Halloo 41 - Kafa Linguistics Project

Yooseefi Taatoochi Gumon Biisho

¹ Gutte nato beshetoyee gubb, Farooni gumon gummiye. Gumona Abbaayi aachi gashooch neexee bi beetaa,

² diqqich qeddi gaawe aangechi, shabaatte miiminaꞌo aacoochee kechiꞌi, aachi gasheexi mocoon maa beeheete.

³ Boonoshi hillooch wotta boonoshi qeddo shixxiiti, dallii muujjiti, bare shabaatte miiminaꞌo aacoochee kechiꞌi, aachi gashooch beeti aafi aangechinaꞌo gaꞌooch neexeheete.

⁴ Ebi boonoshi qeddo shixxiiti, dallii muujjiti, shabaatte miiminaꞌo ohe boonoshi qeddo gaaweti, aangechi, shabaatte miiminaꞌon billbillayii boonoshi maa beetaa, Farooni beeggiye. Ebina tokketoochee tiyiye.

⁵ Farooni wochinnoon tokketoo biin daamaa tokketehe; wotta bare gumon gummiye. Ebi gumona ikke maayi tuppooch aaf uuroo tuneti, gaawe shabaatte yilleenaꞌo kechiyeete.

⁶ Aroochee barahoochee yongeebeeti gaame yongo shuuꞌiito shaahiibeeti, taxxiti, bare shabaatte yilleenaꞌo kechiyeete.

⁷ Ebi taxxiti shabaatte yilleenaꞌo ohe gaawe shabaatteenaꞌon qooxxiyeete. Farooni tokketoochee tiyiꞌi gumon bi gumon ariihe.

⁸ Bi dechara Farooni oogeton keqqii xuuxehe. Ebich Gibitsee showoo bulliich beeti kaayechinaꞌonaa yiiteenaꞌo bullinon ceekkiiꞌi, bi gummiti gumon boonoshich maacciye; tunebaani ebi gumon biisho hakkito koniyoona aallehe.

⁹ Arooba xoofechinaꞌochi ukkiroo Faroonich ishichiye: “Ta doonocho, ta gondoon hanaach shalligiyoye.

¹⁰ Ikke wottoon taannaa kochi kachiyechinaꞌo ukkiroonochi toommooch kaaraꞌa, taatoo quyee naayinaꞌo iraashoochi kexooch noon ne cuchiihooba,

¹¹ ikke xumoon no guttoo gumon gummehone. Ebi no gumo baribare mooyon yechiti gumone.

¹² Ebiyooba taatoo quyee naayinaꞌo iraashoochi guuno tuneti, ikke Hibiree gurimaashoo noonna tookkii arooch cucheꞌi beehe. No gumon biich no maacaa, nooch biichiye.

¹³ Mooyo bi biichitoommon tunehe. Tawoo aafi ta ukkirittinooch wottehoye; kochi kachiyechinaꞌochi ukkiroo yoodaa qitiye” iye.

¹⁴ Farooniyoo Yooseefin boonoshi deebemmoyich gettiye. Cuyee kexoochee afaafinikkiꞌi deebiyeete. Yooseefi bi qelloon cakkee, bi tahoon shaddiꞌi, Farooni aafooch giddehe.

¹⁵ Farooniyoo Yooseefich “Gumon ta gumaa, ebi gumon biishon hakkimmi ikke asholla aallehe. Tunebaani gumon neech maacigaata, biichi hakkoo neech beemon waayeto taane” iye.

¹⁶ Yooseefiyoo Faroonich “Ta doonocho, taach biichi hakkoo aalloone; tunebaani neech gaaweti gommona Yeeri biichemmone” iye.

¹⁷ Ebiyee gubb, Farooni bi gummiti gumon Yooseefich ishichii maacciye: “Abbaayi aachi gashooch neexaa beehoye.

¹⁸ Qeddi gaawe aangechi, shabaatte miiminaꞌo aacoochee kechiꞌi, aachi gasheexi mocoon maa beeheete.

¹⁹ Boonoshi hillooch wotta boonoshi qeddo shixxiiti, dallii muujjiti, shabaatte miiminaꞌo kechiyeete. Ebiyoommi shixxiiti miimon Gibitsee showoo bulliich ciroona beeggaa ariyaache.

²⁰ Shixxiiti, dallii muujjiti, miiminaꞌo, shiichiꞌi kechiti, aangechi shabaatte miiminaꞌon billbillayii maaheete.

²¹ Boonoshi maatoyee gubb, aafi boonoshi dalloochee baraaneenaꞌo boonoshi tunetoyich, koniyoona boonoshi mamon ariyoon hakkaache. Ebina tokketoochee tiyoye.

²² “Ebiyoommon wotta wochinnoon tokketoo taan daammitoyee gubb, bare gumon gummoye. Ikke maayi tuppooch aaf uuroo tuneti, gaawe shabaatte yilleenaꞌon beeggoye.

²³ Aroochee bare maayi tuppooch barahoochee yongeebeeti gaame yongo shuuꞌiito shaahiibeeti, taxxiti, yiingitte shabaatte yilleenaꞌo kechiyeete.

²⁴ Yiingitte shabaatte yilleenaꞌo gaawe shabaatte yilleenaꞌon qooxxiyeete. Ebinoo kaayechinaꞌoyich gettoye; tunebaani koniyoona taach biishon hakkaanoone” iye.

²⁵ Yooseefiyoo Faroonich ishichiye: “Ebi gutte ne gumo ikkoone. Yeeri bi tuniiya ii beeti mooyoniye neech bi bekkiito.

²⁶ Gaawe, aangechi shabaatte miiminaꞌo geto, shabaatte nato getone; gaawe shabaatte yilleenaꞌo geto, shabaatte nato getone. Ebi gutte gumo ikkoonaa shaahoonane.

²⁷ Boonoshi hillooch kechiti, boonoshi qeddo shixxiiti, dallii muujjiti, shabaatte miiminaꞌo geto, shabaatte nato getone. Wotta taxxiti, barahoochee yongeebeeti gaame yongo shuuꞌiito shaahiibeeti shabaatte yilleenaꞌo geto, shaacoo tunemmi shabaatte nato getone.

²⁸ “Shiichaꞌa neech ta gettetoommon, Yeeri tuniiya bi ii beeti mooyon neech bekkiitone.

²⁹ Gibitsee showoo bulliich beddii echeti maayo shagaa, oogeti miyo tunemmi shabaatte nato woyemmone.

³⁰ Wotta ebiyee gubb, shabaatte nati shaacoo woyemmone. Ebi shaacoo ebiyee aafi shabaatte miyi naton battiito tunemmone. Shaacoo showoo bullin yexxemmone.

³¹ Miyi natinaꞌo hillooch woyemmi shaacee natinaꞌo oogeti kuppheenaꞌo boonoshi tunoochee tiyitona, shiichiꞌi besheti miyi natinaꞌon ciroona battiyemminaꞌone.

³² Ebi gumo guttaa bi bekketo, mooyo Yeer waanaa maacheto bi tunetoyichiye. Ebinoo Yeeri katini aabee daggooch ceechemmone.

³³ “Illa mullechonaa shalligechona tuneti ashoon qaawiree, Gibitsee showooch iraashiibe.

³⁴ Ebiyoommon shabaatte miyi nati daggooch daneebeeti maayoochee uuchoochee ikke beeroon kicemmi ukkireenaꞌon ukkiriibe.

³⁵ Boonoshiyoo woyemmi miyi natinaꞌo daggooch daneebeeti maayo bulliichee kicibeete. Katemi katemoona maayoon gotoona boonoshi kicemmonaa boonoshi quyemmonoyich, boonoshich ukkirittinoon imbe.

³⁶ Ebi kiceyemmi maayo Gibitsee showooch gubb woyemmi shabaatte shaacee natoobich, asheenaꞌoyich tunemmone. Ebiyoommi gommona Gibitsee asheenaꞌo shaacoona qitoochee muriccemminaꞌone” iye.

Yooseefi Gibitsee Iraashoo Tuno

³⁷ Ebi Yooseefi gettiti mooyo Farooninaa bi iraasheenaꞌona aafooch gaaweto tuneꞌi bekkehe.

³⁸ Ebich Farooni bi iraasheenaꞌoyich “Iberoon Yeerichi Ayaano bi toommooch beeti, ebiyoommi ashoon danoon hakkehone?” iye.

³⁹ Farooniyoo Yooseefin “Yeeri ebi bullin neech gaxxii bi bekkiitoyich, neenoommi mullechonaa shalligechona tuneti asho aalloone.

⁴⁰ Ta taatittinee showooch iraashebe. Ta asho bulli neech hajjeebe. Neyee ta beshemmo, ta taatee qeenona baachiye” iye.

⁴¹ Aroochee Farooni Yooseefin “Gibitsee showoo bulliich neen iraashiito taane” iye.

⁴² Farooniyoo bi kisheexi axxaammittee maatemoon kichii, Yooseefichi kishooch geddiye; muttee tuppoochee shippeti tahoon tajjiye; bi qettooch aachee sansalatoon tippiye.

⁴³ Bi hajjee guttinnee gaariich kotiihe. Taatoo quyee naayinaꞌo bi aaf shiichiꞌi hammiibee, “Goyinnebote; goyinnebote!” ii cookii beeheete. Yooseefiyoo Gibitsee showoo bulliich bi iraasheto ebiyoommi gommonane.

⁴⁴ Wotta Farooni Yooseefich ishichiye: “Ta Farooni taane; Gibitsee showoo bulliich beeti asho bulli ne daaggaani ikke mooyinona tuniyaaye” iye.

⁴⁵ Farooniyoo Yooseefin, Tsafinaat Faneehi ii shigiihe. Ebiyoommon wotta Heliyooti katemeexi qeeshoo Phoxifeerichi bushee Asenaatin Yooseefich shaakkiihe. Ebiyoommi gommona Yooseefi Gibitsee showoo bulliich iraashehe.

⁴⁶ Yooseefi Gibitsee taatoo aafooch neexeꞌi maddooch bi giyiyooba, shaashe nati ashoone. Yooseefi Farooni aafoochee kechiꞌi, Gibitsee showoo bullin guuddiye.

⁴⁷ Shabaatte miyi nati daggooch maayo gaawichii shaggiye.

⁴⁸ Ebi shabaatte miyi nati daggooch Gibitsee showooch shaggiti maayo bullin Yooseefi kiciiꞌi, katemi katemoona gotiihe. Ikkikke katemee guudoochee daneebeeti maayoon are katemooch bi kiceyemmoyich tuniihe.

⁴⁹ Yooseefi ebine, getaa haddoo hakkeyaani maayoon kiciihe; ebi maayi woddoochee tiyitona, qeellee haddoo hakkeyaano bi tunetoyich, qeellemmon qajjiye; baharee gasheexi qacee woddoommon woddetone.

⁵⁰ Shabaatte shaacee nato gimoyee shiichiꞌi, Yooseefi Heliyooti katemeexi qeeshoo Phoxifeeri bushee Asenaat waanee gutte anaami bushiishoon shiyihe.

⁵¹ Yooseefiyoo “Yeeri ta iritoo bullin, ta nihoo kexonoo ta battemmoyich tuniitone” iꞌi bi gutenee bushoon, Minaasi ii shigiihe.

⁵² Ebiyoommon “Iritoon ta beeggeti showoochaa Yeeri taan aafiite” iꞌi bi hilloon Efreemi iye.

⁵³ Gibitsee showooch tuneti shabaatte miyi nato beshehe.

⁵⁴ Shiichiꞌi Yooseefi gettitoommon, shabaatte shaacee nato giyiye. Bare showoo bulliichoo shaacoo giyitone; tunebaani Gibits maayo beetone.

⁵⁵ Gibitsee showoo bulliich shaacoo giyimmona, asheenaꞌo Faroonich “Maayo nooch ichebe” ii cookiyeete. Farooniyoo Gibitsee asheenaꞌo bullin “Yooseef waan hambote. Ittoshich bi gettimmonoo tuniibote” iye.

⁵⁶ Shaacoo Gibitsee showoo bullin yexxii yexxii bi hamaa, shaacoo ashoon oogeton bi yexxitoyich, Yooseefi goteenaꞌo bullin qechiiꞌi, maayo Gibitsee asheenaꞌoyich bi kecheyemmoyich tuniihe.

⁵⁷ Shaacoo bare showoo bullinoo bi yexxitoyich, bare showoo bulliichee asheenaꞌo Yooseef waanee maayoon kemeya Gibits waaheete.