Halloo 6 - Kafa Linguistics Project

Ashi Gonde Shuunoo

¹ Asheenaꞌo showee toommooch shiijjee boonoshi meettiyooba, maache bushiisheenaꞌo boonoshich shiijjeheete.

² Yeerichi bushiisheenaꞌo, asheenaꞌochi maache bushiisheenaꞌo mallet gaaweenaꞌo boonoshi tunoon beeggiꞌi, boonoshi shunnii shunnitinaꞌon daammii shaaggiyeete.

³ Arooba Doono Yeeri “Asho qitemmo bi tunetoyich, ta Ayaano ashoona tookki bulli yemeenoon beetaachemmone. Asho ebiyee bekk bi beeyemmo balli hiye natoniye” iye.

⁴ Arooba, aroyee gubboo genjeenaꞌonaa giidechinaꞌona tuneti Nefiliimeenaꞌo showee toommooch beeheete; eboshi Yeerichi bushiisheenaꞌo asheenaꞌochi maache bushiisheenaꞌon shaaggiꞌi, boonoshi shiyiti bushiisheenaꞌone. Eboshiyoo wonna aricheti ginee anaaminaꞌone.

⁵ Doono Yeeri asheenaꞌochi gondo showee toommo bulliich bi woddoon, ashi mullee gaboonaa qaatoona bulli aaboon gondo baach bi tunoonoo beeggiꞌi,

⁶ ashoon showee toommooch bi hallitoyich ayiniye; bi mulloonoo tuummiye.

⁷ Ebich Doono Yeeri “Ta halliti ashoochee tiijji, gijjeenaꞌonaa cooxinaꞌonooch beddaahaa, yuummere halleenaꞌooch beddaahaa, shimaayoona yoobbiibeeti yoobbereenaꞌooch beddaahaanoo, showee toommo bulliichee ciroona boonoshin hidi aalliyemmo taane. Boonoshin ta hallitoyich ayinito taane” iye.

⁸ Tunebaani Noohi Doono Yeeri aafooch gidoon danehe.

Noohi Mooyo

^9-10 Noohi mooyo ebine: Noohi Sheemi, Kaaminaa Yafeetina getteebeeti keejje anaami bushiishoon shiyihe. Biyoo bi yemeeneexi shiijjeree daggoochee cadiqe ashoonaa Yeerich deꞌa ii beetonane. Noohi Yeerina tookkii ikkotteꞌi beehe.

¹¹ Tunebaani showee toommooch beeti asheenaꞌo bulli Yeeri aafooch duubeheete; showoo xuꞌoona ceenniye.

¹² Yeeriyoo showoon ciinniꞌi, ebiyoche showoo duubeton, showee toommo bulliich beeti asho bulliyoo bi qocoo oogeton gondeton, beeggiye.

¹³ Ebich Yeeri Noohich ishichiye: “Ashi yaroo bullin showee toommo bulliichee ciroona aalliyoyich maacceto taane; boonoshi naboona xuꞌo showee toommo bulliich ceennitone. Tawoo ebiyoche, boonoshinaa showee toommooch beeto bullinon aalliyemmo taane.

¹⁴ Ebich yigee mixoochee markaboon neennaa ne kechi asheenaꞌonon wodiyoyich shuunebe. Ebi markabooch gateenaꞌon kuxi kuxiree shuunebe. Maacinaa maachinon reenjoona dikkebe.

¹⁵ Ebi markabee gidoo keejje balle hiroo, bi maaco aache hiroo, bi neexoo shaashe hiroo tunebe.

¹⁶ Markabee toommooch kechi aafoon shife. Ebi markabee tookkaa, bi guudoona ikke hira bede aahoon echiibe. Markabee kelloonoo naaboochaa kichibe. Deshee kaama keejje kuxon tuniibe.

¹⁷ Tawoo ebiyoche, shimaayoyee desh beeti, meenon taheti, kashechi halloo bulli qoocheree bi aallemmoyich, showoo bulliich aalliyee aacon deejjemmo taane. Showee toommooch beeto bulliyoo qiti ciiremmone.

¹⁸ Tunebaani ta neenna tookki wogoon giyemmo taane; ne mecheen, ne bushiishoonaa boonoshi mecheenaꞌonon yeshiree markabooch giyemmo neene.

¹⁹ Neenna tookki kashoona boonoshi beeyemmoyich, meenon taheti, kashechi halleenaꞌo bulliichee boonoshi shaahi shaahoona gutti guttoon, anaamaa maacheen markabooch giijjibe.

²⁰ Kashoona boonoshi beeyemmoyich, yoobbereenaꞌo boonoshi shaahi shaahoona, gijjeenaꞌonaa cooxinaꞌona boonoshi shaahi shaahoona, showee toommona yuummiibeeti halleenaꞌoo boonoshi shaahi shaahoona, gutti gutteree ne waan gibeete.

²¹ Ne wotta neennaa eboshinoyich manjemmi mooyon bi shaahi shaahoona kiciree giijjibe” iye.

²² Noohiyoo ebin tuniihe; Yeeri biich gettito bullin tuniihe.