Hibireena'o 10 - Kafa Linguistics Project

¹ Israꞌeeleenaꞌoyich icheti sheeroo woyemmi gaawe mooyochi yiiritto baachalli, shimaayooch beeti ibere mooyinaꞌochi shaahoo toonoone. Ebich nati natona kuxaanoon boonoshi giddiibeeti deejjoona Yeer waan giddee beetinaꞌon are sheeroo axaaxaalleenaꞌon tuniyoon hakkaanoone.

² Ebin bi tuniito gaata, Yeerich goyinneebeeti asheenaꞌo boonoshi axaaxoochee ikke wottoon xalleshinaꞌone; axaaxoo boonoshi toommooch aallo bi tunoon ariyeshinaꞌone; ebiyee gubb, Yeerich deejjoon giddiyaacheshinaꞌone.

³ Tunebaani ebi deejjoo nati natona asheenaꞌoyich boonoshi axaaxoon shalligichii beetone.

⁴ Ebiyoo, gubbeneenaꞌonaa emmisheenaꞌonochi damoo axaaxoon wokkiyoon hakkaano bi tunetoyichiye.

⁵ Ebich Kiristoosi hini alemooch woya bi iyooba Yeerich ishichitone: “Deejjoonaa buuroonon qaawaano neene; tunebaani ashittinee quumoon qanniiꞌa taach immehine.

⁶ Micciibeeti deejjoonaa axaaxee deejjoonon, neech boonoshi giddiitaa neen emirikkaanoone.

⁷ Arooba ‘Ta Nuggishoocho, ebiyoche, macaafooch taacho bi kooreetoommon, ne daaggoon ceechiya waato taane’ iyoye” iye.

⁸ Shiichiꞌinoo ishichiye: “Asheenaꞌo giddiibeeti deejjoonaa buuroonon, micciibeeti deejjoon, axaaxoon wokkiyoyich neech boonoshi giddiibeeti deejjoon qaawaano neene; ebi aroonoo emiraano neene” iye. Eboshi bulli sheeroo gettii beetoommon biich giddee beetinaꞌo boonoshi tunetaanoona, Kiristoosi ishichii gettitone.

⁹ Wotta daakkiꞌi Yeerich ishichitone: “Ebiyoche, ne daaggoon ceechiya waato taane” itone. Ebich Kiristoosi wonnee deejjee doyoon echiiꞌi, ebi aree qoodoon bi qelloon bi giddiiti deejjoon keritone.

¹⁰ Ebina Yesuus Kiristoosi Yeerichi daaggoon ceechitone. Bi qelloon deejjoo tuniiꞌi Yeerich ikke wottoon bi giddiitoyich, axaaxoo bulliichee yaafeeto noone.

¹¹ Qeesheenaꞌo bulli axaaxoon ciroona wokkiyoon hakkaani ebi are deejjeenaꞌon wodde wottoon Yeerich giddiibee qemi qemona neexee maddee beetinaꞌone.

¹² Tunebaani Kiristoosi bulli yemeenoon axaaxoon wokkiyoon hakkemmi ikke deejjoon, ebiyoo bi qelloon deejjoo tunii giddiiꞌi, Yeerichi qanne badd kotehe.

¹³ Arooch beechii, biin shixxii beetinaꞌon bi baatooch Yeeri dichimmi wottoon quyee beetone.

¹⁴ Ebiyoo, ikke deejjoon Yeerich giddiyoona boonoshi axaaxoochee Yeerich yaafee beetinaꞌon bulli yemeenoon axaaxaalleenaꞌon bi tuniitoyichiye.

¹⁵ Yaafe Ayaano wotta ebichon nooch miixee beetone; shiichiꞌi ishichitone:

¹⁶ “ ‘Ebi are yemeenoyee gubb, boonoshina tookki ta giyemmi wogo ebine’ iye Doono Yeeri. ‘Ta sheeroon boonoshi mullooch kotiyemmo taane; boonoshi mullee cilloochoo kooremmo taane’ iye”

¹⁷ iꞌi bi gettitoyee gubb, “Boonoshi axaaxoonaa boonoshi xuꞌoonon wochinnoon gabaachemmo taane” itone.

¹⁸ Yeeri ebi axaaxoonaa xuꞌoonon bi maaritoyee gubb, axaaxoyich Yeerich giddemmi, deejjoo ii beeti mooyo ebiyee damba ciroona aalloone.

Yeer Waan Giddo

¹⁹ Illa ta maneenaꞌote! Ufeti Yesuusichi damoona Yeer waan Yaafe Xaaꞌeexi Yaafooch no giyemmoyich, aafee kupphoon daneto noone.

²⁰ Yesuusi bi qelloon deejjoo tuniiꞌi bi giddiitoyich, tippeeti maccillaatoyee besheree Yeer waan no giyemmi beeyechonaa andiroona tuneti gommon nooch qechiye.

²¹ Yeerichi kechi toommooch ukkiroo tuneti ooge qeeshee guudo nooch beeto bi tunetoyich,

²² no shuuneti axaaxoo no toommooch deebiibeeti mullee ittibatoochee xalloyich no mulloon wuceeree, no ashittinoon xalle aacona macheree, ibere mulloona Yeeri toommooch manjiti mullee tooꞌiyoona bi waan giddebone.

²³ Gibenikkiti Yeeri gibeneetone; ebich shuuraanoon manjiree no gibenaabeeti mooyon miixoon qajjaayone.

²⁴ Shunoonaa gaawe shuunoonoyich no qaallemmoyich noonnaa noonna ikkoo baroyich gabibe.

²⁵ Noonnaa noonna ikkoo baroon ciicalli, ikkikkeenaꞌo doyoo tuniiꞌi boonoshi qajjitoommon, ikkooch no kiceyoon qajjaayone; Doono Yesuusi wotteree woyemmi aabo katinnito tunoon shalligibee aafichoyee beshiiree ebin tuniibote.

²⁶ Mishiraachee qaaree iberoon no ariitoyee gubb, shunnaꞌa axaaxoon no shuunegaata, ebiyee damba no axaaxoon wokkiyoyich giddemmi bare deejjoo aalloone.

²⁷ Echeti mooyo bi beegaata, shattiibeeti Yeerichi nalloonaa Yeerin shixxii beetinaꞌon michi aalliyemmi giidechi qaaqqoonon quyo baachiye.

²⁸ Muusichi Sheeroon qallayiti asho gutte woyee keejje miixoo bi toommooch bi miixegaata, ariqqaalloon qitii beetone.

²⁹ Illa Yeerichi Bushoon qallayito, bi axaaxoochee bi yaafeeti, ebi andire Yeerichi wogoon manjiibeeti Yesuusichi damoon hoxeeti mooyoommon tuniiꞌi haddito, Yeerichi wojjoon bi daneti Yaafe Ayaanoon naaggito, amoon tunemmo ittoshich shaahii beete? Am shaahoon beshe shattii, giiriiti naxo bi toommooch kindemmo tunehe?

³⁰ “Gondoon shuunetinaꞌo toommooch nichoon kichemmo taane; bareenaꞌon boonoshi xuuxiitoommon, ta boonoshin xuuxiyemmo taane” iton, ebiyee wotta “Doono Yeeri ta, ta asheenaꞌo toommooch nallemmo taane” iton ariibeeto noone.

³¹ Beeyechi Yeerichi kishooch dihoo am shaahe shattiiti mooyone!

³² Tunebaani mishiraachee qaaree bekko ittoshich bekketoyee gubb, xuuxo tunetaa oogeti qiiccoona haaꞌiibee ittoshi beshiiti wonnee yemeenoon gabibote.

³³ Asheenaꞌo ittoshi daggoochee ikkikkeenaꞌon cooneebee, xuuxoon bekkiibee kaachitinaꞌone; ebiyoommon boonoshi toommooch shaggiti iritoon boonoshina tookkii qoodeyecho tuneto ittoshine.

³⁴ Qoppeenaꞌoyich ariqqehote; bulli yemeenoon beeyemmi beshe gaanno ittoshich beemon ariiꞌi, ittoshi hajjito bullin bareenaꞌo bogaa cikkii emiroona ciinniyote.

³⁵ Illa oogeti gaacoon ittoshich daniyemmo bi tunetoyich, andoo ittoshi aafee kupphoon qajjaahote.

³⁶ Yeerichi daaggoon ceechiree bi gibenikkiti gibenoon ittoshi danemmoyich haaꞌiyoo ittoshich qaawiihe.

³⁷ Yaafe Macaafooch bi kooreetoommon, “Katinoon tunemmone; woya ii beeto woyemmone; yagaachemmone.

³⁸ Tunebaani ta toommooch mulloon tooꞌiyoona cadiqiti ta asho, kashecho tuneree beeyemmone. Tunetaa gubb bi shokigaata biinna emiraache” itone.

³⁹ No, mulloon Yeeri toommooch tooꞌiiꞌi wodiibeeti asheenaꞌo daggeexo noani, gubb shokiree aallemminaꞌo daggeexo toono noone.