Halloo 45 - Kafa Linguistics Project

Yooseefi Bi Maneenaꞌoyich Bi Qelloon Arichiyoo

¹ Arooba Yooseefi bi gaꞌooch beeti asheenaꞌo aafooch haaꞌii tooꞌon bi mawiitoyich, bi qaaroon oogichiꞌi, “Ebi asheenaꞌo bullin ta aafoochee kichibote” iye. Ebich Yooseefi bi qelloon bi maneenaꞌoyich bi arichii bee goora, bare asho koniyoona biinna tookkii aalloone.

² Yooseefi bi qaaroon oogichiꞌi bi eeppitoyich, Gibitsee asheenaꞌo waayeheete. Ebi mooyon Farooni kexeexi asheenaꞌo wotta waayeheete.

³ Yooseefiyoo bi maneenaꞌoyich “Ta Yooseefi taane. Ta aabbi batt kashoona beete?” iye. Tunebaani bi maneenaꞌo ebin waayeꞌi, oogeton boonoshi keqqitoyich, biich minnakanna getaaneenaꞌone.

⁴ Ebich Yooseefi bi maneenaꞌon “Eke hach ta waan giddebote” iye. Boonoshiyoo bi waan giddeheete. Boonoshichoo ishichiye: “Gibits hammiibeeti giixechinaꞌoyich ittoshi kemmiti ittoshi manoo Yooseefi taane.

⁵ Andoo taan kemmiꞌi hiniich ittoshi deejjitoyich, ayiniyaahote. ‘Aakkiya ebin tuniitone?’ gettaahote. Ebin tuniito Yeerine; asheenaꞌochi kashoon wodiyoyich ittoshiyee shiichii taan deejjitone.

⁶ Showee toommooch shaacoo giyito batt gutte natone. Ebiyee gubb, showoon goyaa maayo maceyaachemmi uuche nato batt beetone.

⁷ Showee toommooch ittoshich curo echemmonaa worganikkiti gommona meeti ittoshi asheenaꞌo wodemmonoyich, ittoshiyee shiichiiꞌi taan Yeeri hini showooch deejjitone.

⁸ “Ebich hini showooch taan deejjito, Yeeriyani, ittoshi toonoone. Faroonichoo nihoommon taan tuniihe; bi kechi toommo bulliich doono, Gibitsee showoo bulliichoo iraashoo taan tuniihe.

⁹ Andoo kaate ta aabbi waan hamiree ishichi getote: ‘Ne bushoo Yooseefi ishichitone: “Yeeri Gibitsee showoo bulliich doono taan tuniitone. Ebich kaateree ta waan wobe; yagiyaahine.

¹⁰ Ne bushiishoon, ne bushiishoochi bushiishoon, ne bageenaꞌon, ne emmisheenaꞌon, ne miiminaꞌonaa neech beeti mooyo bullinon yeshiree, ta katinooch beeti, Gooshen kotemmo neene.

¹¹ Batt gubb woyemmi uuche nati shaacoo beetoyich, hiniich ittoshi beetaa, ittoshich qaawiibeeti maayoon ta ittoshich immemmo taane. Ebi tuno qayigaata, neennaa ne kechi asheenaꞌo bullina, neecho tuneto bulliyoo shaacoona qitemmo ittoshine” itone’ getote.

¹² “Ebin ittoshich getteto ta, Yooseefi ta tunoon ittoshi aafoona beeggito ittoshine; ta manoo Biiniyaamiyoo bi aafoona beeggitone.

¹³ Ta aabbichoo Gibitsee showooch taach beeti oogo bullinaa ittoshi beeggito bullinon getote. Biinoo hiniich kaateree deebote” iye.

¹⁴ Yooseefiyoo bi manoo Biiniyaamin qettoona tiqqeechii eeppiye. Biiniyaamiyoo eeppiibee Yooseefin tiqqehe.

¹⁵ Yooseefi eeppiibee bi maneenaꞌo bullin shummiye. Ebiyee gubb, bi maneenaꞌo biinna tookkii yibbaatooch giyiyeete.

¹⁶ Yooseefichi maneenaꞌo womo Farooni kexooch waayeehe. Ebich Farooninaa bi iraasheenaꞌona oogeton emiriyeete.

¹⁷ Farooniyoo Yooseefich ishichiye: “Ne maneenaꞌoyich ishichi gete: ‘And eechibote; ittoshi kureenaꞌo toommooch maayoon xaaniree Kanaanee showooch wottebote.

¹⁸ Ittoshi nihoonaa ittoshi kechi asheenaꞌonon yeshiree, Gibits ta waan wobote. Tawoo Gibitsee showoochee bulliyee beshe gaawe xaaꞌoon ittoshich immemmo taane; hini showeexi gaawe maayoon maayemmo ittoshine’ gete.

¹⁹ “Wotta ne maneenaꞌon eechibote, gete. ‘Gibitsee ittoshi bushiishoonaa ittoshi mecheenaꞌonoyich, boonoshi kote woyemmi, ogooge gaarinaꞌon daambote. Ittoshi nihoonoo yeshiree wobote.

²⁰ Dufiree ittoshi woyemmi qiicoyich amoonolla gabiyaahote. Gibitsee showeexi oogeti qeemi showoo ittoshicho tunemmone’ gete” iye.

²¹ Israꞌeelichi bushiisheenaꞌo ebi getteeton tuniiheete. Yooseefiyoo Farooni gettitoommon, ogooge gaarinaꞌonaa shohoonon boonoshich immiye.

²² Boonoshi ikkikkoyich andire tahoon immiye; tunebaani Biiniyaamich keejje balle sheqeelee birewoonaa uuche andire tahoonon immiye.

²³ Bi nihoyichoo Gibitsee showooch daneebeeti, bariti aaxxe mooyoochee aashire kuroona xaaniiꞌi, ebiyoommon wotta Gibits woya bi tiyiyooba, gommoyich shoho tunemmi teepphoon, koshonaa bare maayoonon aashire kureenaꞌona xaanii daachiihe.

²⁴ Ebiyee gubb, Yooseefi bi maneenaꞌon daachiihe. Hamma boonoshi tiyimmona, boonoshich “Gommon hamibee, ittoshinaa ittoshina kaareyaahote” iye.

²⁵ Ebich tiyii qaxiriyeete; Gibitseenoo kechiyeete. Kanaanee showooch, boonoshi nihoo Yaaqob waan shaggiyeete.

²⁶ Shaggiꞌi ishichiyeete: “Yooseefi qitaanoone; kashoona beetone. And bi beeto, Gibitsee showoo bulliich iraashoo tuneꞌiniye” iyeete. Yaaqobi keqqoona qitiye; boonoshi gettiton iberiyoon mawiihe.

²⁷ Tunebaani Yooseefi gettiti mooyo bullin boonoshi getaa waayeꞌi, wotta biin daammemmi, Yooseefi deejjiti, gaarinaꞌon beeggiꞌi, boonoshi nihoo Yaaqobichi kasho wottehe.

²⁸ Israꞌeeliyoo “Illa beddiye! Ta bushoo Yooseefi batt kashoona beetone. Qitaan beebee, hami biin beeggemmo taane” iye.