Halloo 7 - Kafa Linguistics Project

Aalliyee Aachi Mooyo

¹ Doono Yeeri Noohich ishichiye: “Hini shiijjeree daggoochee ne ikkeeto baach ta aafooch cadiqe asho tunaꞌa daneto neene. Ebich ne kechi asheenaꞌo bullin yeshi markabooch gibe.

^2-3 Xalle gijjeenaꞌonaa cooxinaꞌo bullinoochee anaamaa maache yesheree shabaatti shabaattoon tuneree, xalloo tuneyaani gijjeenaꞌonaa cooxinaꞌo bullinoochee anaamaa maache yesheree gutti guttoon tuneree, shimaayoona yoobbiibeeti yoobbereenaꞌo bulliichee anaamaa maache yesheree shabaatti shabaattoon tuneree boonoshi waataa, neenna tookki markabooch giijjibe. Ebiyoo kashoona beeree, gubbich showee toommooch shiijje boonoshi meettemmoyichiye.

⁴ Shabaatte qemoyee gubb, shaanaani amiyon aabbe areddoonaa aabbe xumoonon showee toommooch dichemmo taane; ta halliti halleenaꞌo bullinoo showee toommoochee hidi aalliyemmo taane” iye.

⁵ Noohiyoo Doono Yeeri biich gettito bullin tuniihe.

⁶ Noohi aalliyee aaco showee toommo bulliich tunehooba, shiritte balle nati ashoone.

⁷ Arooba Noohi aalliyee aacoochee wodoyich bi mecheen, bi bushiishoonaa boonoshi mecheenaꞌonon yechiꞌi markabooch giyiye.

⁸ Gijjeenaꞌonaa cooxinaꞌonoochee, yoobbereenaꞌoochee, yuummereenaꞌo bulliicheenoo, xalloo tunetinaꞌonaa xalloo tuneyaaneenaꞌona,

⁹ Yeeri Noohich bi gettitoommon, gutti guttee yesheꞌi, anaamaa maachee tuneꞌi, Noohina tookkii markabooch giyiyeete.

¹⁰ Shabaatte qemoyee gubb aalliyee aaco showee toommooch waahe.

¹¹ Noohi shiijjeti shiritte balle natooba, guttinnee agenee aaraa shabaattinnee qemooba, showee ducheexi, ooge aachi xuupho bulli borihehe; shimaajji kelloo qecheehe.

¹² Giidechi amiyo aabbe areddoonaa aabbe xumoonon kuxaanoon dihiye.

¹³ Ebi arooba Noohinaa bi mecheena boonoshi bushiishoo, Sheemi, Kaaminaa Yafeetina boonoshi mecheenaꞌona tookkii markabooch giyiyeete.

¹⁴ Boonoshina tookkii cooxinaꞌo bulli boonoshi shaahi shaahoona, gijjeenaꞌo bulli boonoshi shaahi shaahoona, showee toommona yuummiibeeti halleenaꞌo bulli boonoshi shaahi shaahoona, yoobbereenaꞌo bulliyoo boonoshi shaahi shaahoona giyiyeete.

¹⁵ Ebina meenon taheti kashechinaꞌo bulli anaamaa maachee yesheꞌi, Noohina tookkii markabooch giyiyeete.

¹⁶ Yeeri Noohich bi gettitoommon, meenon tahetinaꞌo bulliichee anaamaa maachee tuneꞌi giyiyeete. Boonoshi giyitoyee gubb, Doono Yeeri markabee kelloon gubbaa hicciye.

¹⁷ Aalliyee aaco aabbe qemon showee toommo bullin tajjii ceennii hammiye; aacoo markaboon showoochee kaama tiijjiye.

¹⁸ Aaco beshii beshii hammiꞌi showoon guuppiye; markaboo aachi toommona tegiye.

¹⁹ Aaco showee toommooch oogichii bi ceennitoyich, aricheti ogooge guudinaꞌo bullin qooxxii guuppiꞌi qeriye.

²⁰ Aaco guudinaꞌon qooxxii guuppiichii, aaraa uuche hira bedoon kaama kechiye.

²¹ Ebina showee toommooch beeti, meenon taheti kashechinaꞌo bulli, eboshiyoo yoobbereenaꞌo, gijjeenaꞌonaa cooxinaꞌona, yuummereenaꞌo, asheenaꞌo bulloshiyoo qitii ciireheete.

²² Showee toommooch beeti, kachiibeeti halloo bulli qitii ciirehe.

²³ Yeeri showee toommooch beeti, kashechi halleenaꞌo bullin hidii aalliihe; ashoochee tiijjiꞌi gijjeenaꞌonaa cooxinaꞌonooch beddaahaa, yuummere halleenaꞌooch beddaahaa, shimaayoona yoobbiibeeti yoobbereenaꞌooch beddaahaa, showee toommoochee hidii aalliihe. Noohinaa biinna tookkii markabooch giyitinaꞌona baach wodiyeete.

²⁴ Aacoo balli aache qemi wottoon shappaanoon showoon qooxxiꞌi beehe.