Halloo 35 - Kafa Linguistics Project

Yeeri Yaaqobin Beeteelaa Diiroo

¹ Aroyee gubb Yeeri Yaaqobich ishichiye: “Tiyiree Beeteel hambe; aroochoo kotebe. Ne manoo Esayi aafoochee ne maxxehooba, neech bekketi Yeeri taach deejjee gudoon shuunebe” iye.

² Ebich Yaaqobi bi kechi asheenaꞌonaa biinna tookkii beetinaꞌo bullinoyich ishichiye: “Ittoshi waan beeti dallaawe nuggisheenaꞌon ittoshi waanee wokkiibote; xallebote; ittoshi tahoon shaddibote.

³ Ittoshi tiyaa Beeteel keyone. Ta iriteehooba, ta qolloon waayeti, ta hammeti gommo bulliich taanna tookkii tuneti Yeerich aroochaa deejjee gudoon shuunemmo taane” iye.

⁴ Ebich boonoshi waan beeti dallaawe nuggisheenaꞌochi shahalloo bullin, boonoshi waameexi gudichoonoo kichii Yaaqobich immiyeete. Yaaqobiyoo eboshin daammii Shekeemi katemee gaꞌooch beeti ogooge michi xepphooch duukkiye.

⁵ Aroochee are xaaꞌoon gawukkii hammiyeete. Yeeriyoo boonoshi guudoona beeti katemeenaꞌooch beeti asheenaꞌo bulli toommooch oogeti shaton bi kindiitoyich, Yaaqobinaa bi bushiishoonon yookkii dabbito koniyoona aalloone.

⁶ Yaaqobinaa biinna tookkii beeti asheenaꞌo bullina Kanaanee showooch beeti, and Beeteeli getteebeeti Luuza shaggiyeete.

⁷ Yaaqobi arooch deejjee gudoon shuunehe. Biyoo bi manoo aafoochee bi maxxehooba, Yeeri aroochaa biich bi bekketi xaaꞌoo bi tunetoyich, ebi xaaꞌoon, El Beeteeli ii shigiihe.

⁸ Ebiyooba Ribiqichi dichindee Diiboori qitiyan. Beeteeli katemoyee desh beeti, ooge michi xepphooch duukkahan. Ebi xaaꞌoo, Aloon Bakooti getaa ceekkehe.

⁹ Yaaqobi Mesopotaamee Beeteel bi wottetoyee gubb, Yeeri wochinnoon biich bekkeꞌi biin diiriye.

¹⁰ Yeeriyoo Yaaqobin “Ne shigo Yaaqobine. Tunebaani ebiyee bekk ne shigo, Israꞌeeli getteebani, Yaaqobi getaa ceekkaye” iye. Ebich bi shigoon, Israꞌeeli ii shigiihe.

¹¹ Yeeriyoo daakkiꞌi Yaaqobich ishichiye: “Beshe Hakkechi Nuggishoo taane. Shiyi shiijjerebe; meete. Ne shiijjeroochee meeti aagetoo kechemmone. Taateenaꞌo ne waanee shiijjemminaꞌone.

¹² Abrahaminaa Yisaaqinoyich ta immeti showoon neech immemmo taane; neyee gubbi ne shiijjereenaꞌoyichoo hini showoon immemmo taane” iye.

¹³ Yeeriyoo Yaaqobina tookkii bi yibbaateti xaaꞌoochee tiyii, biyee barii hammiye.

¹⁴ Yaaqobiyoo Yeeri biinna tookkii yibbaateti xaaꞌooch xaqqee giimboon neechiye; uyee deejjoon bi toommooch ukkiye; zayitoonoo wotta ukkiye.

¹⁵ Yaaqobiyoo Yeeri biinna tookkii yibbaateti xaaꞌoon, Beeteeli ii shigiihe.

Raaheeli Qitoo

¹⁶ Boonoshiyoo Beeteelee tiyii qaxiriyeete. Efiraata shagg boonoshi beddimmona, Raaheelin maaxoo maahe; maaxoonoo xuuxahan.

¹⁷ Maaxoona xuuxaa bi beetaa, yechaa shiijjechi “Shattaahine; bare anaami bushoon shiyane ne ii beeto” iyan.

¹⁸ Raaheeliyoo bi kasho kecha qettooch shaggimmona, bushoo shigoon, Been Ooni iyan; tunebaani bushoochi nihoo, Biiniyaami iye.

¹⁹ Raaheeliyoo qitiyan. Efiraata daammiibeeti gommi gashooch duukkahan. Efiraati and Beetilehemi gettee beetone.

²⁰ Yaaqobiyoo xaqqee giimboon tiijjii, Raaheeli maashee oppee toommooch neechiye. Hanaach beddaahaa Raaheeli maashee malletoo ebi are xaqqoone.

²¹ Israꞌeeliyoo aroochee tiyii qaxiriye. Bi duukkaanoon Edeeri dilaaloyee beqach xogiye.

Yaaqobichi Anaami Bushiishoo Shigo

²² Are showooch boonoshi beetaa, Roobeeli bi nihoo naamache Biilin qeyiye. Israꞌeeliyoo ishin waayehe. Yaaqobichoo aaraa gutte anaami bushiisheenaꞌo beetinaꞌone.

²³ Liyi bushiishoo: Yaaqobichi gutenee bushoo Roobeeli, Simooni, Lewi, Yihudi, Yisakoorinaa Zebulooninane.

²⁴ Raaheeli bushiishoo Yooseefinaa Biiniyaaminane.

²⁵ Raaheelichi gonnee Biili bushiishoo: Daaninaa Nifitaalinane.

²⁶ Liyichi gonnee Zilifi bushiishoo: Gaadinaa Aseerinane. Eboshi Mesopotaamee showooch beebee, Yaaqobi shiyiti anaami bushiishoone.

Yisaaqi Qitii Duukko

²⁷ Yaaqobiyoo and Kebirooni getteeti Qiriyaat Aribi gaꞌooch beeti Mamiri gorooch, bi nihoo Yisaaq waan wottee waahe. Ebi xaaꞌoo ebiyee aaf Abrahaminaa Yisaaqina beebee echeti xaaꞌoone.

²⁸ Yisaaqi balli shinna nattiye.

²⁹ Geenee baayeꞌi qitiye; bi kasho abbetehe; qititi bi asheenaꞌo waan xaꞌeehe. Bi bushiisheenaꞌo Esayinaa Yaaqobina biin duukkiyeete.