Halloo 49 - Kafa Linguistics Project

Yaaqobichi Ciireexi Yibbaatoo

¹ Ebiyee gubb, Yaaqobi bi anaami bushiishoon ceekkiiꞌi ishichiye: “Ikkooch ittoshi kiceechaa, gubb ittoshi ikkikkoo toommooch shaggemmi mooyon getona.

² “Haanoshite, Yaaqobi bushiisheenaꞌote, ikkooch kiceeree waayebote. Ittoshi nihoo Israꞌeeli ta gettaa beeton ellebote.

³ “Roobeelo, giidoonaa gurimaashittinee hakkoona taach beehooba, ta shiyeti ta gutenee bushoo neene; ta bushiishoo bulliichee oogoonaa giidoona besho neene.

⁴ Tunetaa xuuqqishecho ne tunetoyich, bareenaꞌoyee damboo tuneyaachemmo neene; ebiyoo ne nihoo ta naamacheen ne qeyetoyichiye; ta beeroonoo ne eeꞌitoyichiye.

⁵ “Simooninaa Lewina manaamaneenaꞌone; boonoshi goraadoo hukkee qiicoone.

⁶ Boonoshi koceyooch ta giyaache; boonoshi iitee xaaꞌooch ta daneyaache. Ippoona tiyiꞌi asheenaꞌon wuxitinaꞌone; gatteenaꞌochi tingoonoo qeccee kaachitinaꞌone.

⁷ Oogeton shattiiti boonoshi kaaro, ariqqaalli boonoshi ippo, uppeto tunebe; boonoshi shiijjereenaꞌon Israꞌeelee showoo bulliich shaccemmo taane; boonoshi maneenaꞌochi yareenaꞌo daggooch boonoshin baccemmo taane.

⁸ “Yihudo, ne maneenaꞌo neen naademminaꞌone; ne kishoo ne etteenaꞌochi qettoon cuuqqi yechemmone; ne maneenaꞌo ne aafooch guuferee neech goyinnemminaꞌone.

⁹ Haano Yihudo, more daaheroommo neene; ta bushoocho, wuxaa maachaa wotteto neene. Daaheroochoommon quyehine; showoochoo tokketehine; maache daaherechoommonoo ciixehine. Neen shuurikkoyich aafoon kupphemmo konine?

¹⁰ Taatittinee gumbo biicho tuneto waammi wottoon, aageteenaꞌon hajjemmo waammi wottoon, taatittinee gumbo Yihudichi kishoochee keyaachemmone; taatittinee gumboon bi shiijjereenaꞌo yeshiree taatemminaꞌone.

¹¹ Bi kuroon woyinee indooch tippemmone; kuree bushoonoo gaawe woyinee qombooch tippemmone; bi tahoon woyinee uyoona, bi gaaboonoo woyinee aafee hiicoona, machemmone.

¹² Woyinee uyoon woddii bi uchii beetoyich, bi aafo ceellemmone; ejjoonoo woddiiꞌi bi uchii beetoyich, bi gasho naccemmone.

¹³ “Zebulooni baharee gashooch kotemmone; markabeenaꞌochi neexee xaaꞌoon tunemmone; bi showee tuggo Sidoon beddaahaa tunemmone.

¹⁴ “Yisakoori shaawush kupphe kuroommone; tunetaa, maraatoona bi xaanoona tookki tokketemmone.

¹⁵ Bi kasheti xaaꞌoo gaaweto, showoo emirikkito bi tunoon bi beegiyooba, bi gogoona shaagoyich yittemmone; guunon tuneree maddemmone.

¹⁶ “Daani Israꞌeelee yoodeenaꞌoochee ikkoommon tuneree, bi asheenaꞌo toommooch nallecho tunemmone.

¹⁷ Daani gommi gasheexi dingeroommo, beshe kaatteexi xekereyoommone; hareshoon yebbeto gubboona bi hollemmoyich, hareshoochi baatoon shaaccemmone.

¹⁸ “Doono Yeero, taan ne wodiyemmoyich quyaabeeto taane.

¹⁹ “Gaadi toommooch bokkeenaꞌo woyemminaꞌone; tunebaani aroo boonoshin yoohi dabbemmone.

²⁰ “Aseerichi showoo gaawe maayoon shakkiyemmone; taatoyich tunemmi maayoon giddiyemmone.

²¹ “Nifitaali gawukkaa dicceti, mallet gaawe bushiishoon shiyaabeeti, xiixxeyoommone.

²² “Yooseefi aafee yuunjiti woyinoommone; aachi gashooch becheeti woyinee bechoommone; bi ateenaꞌo uxeree toommooch taheyemminaꞌone.

²³ Shangechinaꞌo giidoona bi toommooch tiyiyeete; biin shixxiꞌi ginoon awureheete.

²⁴ Tunebaani ginoon manje bi kishoona yaaddiyemmone. Yaaqobi goyinneebeeti Giidechi Nuggishoo Yeerichi kishoona, Qiddoo, Israꞌeelichi Xaqqee Inderoo, Yeerina bi mochoo manjiye.

²⁵ Ne nihoo Nuggishoo, biyoo neen gaacheebeeti, Beshe Hakkechi Nuggishoo, damba shimaayoochee daneebeeti abbetoona, showee deshi duchoochee daneebeeti diiroona, bushiishoona, gijjoonoo neen diiremmone.

²⁶ Wonnee yemeenoochee tiijjii manjiꞌi beeti guudinaꞌonaa bulli yemeenoon tuneti geppeenaꞌonoochee daneebeeti, emirikkiibeeti diiroo bulliyee ne nihoo diiroo beshiye. Illa ebi diiroo bulli Yooseefi toommooch tunebe; bi maneenaꞌo daggooch iraashoo tuneti Yooseefi toommooch kindibe.

²⁷ “Biiniyaami oogichii shaaceti okeroommone; maaddoona bi dabbeton billbillayii maahe; womikka bi kecciton qoodeehe” iye.

²⁸ Eboshi bulli aaraa gutte Israꞌeelee yoodeenaꞌone. Boonoshi nihoo boonoshi ikkikkoyich tato tuneti diiroona boonoshin diiriibee bi gettiti qaaro ebine.

Yaaqobi Qitii Duukko

²⁹ Ebiyee gubb, Yaaqobi bi bushiisheenaꞌoyich ishichiye: “Ebiyoche, qititi ta asheenaꞌo waan xaꞌeya ii beeto taane. Hitee asho Efiroonichi budooch beeti xaqqee gofooch, ta qaabbechinaꞌo duukketooch taan duuhote.

³⁰ Ebi xaqqee gofo Kanaanee showooch, Mamiri goroochaa aabi-keyo waan beeti, Makifeli beetone. Maashee xaaꞌoo bi tunemmoyich, Hitee asho Efiroon waanee goyee budona tookkii Abrahami kemetone.

³¹ Ebi arooch Abrahaminaa bi mechee Saarina duukketinaꞌone; wotta Yisaaqinaa bi mechee Ribiqina arooch duukketinaꞌone; Liyin ta duukketoo aroochiye.

³² Budonaa bi daggooch beeti xaqqee gofoona bi kemeeto, Hiteenaꞌo waaneeniye” iye.

³³ Yaaqobi ishin bi bushiishoyich gettii bi ciichitoyee gubb, bi baatoon kiciꞌi qeenooch qeyiye; bi kashoo abbetehe; biyoo bi asheenaꞌo waan xaꞌeehe.