloon tooꞌiyoona Qayeelichoyee beshe deejjoon Yeerich giddiihe; Yeeri Abeeli giddiiti ebi deejjoona emirito bi tunoon bekkiiꞌi, Abeeli cadiqo tunoon miixehe; Abeeli bi qititaanona, mulloon bi tooꞌiyoona hanaach beddaahaa nooch miixee beetone.

⁵ Henooki mulloon Yeeri toommooch bi tooꞌitoyich qitaanoone; qitaanoon kashoona bi beetaa, Yeeri biin daammitoyich, koniyoona biin danoon hakkaanoone. Yeeri biin daamoyee shiichiꞌi, biin emirikkito bi tunoon miixetone.

⁶ Asho koniyoona mulloon Yeeri toommooch tooꞌiyaanoon Yeerin emirikkoon hakkaache; Yeer waan giddeebeeti asho Yeeri beemon, biin qaawii beetinaꞌoyichoo bi wojjoon wojjiibeeto bi tunoon iberiyoo biich qaawiihe.

⁷ Noohi, Yeeri toommooch mulloon tooꞌiyoona batt bekkeyaan beeti mooyon Yeeri biich arichiitaa, Yeerin shattiꞌi biinnaa bi kechi asheenaꞌonon wodiyemmi markaboon shuunee qanniihe. Ebina aroobee yemeenooch beeti asheenaꞌochi gonde mooyon xalla bekkiihe; mullee tooꞌiyoona daneebeeti cadiqoon Yeer waanee danehe.

⁸ Abrahami iristo tuniiree bi deqqemmi xaaꞌooch bi ceekkehooba, mulloon Yeeri toommooch tooꞌiiꞌi deꞌa iye; amooch bi hammiibeeto gaata ariyaanoon kechiye.

⁹ Yeeri gibenikkaa bi hammiti showooch iibboo tuneꞌi duukkaanooch beehe; ebi Yeeri gibenikkiti gibenoon biinna tookkii qoodeyecho tuneti bi bushoo Yisaaqinaa bi bushoochi bushoo Yaaqobina tookkii shiqqoo tuneꞌi, Yeeri toommooch mullee tooꞌiyoona ebi are showooch kotehe.

¹⁰ Ebiyoo, bulli yemeenoon beeyechi tuneti, Yeeri yameꞌi bi shuuneti katemeen gibenoona quyeebeeto bi tunetoyichiye.

¹¹ Saari, gibenikkiti Yeeri gibeneeto bi tunoon iberiiꞌa, amoommon shimon hakkaani geenaa baayeti ure bi tunetaanoona, Yeeri toommooch mulloon tooꞌiyoona yeqqefoyich hakkoon danahan.

¹² Ebich wotta qititoommi asho shaahiti ikke uro Abraham waanee boonoshi haddoo shimaajji xojjenoommo, haddee ciyaani baharee gasheexi qacoommo tuneti asheenaꞌo shiijjeheete.

¹³ Eboshi bulli mulloon Yeeri toommooch tooꞌiichii, Yeeri gibenikkiti gibenoon daneyaanoon qitiyeete; tunebaani wohooch tuneechii ciinniꞌi emiriyeete. “Hini showee toommooch iibboonaa shiqqoona noone” iꞌi miixeheete.

¹⁴ Ishichii beetinaꞌo boonoshicho tuneti showoon qaawii beetinaꞌo boonoshi tunoon bekkii beetinaꞌone.

¹⁵ Are boonoshi kechiti showoon boonoshi gabito gaata, wottee hamon hakkeshinaꞌone.

¹⁶ Tunebaani beshoon, ebiyoo shimaajji xaaꞌoon qaatii beeheete. Ebich Yeeri boonoshi beeyemmi katemoon boonoshich qanniitone. Ebich Yeeri boonoshi Nuggishoo getaa ceekkoyich yeelleyaache.

^17-18 Yeeri “Abrahami eke taach bi qemon beegona” iꞌi, “Ikke ne bushoon taach deejjoon tuniiree deejjibe” bi iyooba, Abrahami Yeeri toommooch mulloon tooꞌiyoona “Yisaaqichi shiijjeroona ceekkemmo neene” iꞌi Yeeri gibenikkiti ebi are ikke bi bushoon Yeerich giddiihe.

¹⁹ Ebiyoo, Yisaaqi qititaanona, Yeeri biin qitoochee tiijjoon hakkemmo bi tunoon Abrahami iberiitoyichiye; ebina Abrahami Yisaaqin qitoochee tiyitoommi shaahoona danehe.

²⁰ Yisaaqi wotta mulloon Yeeri toommooch tooꞌiiꞌi, batt woyemmi mooyichon gettiibee Yaaqobinaa Esayinon diiriye.

²¹ Yaaqobi qitiya iꞌi mulloon Yeeri toommooch bi tooꞌitoyich, Yooseefi bushiisheenaꞌon boonoshi qelli qelloona diiriye; gumboon tugeꞌi Yeerich goyinnehe.

²² Yooseefi mulloon Yeeri toommooch bi tooꞌitoyich, qitiya beddiichii, “Israꞌeeleenaꞌo Gibitsee kechemminaꞌone” iꞌi bi shaawushoon aabichi boonoshi gettemmo gaata gettiye.

²³ Muusichi nihoonaa indeena Muusi shiijjetoyee gubb mallet gaawe bushoo bi tunoon beeggiꞌi, Yeeri toommooch mulloon tooꞌiyoona Gibitsee taatoo gettiti sheeroon shataanoon keejje agenoon aachiyeete.

²⁴ Muusi diccii bi oogetoyee gubb, Yeeri toommooch mulloon tooꞌiyoona “Farooni bushee bushoo getteyaache” iꞌi qajjiye.

^25-26 Gibitsee bi danemmi gaannoyee beshoon Kiristoosicha iꞌi hoxee qallayeyoo beshaa beshe gaanno bi tunoon gabitone. Axaaxoon shuunoona daneebeeti, andich baach tuneebeeti emiroyee Yeerichi asheenaꞌona tookkii xuuxoon beegon shunniye. Ebin bi shunniti naboo, bi danemmi gaacoon manjiiꞌi bi ciinnitoyichiye.

²⁷ Mulloon Yeeri toommooch bi tooꞌitoyich, Gibitsee taatoochi kaaroon shataanoon Gibitsee showoon qajjii kechii hammiye; bekkeyaani Yeerin bekkee beeton tuniiꞌi, “Gubb wotteyaache” iꞌi qaxiriye.

²⁸ Muusi bi mulloon bi tooꞌitoyich, wuxii aalliyechi maraakoo Israꞌeeleenaꞌochi qaabbi qaabboon bi wuxaachemmoyich, boonoshi kechi kellooch damoon boonoshi wucemmoyich gettiye; ebina ebi aaboon Beshee Baaroon boonoshi baaremmi baaree aabo tuniihe.

²⁹ Israꞌeeleenaꞌo Yeeri toommooch mulloon tooꞌiyoona Ceelle baharee gutte daggoona kuxxiꞌi shuuꞌi showoona kimmiyeete; tunebaani Gibitsee asheenaꞌo kimma boonoshi giyaa, baharee aaco boonoshin qooxxiye.

³⁰ Wotta boonoshi mulloon tooꞌiyoona Yaariki katemee xaqqee uxeroon shabaatte qemon boonoshi guudditoyee gubb, ebi are uxeroo dihiye.

³¹ Yahechi Rahaabi mulloon Yeeri toommooch tooꞌiiꞌa, Yaariki katemoon qiidi (maaci) boonoshi beeggemmoyich, Israꞌeeleenaꞌo waanee wochetaa waati asheenaꞌon diggoona bi kexooch bi iibbiitoyich, Yeerich deꞌa getaani Yaariki asheenaꞌona tookkaa aalleyaaneene.

³² Illa ama getote? Geediyoonichon, Baraaqichon, Samsoonichon, Yofitaahichon, Daawitichonaa Saameelichonon, keemechinaꞌochonoo, and gettaa ciichoon hakkaache.

³³ Ebi asheenaꞌo mulloon Yeeri toommooch boonoshi tooꞌitoyich, taatee showeenaꞌon kochii wochiyeete; dayinnetoona qeejjiyeete; Yeeri boonoshich gibenikkiti mooyon daneheete; daahereenaꞌochi gaakkoon hicciyeete;

³⁴ qaaqqee giidoon aalliiheete; goraadoona qitoochee muricciyeete; hakka guuteenaꞌo boonoshi tunetaanoona kuppheheete; ginee koyoona kuppheenaꞌo tuneheete; bare showee ginee naayinaꞌon kochii yookkiyeete.

³⁵ Genneenaꞌo qititi boonoshi xibeenaꞌo qitoochee tiyaa danetinaꞌone; tunebaani bareenaꞌo qitoochee andich muricon qajjiꞌi, “Qitoochee no tiyiyooba, beshe kashoon danemmo noone” getona qitooch beddaahaa yexxeheete.

³⁶ Bareenaꞌo cooneetinaꞌo tunoonaa yexxeyoona, ebiyee beshiton wotta qoqqaannoona cucheyoonaa cuyee kexooch xuuxoonon beeggiyeete;

³⁷ xaqqoona yexaa qitiyeete; magaazoona kappheeheete; goraadoona qitiyeete; bulli mooyon mucceebee, iritoon beeggiibee, xuuxeebeenoo bagoonaa emmishoonochi daroon taheꞌi guuddiyeete.

³⁸ Cadiqeenaꞌo boonoshi tunetoyich, boonoshi daggooch beemoyich hini alemee asheenaꞌo bedditinaꞌo tuneꞌi daneyaaneenaꞌone; ebich boonoshiyee bariꞌi oppoonaa kubbeexi gofoonooch qeyiibee, barahoonaa geppee toommonooch yallyallimii beeheete.

³⁹ Eboshi bulli Yeeri toommooch mulloon boonoshi tooꞌiyee naboona Yeer waanee naadoon danetinaꞌone; tunebaani Yeeri gibenikkiti mooyon daneyaaneenaꞌone.

⁴⁰ Danoon boonoshi qajjiti naboo, Yeeri beshe mooyon nooch bi gabitoyichiye; ebiyoo noonna tookkii tuno bi qayigaata, shappaalli ceeninaꞌo boonoshin tuniyaachemmo bi tunetoyichiye.