Halloo 37 - Kafa Linguistics Project

Yooseefinaa Bi Maneenaꞌonochi Mooyo

¹ Yaaqobi ebiyee aaf bi nihoo beebee echeti Kanaanee showooch kotehe.

² Yaaqobi kechi asheenaꞌo mooyo ebine. Yooseefi aaraa shabaatte nati bushoo bi beehooba, bi nihoochi naamacheenaꞌo Biilinaa Zilifina waanee shiijjeti bi maneenaꞌona tookkii bi nihoochi bageenaꞌonaa emmisheenaꞌonon quyee beehe. Biyoo bi maneenaꞌo tuniiti gonde mooyon bi nihoyich gettiye.

³ Israꞌeeliyoo geenoochaa bi shiyiti bushoo bi tunetoyich, Yooseefin bare bi bushiishoo bulliyee beshiiꞌi shunniye. Mallet gaawe, kisha genje kittoon biich kochii tajjiye.

⁴ Boonoshi nihoo Yooseefin boonoshiyee beshoon bi shunon bi maneenaꞌo beeggiꞌi, Yooseefin shixxiyeete. Gaawe noonoona biinna tookkii yibbaato qajjiyeete.

⁵ Ikke areddoon Yooseefi gumon gummiye. Bi maneenaꞌoyich bi maacaa, aafichoyee beshoon biin shixxiyeete.

⁶ Biyoo ishichiye: “Ta gummeti gumon ta maacaa waayebote.

⁷ No bulli budoochaa teepphoon qiraa beehone. Ta qiriti qiroo gellimmii neexehe; ittoshi qiriti qireenaꞌo taachochi guudoona neexeechii, biich goyinneheete” iye.

⁸ Bi maneenaꞌoo “Iberoon no toommooch taateree noon hajjiyane ne gabaabeeto?” iyeete. Bi gumichonaa bi gettiti mooyochonoyich aafichoyee beshoon biin shixxiyeete.

⁹ Wochinnoon bare gumon gummiye. Bi maneenaꞌoyich ishichii maacciye: “Wotta bare gumon gummoye. Aabe, ageneenaa aaraa ikke xojjeneenaꞌona taach goyinnee beetaa beeggoye” iye.

¹⁰ Ebi bi gumon wotta bi nihoyich bi maacee, bi nihoo “Ebi ama geti gumone? Iberoon taannaa ne indeena, ne maneenaꞌoo ne aafooch yitiree neech goyinnehone?” ii kaarehe.

¹¹ Bi maneenaꞌo biin qanaateheete; tunebaani bi nihoo ebi mooyon bi maacoona yechiye.

Bi Maneenaꞌo Yooseefin Kemo

¹² Ebiyee gubb, Yooseefichi maneenaꞌo boonoshi nihoochi bageenaꞌonaa emmisheenaꞌonon quyoyich Shekeemi gaꞌooch hammiyeete.

¹³ Israꞌeeliyoo Yooseefich ishichiye: “Ne maneenaꞌo bageenaꞌonaa emmisheenaꞌonon Shekeemi gaꞌooch quyee beetinaꞌone. Ebich ne waataa boonoshi waan neen wochebona” iye. Yooseefiyoo deꞌa iye.

¹⁴ Yaaqobiyoo Yooseefin “Hamiree ne maneenaꞌonaa boonoshi quyeebeeti gijjeenaꞌonochi diggoon beegiree wobe” ii Kebirooni bamboochee wochee daachiihe. Yooseefiyoo Shekeem hammii shaggiye.

¹⁵ Gaddooch okk hach wottee guuddii bi beetaa, ikke uro biin beeggiꞌi, “Amooniye ne qaawaabeeto?” ii echehe.

¹⁶ Biyoo “Ta maneenaꞌoniye ta qaawaabeeto; boonoshi bageenaꞌonaa emmisheenaꞌonon aabiich boonoshi quyeebeeto gaata doogena taach gete” iye.

¹⁷ Uroo “Hiniichee hammitinaꞌone. ‘Dotaan hambone’ boonoshi ii beetaa waayeto taane” iye. Ebich Yooseefi bi maneenaꞌon dabbiꞌi arooch hammiye. Dotaani katinooch beetinaꞌon danehe.

¹⁸ Bi maneenaꞌo Yooseefi boonoshi waan waa bi beetaa wohoochaa beeggiyeete. Boonoshi waan bi shagoyee shiichiꞌi, biin wuxoyich koceebee,

¹⁹ boonoshinaa boonoshina ishichiyeete: “Are gumi gummecho and waa beetone.

²⁰ Ittoshi waataa wuxiree ikke oppooch dufone. Aroochee ‘Gonde cooxo kuxxii maatone’ gettemmo noone. Eke bi gummiti gumo tunetaa beeggemmo noone” iyeete.

²¹ Tunebaani Roobeeli ebi kocoon waayeꞌi, boonoshi kishoochee Yooseefin wodiiya gabiye. Ishichiinoo iye: “Bi kasho no kishoona kechaaye.

²² Ashi damoon ukkiyaahote. Hini baraheexi oppooch dufotani, bi toommooch bare mooyon tuniyaahote” iye. Roobeeli bi ishichito, Yooseefin boonoshi kishoochee wodiiree, bi nihoo waan wochiya bi qaawitoyichiye.

²³ Yooseefi bi maneenaꞌo waan bi shaggimmona, bi taheti, mallet gaawe, kisha genje kittoon shoottiyeete.

²⁴ Biinoo yechii daammii oppooch duppiyeete. Oppoo aachaalli shuuꞌone.

²⁵ Maayoon maaya koteechii, wokkii ciinniꞌi, Gilaadee showoochee waabeeti, giixechi Ishmaꞌeeleenaꞌon beeggiyeete. Ebi are giixechinaꞌo shitto, huuteebeeti attoonaa hareboonon boonoshi gaaleenaꞌooch xaaniꞌi, Gibitsee showooch dugilla hammii beeheete.

²⁶ Yihudi bi maneenaꞌoyich ishichiye: “No manoon wuxaa bi qitoon no oppo, nooch amooniye bi gaaccesho?

²⁷ Ebiyee hini waabeeti giixechi Ishmaꞌeeleenaꞌoyich kembone; bi toommooch gondoon shuunaayone. Amoommon bi tunetaanoona, no manoone; no hajjee meenone” iye. Ebina bi maneenaꞌo ebi bi gaboon tunebe iyeete.

²⁸ Ebich Miidiyamee giixechinaꞌo waaꞌi boonoshi beetooch shaggimmona, bi maneenaꞌo Yooseefin oppoochee geechii kichiꞌi, Ishmaꞌeeleenaꞌoyich hiye birewoona kemmiyeete. Boonoshiyoo Yooseefin Gibitsee showooch daammiyeete.

²⁹ Roobeeli oppo beetooch wottee hammii ciinniꞌi, Yooseefin muccehe. Ebich bi tahoon keexxiye.

³⁰ Bi maneenaꞌo waan wottee waaꞌi, “Bushoo oppooch aalloone. Aabichishiye ta gettemmo?” iye.

³¹ Aroochee ikke emmishoon guuriꞌi, Yooseefichi kittoon damooch hacciyeete.

³² Mallet gaawe, kisha genje bi kittoon daammii, boonoshi nihoyich “Ebi no daneti kittoo ne bushoocho bi tunoonaa tunee qayonon xiishibe” iyeete.

³³ Yaaqobiyoo ebi kittoon ariiꞌi, “Hini ta bushoo kittoone. Gonde cooxone biin maato; iberoon Yooseefin cooxone yangixxii maato” iye.

³⁴ Arooba Yaaqobi bi tahoon getoochaa keexxiye; dookoon taheꞌi, meeti areddoon eeppii muushenehe.

³⁵ Bulli bi anaami bushiishoonaa maache bushiishoona biin goggiiya bi waan waaheete. Tunebaani goggemmon mawiihe. “Muushenebee ta bushoo waan, maash hammemmo taane” iye. Bi bushoyichoo eeppiye.

³⁶ Ebiyooba Miidiyamee showeexi giixechinaꞌo Yooseefin Gibits daammiꞌi, Faroonichi iraasheenaꞌo daggoochee ikkoo tuneti, taatoo quyee naayinaꞌochi iraashoo Phoxifaarich kemmiyeete.