Halloo 33 - Kafa Linguistics Project

Yaaqobi Esayina Dano

¹ Yaaqobi kaama ciinniꞌi, Esayi awudde balle asheenaꞌon dabbiiꞌi waa beeton beeggiye. Yaaqobi bi bushiishoon qoodii qoodiꞌi, Liyi waan, Raaheelinaa gutte gonneenaꞌona waan tuniihe.

² Gonneenaꞌonaa boonoshi bushiishoonon aaf shiichiihe. Liyinaa bi bushiishoonon aree hillooch tuniihe. Raaheelinaa Yooseefinonoo gubbi ciirooch tuniihe.

³ Biyoo bulliyee aaf shiichii hammiye. Bi manoo waan bi shaggimmi wottoon, shabaatte wottoon showooch guufeꞌi goyinnehe.

⁴ Esayi Yaaqobina daneya wocciye; qettoona tiqqeꞌi shummiye; eefeenoo iyeete.

⁵ Aroochee Esayi kaameꞌi genneenaꞌonaa bushiisheenaꞌonon ciinniye. Biyoo “Ebi neenna tookkii beetinaꞌo koni konine?” iye. Yaaqobiyoo “Yeeri bi deꞌittinoona ne guuno taach immiti ta bushiishoone” iye.

⁶ Gonneenaꞌonaa boonoshi bushiishoona giddeꞌi, Esayich goyinneheete.

⁷ Wotta Liyinaa bi bushiishoona giddeꞌi goyinneheete. Ciiroochaa Raaheelinaa Yooseefina giddeꞌi goyinneheete.

⁸ Esayiyoo “Ta waan gashetaa waati, ebi shaahe gijjoo ameechone?” iye. Yaaqobiyoo “Ta doonocho, ne aafooch gidoon danoyich ta deejjitone” iye.

⁹ Esayiyoo “Ta manoocho, taach ta hajjoo meeto beetone; neecho neech tunebe” iye.

¹⁰ Yaaqobiyoo “Ebi toonoone. Ne aafooch gidoon ta danegaata, ta mattaayoon deꞌe. Gaawe aafoona taan ne ciinaa neenna danoon ta hakkoo, taach Yeeri aafoon ciinoommone.

¹¹ Yeeri bi deꞌittinoona taach qaawiibeeto bullin ceechiꞌi immitone. Doogena neech ta giddiiti mattaayoon deꞌe” iye. Yaaqobi qollee iritiitaa, Esayi ebi mattaayoon deqqiye.

¹² Esayi “Ne tiyaa no gommon qaxiribone. Tawoo neyee aaf shiichemmo taane” iye.

¹³ Tunebaani Yaaqobi ishichiye: “Ta doonocho, ebi ne beeggaa beetoommon, ta bushiisheenaꞌo batt kuppheyaaneenaꞌone. Xaachiibeeti bagee indeenaꞌonaa miinji indeenaꞌonon shiimeebee daamo taach qaawiihe. Gijjeenaꞌo ikke areddoonona afaafinikkaa boonoshi gasheegaata, bulli qiti ciiremminaꞌone.

¹⁴ Ebich ta doonocho, ne shiichiree hambe. Ta doono ne waan Seyir ta shaggemmi wottoon, gijjeenaꞌonaa bushiisheenaꞌonochi shaꞌoon dabbiree nibboona hammemmo taane” iye.

¹⁵ Esayiyoo “Ishigaata, ta asheenaꞌoochee giishechoon neech echiibona” iye. Yaaqobiyoo “Qaawiyaache; ta doono ne aafoochaa baach gidoon danebona” iye.

¹⁶ Ebich Esayi arooba bi hilla wottee Seyir hammiye.

¹⁷ Tunebaani Yaaqobi Seyir hamaanoon, Kanaanee showooch beeti, Sukoot hammiye. Arooch biich kexon haggiye; bi gijjeenaꞌoyichoo bashoon bashiye. Ebich ebi xaaꞌoo, Sukooti getaa shigehe.

¹⁸ Yaaqobi Mesopotaamee bi wottetoyee gubb, Kanaanee showooch beeti, Shekeem diggoona shaggiye. Katemee ciinooch bi duukkaanoon xogii kotehe.

¹⁹ Duukkaanoon bi xogiti xaaꞌeexi, goyee budon Shekeemichi nihoo Hamoori bushiishoo waanee balle xure birewoona kemehe.

²⁰ Aroochoo deejjee gudoon shuuneꞌi, aroon El Eloohee Israꞌeeli ii shigiihe.