Halloo 50 - Kafa Linguistics Project

¹ Arooba Yooseefi bi nihoo cahee toommooch guufeꞌi eeppiye; shummiinoo iye.

² Yooseefiyoo bi nihoo cahoo oꞌaachemmoyich, cinnechi attoon boonoshi huuttemmoyich, attee ariyechi bi gaddireteenaꞌoyich gettiye. Boonoshiyoo Israꞌeelichi cahoon cinnechi attoona huuttiyeete.

³ Cahoon atto huuttiibee shuuꞌiyoyich boonoshi showee doyoommon aabbe qemon ciichiye. Gibitsee asheenaꞌo shabe qemon goppii eeppiyeete.

⁴ Eeppi aabo beshetoyee gubb, Yooseefi Farooni kechi asheenaꞌoyich ishichiye: “Ittoshi aafoochaa gidoon daneto ta tunegaata, Faroonich ishichi ittoshi gettemmoyich qollehoye:

⁵ Yooseefi ‘Ta nihoo ishichiꞌi taan wogiitone: “Ta qitiyooba, Kanaanee showooch ta qellich ta qanniiti oppooch taan duuhe” itone. Ebich arooch daamiree ta nihoon duuhiichi, wotteree wobona itone’ getote” iye.

⁶ Farooniyoo “Hambe; neen bi wogiitoommon ne nihoon duuhe” iye.

⁷ Ebich Yooseefi bi nihoon duukka hammiye. Faroonichi iraasheenaꞌo, bi mikkirechinaꞌonaa Gibitsee showee geeneenaꞌo bullina tookkii deennii hammiyeete.

⁸ Ebiyoommon wotta Yooseefi kechi asheenaꞌo, bi maneenaꞌonaa bi nihoo kexeexi asheenaꞌo bullina tookkii hammiyeete. Gooshen echeto, boonoshi bushiishoo, boonoshi bago, boonoshi emmishoonaa boonoshi miimona baachiye.

⁹ Meeti gaarinaa meeti hareshechinaꞌona tookkii hammitinaꞌone. Hammiti asheenaꞌo mattiqutteenaꞌone.

¹⁰ Yoordaanoosi aachee beqach, maayo bucheebeeti Axaad shaggiichii, boonoshi qaaroon oogichiꞌi caagee eeppiyeete. Yooseefiyoo bi nihoyich shabaatte qemon arooch goppii kotehe.

¹¹ Arooba are showooch beeti Kanaaneenaꞌo, maayo bucheebeeti Axaadaa tuneti eefon beeggiꞌi, “Ebi Gibitsee asheenaꞌoyich ooge eefone” iyeete. Ebich ebi xaaꞌoon Abeel Mitsirayimi ii shigiiheete. Ebi xaaꞌoo Yoordaanoosi aachee beqach beeti xaaꞌoone.

¹² Yaaqobi bushiisheenaꞌo boonoshi nihoo gettitoommon tuniiheete.

¹³ Bi dubenoon Kanaanee showooch daammii shakkiiheete. Abrahami maashee xaaꞌoo bi tunemmoyich, Hitee asho Efiroon waanee goyee budona tookkii bi kemeti, Mamiri goroochaa aabi-keyo waan, Makifeli beeti, xaqqee gofee maacooch duukkiyeete.

¹⁴ Yooseefi bi nihoon bi duukkitoyee gubb, bi maneenaꞌonaa bi nihoon duukka biinna tookkii arooch hammiti asheenaꞌo bullina tookkii Gibitsee showooch wottehe.

Yooseefi Bi Maneenaꞌon Goggiyoo

¹⁵ Yooseefichi maneenaꞌo boonoshi nihoo eefo beshetoyee gubb, ishichii gabiyeete: “Diqqich Yooseefi no toommooch and beddaahaa xiiqoon yechiꞌi, bi toommooch no tuniitoommon tuniiree, no toommooch nichoon bi kichigaata, aabichishiye no gettemmo?” iyeete.

¹⁶ Ebich Yooseef waan ishichiibeeti wochoon daachiiheete: “Ne nihoo qitaan beebee, ishichiibeeti getoon nooch beshiitone:

¹⁷ ‘Yooseefich “Ne maneenaꞌo ne toommooch tuniiti axaaxoonaa gonde xuꞌoonon maaribe” getote’ itone. Illa ne nihoochi Nuggishoo guuno no ‘No xuꞌoon maaribe’ iyaa qollaabeeto noone” iyeete. Ebi boonoshi wocho bi waan shagaa, Yooseefi eeppiye.

¹⁸ Aroochee bi maneenaꞌo waa bi aafooch guufee goyinneꞌi, “No, ne guuno noone” iyeete.

¹⁹ Yooseefiyoo boonoshich ishichiye: “Shattaahote; ta, Yeerichi shaatooch dukkeyaache.

²⁰ Ittoshi ta toommooch gondoon gabiyote; tunebaani and tunee beetoommon, meeti asheenaꞌochi kashoon wodiiya iꞌi, Yeeri deꞌe mooyooch shadditone.

²¹ Andoo shattaahote; ittoshinaa ittoshi bushiishoonoyich qaawiibeeti mooyo bullin immemmo taane” ii goggiiꞌi boonoshi mulloon kashiihe.

Yooseefi Qitoo

²² Yooseefi bi nihoochi kechi asheenaꞌona tookkii Gibits kotehe; balli aashira nattiye.

²³ Efreemi bushiishoochi bushiishoon keejjinnee shiijjerooch beddaahaa beeggiye. Minaasi bushoo Makiri shiyiti bushiishoon Yooseefi bi hajjee bushiishoo tuniiꞌi haddiye.

²⁴ Yooseefiyoo bi maneenaꞌoyich ishichiye: “Ta and qita beddeto taane. Yeeri iberoon ittoshin gaacheya woyemmone; hini showoochee ittoshin kichemmone. Abrahamich, Yisaaqinaa Yaaqobinoyich bi wogeti showooch ittoshin giijjemmone” iye.

²⁵ Yooseefiyoo Israꞌeelichi bushiishoyich “Yeeri ittoshin gaacheya bi waahooba, ta shaawushoon hiniichee tiijjiree ittoshina tookki daambote” iꞌi boonoshin wogiihe.

²⁶ Yooseefiyoo bi shiijjeti balli aashire natona qitiye; bi dubenooch cinnechi attoon huuttii boonoshi shuuꞌiitoyee gubb, duuhoyich qanniiꞌi Gibitsee showooch saaxenoona kotiiheete.