Halloo 44 - Kafa Linguistics Project

Aalleti Xoofee Mooyo

¹ Yooseefiyoo bi kechi ukkiroyich ishichii gettiye: “Boonoshi mollexxoo yeshon hakkimmi wottoon maayoon gaawichi ceechibe. Boonoshi bullichi gijjoon boonoshi mollexxi mollexxooch wochi gede.

² Guuchoochi mollexxooch ta uchaabeeti birewee xoofoonaa maayi kemoyich bi qocciti gijjoonon gede” iye. Biyoo Yooseefi gettitoommon tuniihe.

³ Showoo hariya gaargaarimmona, asheenaꞌo boonoshi kureenaꞌon yeshiree boonoshi hammemmoyich tuniitaa, qaxiriyeete.

⁴ Katemoochee kechii batt wohaan boonoshi beetaa, Yooseefi bi kechi ukkiroyich ishichiye: “Kaate tiyiree ebi are asheenaꞌon yoohi dabbibe. Boonoshin yeshiree ishichibe: ‘Gaaweton ittoshich no tuniitaa, amoyich gondoona wochiyote? Amoyich ta doonochi birewee xoofoon gaajjiyote?

⁵ Ta doono aroona bi uchiibeeti, wotta aashe mooyon aroona bi ariibeeti xoofoo toone? Ebi ittoshi tuniiti mooyona xuqqito ittoshine’ gete” iye.

⁶ Uroo dabbii shaggiꞌi, Yooseefi gettiton gettiye.

⁷ Boonoshiyoo wochii ishichiyeete: “No doonocho, ebiyoommi mooyon aabichaꞌa gettenne? Ne guuno no, ebi mooyon ciroona tuniyaachone.

⁸ No mollexxoochee no daneti gijjoon Kanaanee wochaꞌa neech no deebon ariibeeto neene. Ishigaata, ne doonochi kexoochee birewoon woyee aachoon aabichiree gaajjehone?

⁹ Ne guuno no daggoochee ebi xoofoo bi mollexxoochee danemmo qitibe. Echeti no bulli neech guunon tunebone” iyeete.

¹⁰ Uroo ishichiye: “Gaawiye; ittoshi gettitoommon tunebe. Xoofoo bi mollexxoochee danemmo, ta guuno tunemmone. Echeti ittoshi xalloo tunemmo ittoshine” iye.

¹¹ Bekkech boonoshi qelli qelloona boonoshi kuree xaanoon biichii kindiiꞌi, boonoshi mollexxi mollexxee noonoon biichiyeete.

¹² Uroo qaabboochee tiijjii guuchooch beddaahaa boshee qaawiye. Xoofoonoo Biiniyaamichi mollexxoochee danehe.

¹³ Boonoshiyoo boonoshi tahoon keexxiyeete. Boonoshi bulliyoo maayoon boonoshi kurooch xaaniꞌi, boonoshi hilla katemooch wotteheete.

¹⁴ Yihudinaa bi maneenaꞌona Yooseef waan boonoshi shaggaahaa, Yooseefi batt kexoochiye bi beeto; boonoshiyoo bi aafooch baroona guufeheete.

¹⁵ Yooseefiyoo “Ebi ittoshi tuniiti mooyo, amoone? Taanoommi ashich aacheeti mooyon bi ariibeeti bare ariyoo beeto tunoon ariyaachote?” iye.

¹⁶ Yihudiyoo “No doonocho, amoonolla geton hakkaachone. Neech no wochemmi noonoo nooch aalloone. Amoonane no xallemmo? Yeeri ne guuninaꞌo no axaaxoon gaxxitone. Illa xoofoo bi mollexxoochee daneto ikkeeto baach tuneyaanoon, no bulli no doonochi guuno noone” iye.

¹⁷ Tunebaani Yooseefi boonoshich ishichiye: “Ebin ciroona tuniyaache. Xoofoo bi mollexxoochee daneti uro baach ta guuno tunebe. Echeti ittoshi, diggoona ittoshi nihoo waan wotteree hambote” iye.

Biiniyaamichi Mooyoyich Yihudi Qolleti Qollo

¹⁸ Yihudi Yooseef waan giddeꞌi ishichiye: “Ta doonocho, doogena ta ne guuno ikke qaareen baach getona. Ne Farooniyoommo neene; doogena ne guuno taan kaareyaahine.

¹⁹ Ebiyee aaf ta doono ne, ne guuno noon ‘Nihoo ittoshich beete? Wotta bare manoo ittoshich beete?’ iyaa echehine.

²⁰ Nowoo, no doono neech ishichiyone: ‘Eeha geene nihoo nooch beetone. Geenoochaa bi shiyiti guuche manoo nooch beetone. Bi qaabbe manoo qititone. Bi indeechi bushiishoochee echeto, bi ikkeetone. Bi nihoo oogichii biin shunniye’ iyone.

²¹ “Arooba ne, ne guuno nooch ‘Are bushoon ta waan deebote. Biin beegona’ iyine.

²² Nowoo, no doono neech ‘Bushoo bi nihoyee baroon hakkaachemmone. Bushoo bi nihoyee bi barigaata, bi nihoo qitemmone’ iyone.

²³ Newoo, ne guuno nooch ‘Guuche ittoshi manoon ittoshi deebo qayigaata, ta aafoona danoon hakkaachemmo ittoshine’ iyine.

²⁴ No nihoo ne guuno waan, wottaa no hammehooba, no doono ne getteton biich gettehone.

²⁵ “Aroyee gubb no nihoo ‘Gibits wotte hamiree giisheche maayoon keme deebote’ iye.

²⁶ Nowoo ishichiyon: ‘Hamon hakkaachone; guuche no manoon yechaꞌa hamon no qayigaata, uroochi aafoona danoon hakkaachone. Hamon no hakkemmo, guuche no manoo noonna tookkii hamigaata baachiye’ iyone.

²⁷ “No nihoo ne guuno, nooch ishichiye: ‘Ta mechee gutte anaami bushiishoon taach bi shimon ariibeeto ittoshine.

²⁸ Ikkoo aallehe; tawoo “Iberoon cooxo biin maatone” iyaa qajjoye. Hanaach beddaahaa biin beegaanoo taane.

²⁹ Wotta hinin ta waanee bariiree ittoshi daamaa, diqqich ikke amo bi tunegaata, geenoochaa muushenoona maash taan daachiyane ittoshi ii beeto’ iye.

³⁰ “Illa bi bushoon bi kashoona tachii bi shunnii beetoyich, bushoo noonna tookkii wottoon bi qayigaata, ta ne guuno ta nihoo waan wottee ta hamaa,

³¹ bushoo noonna tookkii wottee qayon bi beegigaata, bekkech qitishiye bi gettemmo. Ebiichee tiyitona ne guuno no, no nihoon geenoochaa muushenoona maash daachiyemmo noone.

³² Wotta ebi ikkeeto baach tuneyaanoon, ne guuno ta, ta nihoo waanee bushoon ishichaꞌa buushaareto taane: ‘Bushoon diggoona wochaꞌa neech ta deebo qayigaata, bulli yemeenoon neen xuqqeto tunebona’ ito taane.

³³ “Ebich and neen qollehoye: Ne guuno ta, ta doono ne waan guuno tuneree bushoo keroon echeechaa, bushoo bi maneenaꞌona tookki wottebe.

³⁴ Bushoon daamaanoon ta nihoo waan aabichiree wottehote? Ta nihoo toommooch tunemmi ooge ayinoon beego taan shattiitone” iye.