Halloo 30 - Kafa Linguistics Project

¹ Raaheeli Yaaqobich ikke bushoonolla shiyaane bi tunetoyich, bi maneen qanaatahan. Ebich Yaaqobin “Bushoon taach imbe; ebi tuno qayigaata, qitemmi taane” iyan.

² Yaaqobiyoo Raaheelin oogichii kaareꞌi, “Ta, ne maacoon dookkiti Yeeri taane?” iye.

³ Raaheeliyoo, “Ebiyoche, ta gonnee Biili beetine. Bi waan gibe; ta qoodoon shibuye; bi shiyemmi bushiishoo ta bushiishoo tunebe” iyan.

⁴ Raaheeli bi gonnee Biilin mechee tuniyaꞌa Yaaqobich immahan. Yaaqobiyoo bi waan giyiye.

⁵ Biili xifaa anaami bushoon Yaaqobich shiyahan.

⁶ Raaheeliyoo “Yeeri taach nallite; ta qolloon waayeꞌi anaami bushoon taach immite” iyan. Ebich ebi bushoo shigoon, Daani iyaa shigiihan.

⁷ Raaheelichi gonnee Biili wochinnoon xifaa guttinnee anaami bushoon Yaaqobich shiyahan.

⁸ Raaheeliyoo “Kupphe qiiccoon ta maneena qiiccaꞌa wochite” iyan. Ebich bushoo shigoon, Nifitaali iyaa shigiihan.

⁹ Liyiyoo bushee shimon neechiti bi tunoon ariyaꞌa, bi gonnee Zilifin mechee tuniyaa Yaaqobich immahan.

¹⁰ Zilifiyoo xifaa anaami bushoon Yaaqobich shiyahan.

¹¹ Liyiyoo “Ye ixee gaawo!” iyaa bushoo shigoon, Gaadi iyan.

¹² Liyichi gonnee Zilifi wochinnoon xifaa guttinnee anaami bushoon Yaaqobich shiyahan.

¹³ Liyiyoo “Am shaahoon taan emirikkite. Illa maacheenaꞌo taan emirechi gettemminaꞌone” iyan. Ebich bushoo shigoon, Aseeri iyaa shigiihan.

¹⁴ Teepphoo qecceebeeti goorooch Roobeeli budooch hammiye. Dudayimoon daneꞌi deebii bi indee Liyich immiye. Raaheeliyoo Liyin “Doogena ne bushoo deebiti dudayimoochee taach imbe” iyan.

¹⁵ Liyiyoo wochaꞌa, “Ta kenoon ne bogo giishetenane, wotta ta bushoo taach deebiti dudayimoon ‘Taach imbe’ ne ii beeto?” iyan. Biyoo “Ne bushoo deebiti dudayimoochee taach ne imiichaa, Yaaqobi hanaach ne waan qebe” iyan.

¹⁶ Yaaqobi xum budoochee bi waataa, Liyi kechaa biinna danaꞌa ishichiyan: “Ta bushoo dudayimoona hanaachich neen ta kemetoyich, ta waaniye ne qeyemmo” iyan. Yaaqobiyoo aroobee xum Liy waan giyii qeyiye.

¹⁷ Yeeriyoo Liyichi qolloon waayehe. Biyoo xifahan; uuchinnee anaami bushoon Yaaqobich shiyahan.

¹⁸ Liyiyoo “Ta gonneen ta kenoyich ta immetoyich, Yeeri taach qoccite” iyan. Ebich bushoo shigoon, Yisakoori iyaa shigiihan.

¹⁹ Liyi wotta xifahan; shirittinnee anaami bushoon Yaaqobich shiyahan.

²⁰ “Yeeri gaawe bi wojjoon taach immite. Biich shiritte anaami bushiishoon ta shiyetoyich, illa ta keno taan oogiyemmone” iyan. Ebich bushoo shigoon, Zebulooni iyaa shigiihan.

²¹ Aroyee gubb maache busheen shiyahan; bi shigoonoo, Diini iyaa shigiihan.

²² Yeeriyoo Raaheelin gabiye; bi qolloon waayeꞌi, bi shiyemmoyich bi maacoon qechiye.

²³ Biyoo xifaa anaami bushoon shiyahan. “Yeeri ta yeelloon ta waanee wokkiite” iyan.

²⁴ “Doono Yeeri guttinnee anaami bushoon taach daakkibe” iyaa bushoo shigoon, Yooseefi iyan.

Yaaqobi Bi Shumaayechon Labaanina Tookkii Yibbaato

²⁵ Raaheeli Yooseefin bi shiyetoyee gubb, Yaaqobi Labaanich ishichiye: “Aaf ta waati ta kexonaa ta showoonooch wotteree ta hammemmoyich daaggibe.

²⁶ Am shaahoon neech ta maddeto gaata ariibeeto neene; boonoshicha iyaa neech ta maddeti ta mecheenaꞌonaa ta bushiishoonon taach ne imaa hambona” iye.

²⁷ Labaaniyoo “Eke ikke mooyon neech getona. Doono Yeeri ne naboona taan bi diiroon ta nuggisheenaꞌo taach bekkiitinaꞌone.

²⁸ Ta waanee ne qaawaabeeti shumaayoon gete. Ta aroon neech immemmo taane” iye.

²⁹ Yaaqobiyoo ishichiye: “Am shaahoon neech ta maddeto gaata, ne gijjeenaꞌon aabichaꞌa shiimaa ta quyeto gaata ariibeeto neene.

³⁰ Ta womoyee aaf, neech beeti gijjeenaꞌo giishecheenaꞌone. And oogeton meettitinaꞌone. Ta naboona Doono Yeeri neen diiritone. Ishigaata, ta hajjee kexoyich ta shuunemmo aatane?” iye.

³¹ Labaaniyoo “Amoon neech imbote?” ii echehe. Yaaqobiyoo ishichiye: “Amoonolla taach immaahine. Neen ta echemmi ikke mooyon baach ne tuniigaata, wochinnoon ne bageenaꞌonaa emmisheenaꞌonon quyemmo taane.

³² Hanaach ne bageenaꞌonaa emmisheenaꞌona daggooch guudiree, bageenaꞌo daggoochee kushaakusheenaꞌon, bureenaꞌonaa aaꞌinaꞌonon, ebiyoommon emmisheenaꞌo daggoochee kushaakusheenaꞌonaa bureenaꞌonon badd kichemmo taane; eboshiyoo ta shumaayoo tunebeete.

³³ Ebich gubb ta shumaayoon haddoyich ne waahooba, gibeneeto ta tunoon ariyoon hakkemmo neene. Emmisheenaꞌo daggoochee kushaakushoonaa buroona woyee ta bagee baaddeenaꞌo daggoochee aaꞌo tuneyaano bi danegaata, gaayoon tuniiree taan haddibe” iye.

³⁴ Labaaniyoo “Deꞌa, gaawiye. Ne gettetoommon tunebe” iye.

³⁵ Tunebaani arooba Labaani koorechinaꞌonaa bureenaꞌona tuneti emmishee baaddeenaꞌo bullin, ebiyoommon wotta maache emmisheenaꞌo daggoochee, kushaakusheenaꞌonaa bureenaꞌo bullinon, amee naccolla boonoshi qeddooch beetinaꞌo bullin, bagee baaddeenaꞌo daggoochee aaꞌinaꞌo bullin bariiꞌi, bi anaami bushiishoona quyiihe.

³⁶ Aroochee Labaani biinnaa Yaaqobina daggooch keejje qemi gommon wokkii geddiye. Echeti Labaanichi bageenaꞌonaa emmisheenaꞌonon Yaaqobi quyee beehe.

³⁷ Aroochee Yaaqobi maacaa naccoo tuneti mixinaꞌoochee gaare gumbeenaꞌon deebiye. Gumbeexi naccoo bekkemmoyich tunii, gumboon shachiye.

³⁸ Bageenaꞌonaa emmisheenaꞌona aacon ucha waabee boonoshi ciinnemmoyich, ebi bi shachiti gumbeenaꞌon aachi goonee daggooch, boonoshi ciinooch geddiye. Aacon ucha boonoshi waa beehooba, helliꞌi shuggee beeheete;

³⁹ gumbeenaꞌo aafoochaa shuggeeꞌi, koorechinaꞌon, kushaakusheenaꞌonaa bureenaꞌonon shiyiheete.

⁴⁰ Yaaqobiyoo ebi bagee baaddeenaꞌon bara geddiye; echetinaꞌonoo Labaanichon tuneti koorechinaꞌonaa aaꞌinaꞌonochi ciinooch neechiye. Ebiyoommona bageenaꞌon biich meechiye; areenaꞌonoo Labaanichinaꞌoyee bariihe.

⁴¹ Wode ceene bageenaꞌonaa emmisheenaꞌona gumbeenaꞌo beetoochaa boonoshi shuggee beehooba, gumbeenaꞌon aachi yegillee daggooch boonoshi ciinooch geddii beehe.

⁴² Tunebaani giidaalli dalleenaꞌochi ciinooch gumbeenaꞌon gedaanoone; ebich giidaalli dalleenaꞌo Labaanichinaꞌo tunemmona, wode ceeneenaꞌo Yaaqobichinaꞌo tuneheete.

⁴³ Ebiyoommi gommona Yaaqobi oogeti gaannechon tunehe; meeti bagoonaa emmishoonon, gaaleenaa kuroonon, ebiyoommon wotta meeti gonneenaa guunonon danehe.