Halloo 40 - Kafa Linguistics Project

Yooseefi Cucheti Asheenaꞌochi Gumon Biisho

¹ Ebi mooyoyee gubb, Gibitsee taatoochi xoofechinaꞌo ukkiroonaa kochi kachiyechinaꞌo ukkiroona taatoon ayinikkiibeeti mooyon tuniiheete.

² Farooni ebi ukkireenaꞌo toommooch oogeton ippee kaarehe.

³ Ebich Yooseefi cucheꞌi beeti, taatoo quyee naayinaꞌochi iraashoo kexooch daamaa boonoshi cucheyemmoyich tuniihe.

⁴ Taatoo quyee naayinaꞌochi iraashoo Yooseefichi kishooch boonoshin guudiihe. Yooseefiyoo boonoshich qaawiibeeti mooyona boonoshin gaachee beehe. Boonoshiyoo cuyee kexooch meeti aaboon koteheete.

⁵ Ebi cucheti, Gibitsee taatoochi xoofechinaꞌo ukkiroonaa koshon kachiyechinaꞌo ukkiroona ikke xumoon boonoshi qelli qellee gumon gummiyeete. Boonoshi gutti gumo barbariti mooyon yechiti gumone.

⁶ Bi dechara maaddoona Yooseefi boonoshi waan bi giyimmona, ayinii tuummiꞌi beetinaꞌon danehe.

⁷ Yooseefiyoo boonoshin ishichii echehe: “Hanaach ittoshi aafo aafichoommon bireyaanoon ittoshi ayiniibeeto, amoyichiye?” iye.

⁸ Boonoshiyoo “No qelli qellee gumon gummehone; tunebaani ebi gumon biishiree nooch gettemmi ashoon muccehone” iyeete. Yooseefiyoo “Gumon biichi ariyoon ashich immiibeeto Yeerine. Ebich ittoshi gummiti gumon taach getote” iye.

⁹ Uyee qoomechinaꞌochi ukkiroo bi gumon ishichii Yooseefich maacciye: “Gumona ta aafooch ikke woyinee qomboo beetaa beeggoye.

¹⁰ Ebi woyinee qomboo keejje atechone; nollii waajjeꞌi bekkech bungiye; aafee yuunjiꞌi gaangiye.

¹¹ Faroonichi uyee xoofoo ta kishooch beetone; ebi woyinee aafoon daammaa Faroonichi xoofooch hiiccaꞌa, bi kishooch immehoye” iye.

¹² Yooseefiyoo ishichiye: “Hini gumo ebine: Keejje woyinee qombee ato geto, keejje qemo getone.

¹³ Keejje qemi daggooch Farooni cuyee kexoochee neen kichemmone; aafi ne ukkirittinee xaaꞌooch neen wochemmone. Ebiyee aaf xoofechinaꞌochi ukkiroo tunaꞌa beebee ne tuniyaa beetoommon, Faroonichi uyee xoofoon bi kishooch immemmo neene.

¹⁴ Illa gaawe mooyo neech tunehooba, taan gabiree gaaweton taach tuniibe. Ta mooyon Faroonich getiree hini cuyee kexoochee ta kechemmoyich tuniibe.

¹⁵ Hibiree showoochee ta waato, giidoona yesheenane. Hiniich wotta cuchaꞌa ta beeto, ta shuuneti amee gondolla aallooniye” iye.

¹⁶ Kochi kachiyechinaꞌo ukkiroo woyinee xoofechinaꞌo ukkiroo gumo gaaweti gommona bi biichoon waayeꞌi, Yooseefich ishichiye: “Tawoo wotta gumon gummoye. Keejje gemoona koshon ta qellooch shaaggaꞌa beehoye.

¹⁷ Toommeexi gemooch Faroonich kachiti baribare kosho beetone. Gaceenaꞌo ta shimbeexi gemooch beeti koshoochee maa beeheete” iye.

¹⁸ Yooseefi ishichiye: “Hini gumo ebine: Keejje gemoo geto, keejje qemo getone.

¹⁹ Keejje qemi daggooch Farooni cuyee kexoochee neen kichemmone; ne qettoonoo kuxiree ne dubenoon mixooch yooddemmone; gaceenaꞌoo ne meenon maayemminaꞌone” iye.

²⁰ Keejjinnee qemooba Farooni bi shiijjee aabee baarooba, gifiroo geddiꞌi, bi iraashoo bullin ceekkiihe. Uyee qoomechinaꞌochi ukkiroonaa koshon kachii beetinaꞌochi ukkiroonon cuyee kexoochee kichiiꞌi, iraasheenaꞌo aafooch boonoshi neexemmon tuniihe.

²¹ Aroochee xoofechinaꞌochi ukkiroon aafi bi ukkirittinee xaaꞌooch wochiye; biyoo wochinnoon uyoon Faroonich qoomooch giyiye.

²² Tunebaani kochi kachiyechinaꞌochi ukkiroon yooddiye. Boonoshi gumo Yooseefi biichitoommon tunehe.

²³ Tunetaa xoofechinaꞌochi ukkiroo Yooseefin battehani, ciroona shalligaanoone.