Hibireena'o 1 - Kafa Linguistics Project

Bi Bushoochi Gommona Yeeri Geto

¹ Wonnee yemeenoochee tiijjiꞌi, Yeeri wodde wottoon baribare gommona no qaabbechinaꞌoyich keemechinaꞌochi noonoona gettiye.

² And hini yemeenee ciiroochaa nooch bi gettito, bulli mooyon woraasho bi tuniiti, wotta showoonaa shimaayoonon biinna bi halliti, bi Bushoonane.

³ Biyoo worganikkiti Yeerichi oogee yiiree bekkoonaa bi shuriyoonochi shaahoona tuneechii, bulli mooyon giidechi bi qaaroona deggii yechitone; no axaaxoon bi xalliitoyee gubb, shimaayooch Yeerichi oogee yiiree qannooch kotehe.

Maraakeenaꞌo Bulliyee Yesuusi Besho Tuno

⁴ Bi woraashiti shigo maraakeenaꞌochi shigoyee beshaa besho bi tunoommon, biyoo maraakeenaꞌoyee beshaa beshoon tunetone.

⁵ Maraakeenaꞌo daggoochee konichiye Yeeri, “Ne, ta Bushoo neene; hanaach neen shiyeto taane” bi ito? Wotta konichiye, “Ta biich Nihoo tunemmo taane; biyoo taach Bushoo tunemmone” bi ito?

⁶ Wotta Yeeri qaabbe bi Bushoon hini alemooch wochee bi deejjiyooba, “Yeerichi maraakeenaꞌo bulla biich goyinnebeete” iye.

⁷ Yeeri maraakeenaꞌochon gettiibee, “Bi maraakeenaꞌon yongoomminaꞌon, bi wocheyechinaꞌonoo conjiibeeti qaaqqoomminaꞌon, tuniyemmone” iye.

⁸ Tunebaani Yeeri bi Bushoochon gettiibee, “Nuggishoo Yeero, ne taatee qeeno bulli yemeenoon beeyemmone; ne taatittinee daggooch beetinaꞌo bullin tatoona qeejjihine.

⁹ Cadiqoon shunnehine; hukkoon shixxehine; ebich Yeeri ne Nuggishoo, ne nuucheenaꞌoyee ne beshemmoyich, neen oogiiꞌi emiree zayitoona huuttiye” iye.

¹⁰ Daakkiꞌinoo, “Ta Doonocho, shiichaꞌa showoon neechihine; shimaayoo ne kishee shuunoone.

¹¹ Boonoshi bulliyoo aallemminaꞌone; tunebaani ne beeyemmo neene. Boonoshi bulliyoo qoreddoochoommon geenemminaꞌone.

¹² Boonoshin bullikkoochoommon qoddemmo neene; qoreddoochoommon shaddeyemminaꞌone. Tunebaani ne halla neene; ne beemi yemeeno ciireyaache” iye.

¹³ Tunebaani maraakeenaꞌo daggoochee konichiye Yeeri, “Ne etteenaꞌon ne baatee dechiich ta tuniimmi wottoon, ta qannooch kotebe” bi ito?

¹⁴ Maraakeenaꞌo bulliyoo Yeeri wodiyemmi asheenaꞌon boonoshi gaachemmoyich wochee beetinaꞌo, Yeerichoo maddeebeeti ayaaneenaꞌo tooneenaꞌone?