Halloo 34 - Kafa Linguistics Project

Diini Shocheyoo

¹ Ikke areddoon Liyi Yaaqobich shiyeti maache bushee Diini are showeexi maacheenaꞌon beegga kechahan.

² Are showee iraashoo tuneti, Hiwee asho Hamoorichi bushoo Shekeemi busheen bi beeggiyooba, giidoona yechii qeyiye.

³ Kashoona busheen shunniye; busheenoo maanjii yibbaatehe.

⁴ Shekeemiyoo bi nihoo Hamoorin “Hini busheen ta shaaggemmoyich tuniibe” iye.

⁵ Yaaqobiyoo bi bushee Diinin Shekeemi giidoona bi yeshon waayehe. Ebiyooba Yaaqobichi anaami bushiisheenaꞌo bi gijjeenaꞌon gaddooch quyee beeheete. Ebich Yaaqobi bi bushiishoo waammi wottoon cikkii beehe.

⁶ Arooba Shekeemichi nihoo Hamoori Yaaqobin yibbaatiiya waahe.

⁷ Yaaqobi bushiisheenaꞌo ebi tuneti mooyon waayeꞌi gaddoochee bekkech waaheete. Shekeemi Yaaqobi busheen giidoona bi yeshona tun bedaani, yeelliibeeti mooyon Israꞌeelee yareenaꞌo toommooch bi tuniitoyich, oogeton ayiniyeete; oogetonoo ippee shineheete.

⁸ Tunebaani Hamoori boonoshich ishichiye: “Ta bushoo Shekeemi ittoshi busheen oogichii shunnitone; doogena bi shaaggemmoyich daaggibote.

⁹ Naachebone; ittoshi maache bushiishoon no anaami bushiishoyich imbote. Ittoshiyoo no maache bushiishoon ittoshi anaami bushiishoyich daambote.

¹⁰ Noonna tookki no showooch kotebote; ittoshi shunnimmi xaaꞌooch kotebote; beebote; giixebote. Ittoshi hajjoo tuneti showoon yeshote” iye.

¹¹ Shekeemi wotta bi nihoona tookkii beetone. Biyoo Diinichi nihoonaa maneenaꞌonoyich ishichiye: “Gaawe aafoona baach taan ciinotani, ittoshi echemmo bullin immemmo taane.

¹² Xilooshoon tuneba wojjoon, ittoshi qaawitoommon echebote. Busheen baach ta shaaggemmoyich daaggibotani ittoshi echemmon immemmo taane” iye.

¹³ Yaaqobichi anaami bushiisheenaꞌo boonoshi manee Diini toommooch tuneti, yeelliibeeti mooyon boonoshi mulloona yechiichii, Shekeeminaa bi nihoo Hamoorinon mariꞌi,

¹⁴ ishichiyeete: “No maneen dokireyaani ashich imo nooch hakkeyaani mooyone; oogeton yeelliibeeti mooyon nooch tunemmone.

¹⁵ Deꞌa no gettemmo, noochoommon ittoshi anaaminaꞌo bulli dokireegaata baachiye.

¹⁶ No maache bushiishoon ittoshi anaami bushiishoyich no immemmo, ittoshi maache bushiishoonoo no anaami bushiishoyich no deebemmo, ikke ashoonoo tuneree ittoshina tookki no beeyemmo, ebiyee gubbiye.

¹⁷ Tunebaani no gettaa beeton waayeꞌi dokireyoo ittoshi qayigaata, no busheen yeshiree hammemmo noone” iyeete.

¹⁸ Ebi boonoshi gettiti mooyo Hamoorinaa bi bushoo Shekeeminoyich gaaweto tunee bekkehe.

¹⁹ Shekeemiyoo Yaaqobi busheen oogeton bi shunnitoyich, boonoshi gettito bullin yagaanoon tuniyoyich giyiye. Biyoo bi nihoo kechi asheenaꞌo daggooch boonoshi oogiibeeti bushoone.

²⁰ Ebich Hamoorinaa bi bushoo Shekeemina ebin are katemeexi boonoshi asheenaꞌoyich getoyich, boonoshi katemee kellooch hammiyeete; ishichiinoo iyeete:

²¹ “Hini asheenaꞌo noonna shunechi asheenaꞌone. No showee daggooch beebeete; giixebeete; boonoshi kotemmoyich showoo gaminoone. Boonoshi maache bushiishoon no anaami bushiishoyich deebone; no maache bushiishoonoo boonoshi anaami bushiishoyich imbone.

²² Tunetaa ebi asheenaꞌo noonna tookki ikke asho tuneree beemoyich boonoshi deꞌa gettemmo, ikke mooyon no tuniigaata baachiye; ebiyoo no anaaminaꞌo bulli boonoshichoommon dokiree gaatane.

²³ Ebin no tuniigaata, boonoshi gijjoonaa boonoshich beeto bullina noocho tunemmone. Noonna tookki boonoshi kotemmoyich, ebi mooyona baach boonoshich deꞌa getone” iyeete.

²⁴ Katemee kellooch kiceeti asheenaꞌo bulli Hamoorinaa bi bushoo Shekeemina gettiton deꞌa iyeete; katemooch beeti anaaminaꞌo bulliyoo dokireeheete.

²⁵ Keejjinnee qemooba asheenaꞌo batt mayeꞌi beetaa, Diinichi maneenaꞌo, Yaaqobichi gutte bushiisheenaꞌo, Simooninaa Lewina boonoshi goraadoon yechiꞌi, diqqoona katemooch giyiyeete; anaaminaꞌo bullinoo wuxii ciichiyeete.

²⁶ Hamoorinaa bi bushoo Shekeeminon goraadoona wuxiyeete. Boonoshi manee Diininoo Shekeemi kexoochee yechii katemoochee kechiyeete.

²⁷ Ebiyee gubb, echeti Yaaqobi bushiisheenaꞌo boonoshi manee toommooch tuneti, yeelliibeeti mooyoyich nichoon kichoyich qititi asheenaꞌo waan waaꞌi, are katemooch beeti mooyo bullin hokkii daammiyeete.

²⁸ Bageenaꞌonaa emmisheenaꞌonon, miiminaꞌon, kureenaꞌon, are katemoonaa bi guudoonooch beeto bullinoo daammiyeete.

²⁹ Are asheenaꞌochi gijjoo bullin, boonoshi maacheenaꞌonaa bushiisheenaꞌo bullinon keccii, kexi kexoochee daneto bullin yechii hammiyeete.

³⁰ Yaaqobiyoo Simooninaa Lewinoyich ishichiye: “Hini showooch beeti Kanaaneenaꞌonaa Ferizeenaꞌona waanaa ta shigo gondemmoyich tuniiꞌi, ta toommooch xuuxoon deebiyote. No, haddoona giishecho noone. Ikkottee ta toommooch boonoshi tiyigaata, taannaa ta kechi asheenaꞌona aallesh toone no gettemmo?” iye.

³¹ Tunebaani Lewinaa Simoonina “Ishigaata, no maneen yahechin yeshoommon yesha?” iyeete.