Halloo 9 - Kafa Linguistics Project

Yeeri Noohina Tookkii Wogoon Gimo

¹ Yeeri Noohinaa bi bushiishoonon ishichiꞌi diiriye: “Shiijje shiijjerebote; showoo bulliichoo ceenote.

² Showeexi gijjeenaꞌonaa cooxinaꞌona, shimaayoona yoobbiibeeti yoobbereenaꞌo, yuummereenaꞌonaa bahareexi haasheenaꞌo bulloshina ittoshin shattii, keqqii beetinaꞌo tunebeete; boonoshinoo ittoshich immeto taane.

³ Shuuriibeeti kashecho bulli ittoshich maayo tunebe. Ebiyee aaf showeexi collo bullin ittoshich ta imoommon, andoo wotta eboshi bullin ittoshich immeto taane.

⁴ “Tunebaani damoo quupphiti meenon maayaahote. Ebiyoo damee daggooch kasho beetoyichiye.

⁵ Iberoochaa ashi kashoon kichimmon echeyaanoon qayaachemmo taane. Gijjoo woyee cooxolla bi tunegaata, ashi kashoon bi kichigaata, biin echemmo taane. Ashi kashoon kichimmi asho koniyoona bi tunegaata, biin echemmo taane.

⁶ “Asho, Yeeri ta malletoona halleetone; ebich ashi damoon ukkimmochi damoon bare asho ukkemmone.

⁷ “Tunebaani ittoshi shiijje shiijjerebote; shiijjereree showee toommo bulliich ceenote” iye.

⁸ Aroochee Yeeri Noohinaa bi bushiishoonoyich ishichiye:

⁹ “Tawoo ittoshinaa ittoshiyee gubbi shiijjereenaꞌona tookki wogoon giyemmo taane.

¹⁰ Ebi wogoon ta giyemmo, ittoshina tookkii markaboochee kechiti, kashechi halleenaꞌo bullina tookki, eboshiyoo yoobbereenaꞌo, gijjeenaꞌo, cooxinaꞌoo bulloshina tookki tunemmone.

¹¹ Wochinnoon meenon taheto bullin aalliyee aacona ta aalliyaachemmoyich, showee toommooch beeto bullinoo aalliyee aacona ta aalliyaachemmoyich, wogoon ittoshina tookki giyemmo taane” iye.

¹² Yeeriyoo daakkii ishichiye: “Taannaa ittoshina daggooch, wotta ittoshina tookkii beeti kashechi halleenaꞌo bulli daggooch, gubbi shiijjereenaꞌoyich ta giyemmi bulli yemeenee wogee malletoo ebine:

¹³ Ta malletoo tuneti ximbittoon qubee daggooch geddemmo taane; ebiyoo taannaa showee toommo bulliich beetinaꞌonochi daggooch wogee malletoo tunemmone.

¹⁴ Showee toommooch quboon ta tuniihooba, ta malletoo tuneti ximbittoo qubee daggooch bekkemmone.

¹⁵ Ebiyooba taannaa ittoshina daggooch, wotta taannaa meenon taheti, kashechi halleenaꞌo bullina daggooch beeti ta wogoon gabemmo taane; aalliyee aaco meenon taheto bullin wochinnoon aalliyaachemmone.

¹⁶ Ximbittoo qubee daggooch tunehooba, ciiniichi, taannaa showee toommooch beeti, meenon taheti kashechi halleenaꞌo bullina daggooch beeti, bulli yemeenee wogoon gabemmo taane” iye.

¹⁷ Ebich Yeeri Noohich “Taannaa showee toommooch beeti, meenon taheti, kashechi halleenaꞌo bullina daggooch ta neechiti wogee malletoo ebine” iye.

Noohinaa Bi Bushiishoonochi Mooyo

¹⁸ Markaboochee kechiti Noohi bushiishoo Sheemi, Kaaminaa Yafeetinane. Kaami Kanaanichi nihoone.

¹⁹ Noohi bushiisheenaꞌo ebi keeminaꞌone; eboshichi yaroo shiijjee shiijjereꞌi, showoo bulliich ceenniye.

²⁰ Noohiyoo goyee gochechone; shiichiꞌi woyinoon bechito, biine.

²¹ Ikke areddoon ebi bi bechiti woyinoochee duucheti woyinee uyoon uchii mashehe; bi tahoon shoottiꞌi, duukkaanee daggooch shokkaachoon tokketehe.

²² Kanaani nihoo Kaamiyoo shokkaachoo beeti bi nihoon beeggiye; maaxooch kechiꞌinoo, gutte bi maneenaꞌo Sheeminaa Yafeetinoyich gettiye.

²³ Boonoshiyoo bullikkoon boonoshi gogooch haxeꞌi, gubboona hammii boonoshi nihoo toommooch tajjiyeete; boonoshi nihoo achoon boonoshi beegaachemmoyich, boonoshi aafoon badd wochiichiiniye boonoshi tajjito.

²⁴ Noohiyoo ebi bi masho beshetaa tiyiꞌi, guuche bi bushoo tuniiton ariihe.

²⁵ Biyoo ishichiye: “Kanaani uppeton tunebe! Bi maneenaꞌoyichoo guuneexi guunon tunebe” iye.

²⁶ Daakkiinoo ishichiye: “Sheemichi Nuggishoo, Doono Yeeri diireebe! Kanaani Sheemich guuno tunebe!

²⁷ Yeeri Yafeetin gamichibe! Sheemina tookki diggoona beebe; Kanaani biichoo guuno tunebe” iye.

²⁸ Aalliyee aacoyee gubb, Noohi keejje ballaa aache naton beehe.

²⁹ Noohi yiixiye ballaa aacha nattiichii qitiye.