Halloo 46 - Kafa Linguistics Project

Yaaqobinaa Bi Kechi Asheenaꞌona Gibits Hamo

¹ Israꞌeeliyoo biich beeto bullin kicii yechiꞌi, tiyii hammiye. Beershaab shaggiꞌi, deejjoon bi nihoo Yisaaqichi Nuggishoyich deejjiye.

² Yeeri yaaꞌoona Israꞌeelich xum bekkeꞌi, “Yaaqobo, Yaaqobo” iye. Biyoo eekkehe.

³ Yeeriyoo biich ishichiye: “Ta ne nihoo Nuggishoo taane. Desh Gibits kindoyich shattaahine. Aroochaa meeti ashechi aagetoon neen tuniyemmo taane.

⁴ Neenna tookki Gibits kindemmo taane; aroochee wochiree ne shiijjereenaꞌon kichemmo taane. Halla bi alla neen guuccemmo Yooseefine” iye.

⁵ Ebin Yeeri biich gettitoyee gubb, Yaaqobi Beershaabee tiyiye. Israꞌeelichi anaami bushiisheenaꞌo boonoshi nihoo Yaaqobin, boonoshi bushiishoonaa boonoshi mecheenaꞌonon Farooni deejjiti ogooge gaarinaꞌooch yebbiiheete.

⁶ Boonoshi gijjeenaꞌonaa Kanaanee showoochee boonoshi daneto bullinon yechiꞌi, Yaaqobinaa bi kechi asheenaꞌo bullina Gibitsee showooch waaheete.

⁷ Yaaqobi Gibits bi kindito, bi shiijjereenaꞌo bullin, eboshiyoo bi anaami bushiishoonaa bi maache bushiishoonon, bi anaami bushiishoochi anaami bushiishoonaa maache bushiishoonon yechiꞌiniye.

⁸ Gibits hammiti Israꞌeelichi bushiisheenaꞌo, Yaaqobichi shiijjereenaꞌo: Yaaqobichi gutenee bushoo Roobeeli;

⁹ Roobeelichi anaami bushiishoo: Hanooki, Faali, Hetsirooninaa Kariminane.

¹⁰ Simooninaa bi anaami bushiishoo: Yemuꞌeeli, Yamiini, Ohaadi, Yakiini, Tsohaarinaa Kanaanee ashe waanee shiijjeti Shaawullinane.

¹¹ Lewinaa bi anaami bushiishoo: Gerishooni, Qohaatinaa Meraarinane.

¹² Yihudinaa bi anaami bushiishoo: Eeri, Onaani, Seeli, Feretsinaa Zaarinane; tunetaa Eerinaa Onaanina Kanaanee showooch beebee qititinaꞌone. Feretsi bushiishoo: Hetsirooninaa Hamuulinane.

¹³ Yisakoorinaa bi anaami bushiishoo: Tooli, Fuꞌaahi, Yashuubinaa Shimirooninane.

¹⁴ Zebulooninaa bi anaami bushiishoo: Sereedi, Elooninaa Yahileelinane.

¹⁵ Ebi anaami bushiisheenaꞌo Yaaqobi Mesopotaamee showooch bi beetaa, bi mechee Liy waanee shiijjetinaꞌone. Maache boonoshi bushee Diinin daakkiꞌi anaami bushiishoonaa maache bushiishoonochi haddoo bulli shaashaa keemone.

¹⁶ Gaadinaa bi anaami bushiishoo: Tsefooni, Haggi, Shuuni, Ezibooni, Eriyi, Aroddinaa Areelinane.

¹⁷ Aseerinaa bi anaami bushiishoo: Yimini, Yishiwaahi, Yishiwinaa Beeriyinane. Boonoshi manee Seerine. Beeriyichi anaami bushiishoo: Hebeerinaa Malikelinane.

¹⁸ Ebi aaraa shiritte bushiisheenaꞌo bulli, Labaani bi bushee Liyich bi immiti Zilif waanee Yaaqobi shiyitinaꞌone.

¹⁹ Yaaqobi mechee Raaheelichi anaami bushiishoo: Yooseefinaa Biiniyaaminane.

²⁰ Yooseefi Gibitsee showoochaa, Heliyooti katemeexi qeeshoo Phoxifeeri bushee Asenaat waanee Minaasinaa Efreeminon shiyihe.

²¹ Biiniyaamichi anaami bushiishoo: Belaahi, Bekeeri, Ashibeeli, Geeri, Naꞌimaani, Eehi, Rooshi, Mufiimi, Hufiiminaa Ariddinane.

²² Eboshi aaraa awudde anaami bushiishoo bulli Raaheeli Yaaqobich bi shiyeti anaami bushiishoonaa boonoshi bushiishoonane.

²³ Daaninaa bi anaami bushoo: Hushiiminane.

²⁴ Nifitaalinaa bi anaami bushiishoo: Yahitseeli, Guuni, Yetseerinaa Shileeminane.

²⁵ Eboshi shabaatte anaami bushiisheenaꞌo bulli, Labaani bi bushee Raaheelich bi immiti Biil waanee Yaaqobi shiyitinaꞌone.

²⁶ Yaaqobina tookkii Gibits hammiti, bi shiijjereenaꞌochi haddoo shichaa shirittoo tunemmona, ebi haddoo bi bushiishoochi mecheenaꞌon daakkaanooniye.

²⁷ Yooseefi Gibitsaa bi shiyiti gutte bushiishoon daakkiꞌi, Gibits giyiti, Yaaqobi kechi asheenaꞌo haddoo shaboone.

Yaaqobinaa Bi Kechi Asheenaꞌona Gibits Shago

²⁸ Gooshenaa boonoshina bi danemmoyich, Yaaqobi Yihudin shiichii Yooseef waan wochee daachiihe. Gooshen boonoshi shaggimmona,

²⁹ Yooseefi bi nihoona danoyich bi gaarina arooch hammiye. Yooseefiyoo bi nihoo waan shaggiꞌi, qettoona tiqqee genje saatoon eeppiye.

³⁰ Israꞌeeliyoo Yooseefich “Kashoona ne beetaa ta beeggetoyich, illa and ta qititaanona aaxxiyaache” iye.

³¹ Ebiyee gubb, Yooseefi bi maneenaꞌonaa bi nihoo kechi asheenaꞌonoyich ishichiye: “Ta and hamiree Faroonich ishichi gettemmo taane: ‘Kanaanee showooch beeti ta maneenaꞌonaa ta nihoo kechi asheenaꞌo bullina ta waan waatinaꞌone.

³² Boonoshiyoo gijjee shiijjechinaꞌo boonoshi tunetoyich, qiddeenaꞌone. Boonoshi bageenaꞌonaa emmisheenaꞌonon, boonoshi miiminaꞌonoo, ebiyoommon wotta boonoshich beeto bullin yechiꞌiniye boonoshi waato’ gettemmo taane.

³³ Farooni ittoshin ceekkiiꞌi, ‘Ittoshi shuunoo amoone?’ ii bi echegaata,

³⁴ ittoshiyoo ‘Ne guuno no shuunoo bushittinoochee tiijjiꞌi, no qaabbechinaꞌochoommon gijjee shiijjoone’ getiree wochibote. Ebina Gibitsee asheenaꞌo gijjee shiijjechinaꞌon eeꞌeenaꞌo tunii boonoshi ciinnii beetoyich, Gooshen ittoshi beeyemmoyich daaggemmone” iye.