Halloo 29 - Kafa Linguistics Project

Yaaqobi Labaani Kexooch Shago

¹ Yaaqobi Beeteelee tiyiꞌi, aabi-keyo waan beeti asheenaꞌo showooch hammii shaggiye.

² Aroochoo ikke gaddooch keejje kuxona bageenaꞌonaa emmisheenaꞌona miqqeꞌi beeti gaꞌooch aachi oppoon beeggiye; bageenaꞌonaa emmisheenaꞌona arooch boonoshi beeto, are oppoochee aacon boonoshi uchii beetoyichiye. Ebi oppee kello oogeti xaqqoona keppheetone.

³ Bageenaꞌonaa emmisheenaꞌona bulli oppee gashoona kiceetoyee gubb, qiddeenaꞌo xaqqoon oppee kelloochee tiijjiꞌi, boonoshich aacon kittii uchii beeheete. Boonoshi uchii michiitoyee gubb, oppee kelloon ebi xaqqoona wochii kepphee beeheete.

⁴ Yaaqobiyoo qiddeenaꞌon “Ta maneenaꞌote! Aabekkeeniye ittoshi waato?” ii echehe. Boonoshiyoo “Karaaneeniye no waato” iyeete.

⁵ “Nakoori bushoochi bushoo Labaanin ariihote?” iye. Boonoshiyoo “Eeha, ariihone” iyeete.

⁶ Yaaqobiyoo “Diggeebeete?” iye. Boonoshiyoo “Eeha, diggoone. Okk ebeege, bi bushee Raaheeli bageenaꞌona tookkaa waabeeti” iyeete.

⁷ Yaaqobiyoo “Batt showoo womikkeyaanoone; gijjeenaꞌo kiceyemmi saato toonoone. And bageenaꞌoyich aacon uchiꞌi, amoyich gaddooch wochaachote?” iye.

⁸ Boonoshiyoo “Gijjeenaꞌo bulli kiceetaa, oppee kelloochee xaqqo tiijjeyaan beetaa hakkaachone. Aroyee gubbiye bageenaꞌoyich aacon no uchemmo” iyeete.

⁹ Yaaqobi asheenaꞌona tookkii yibbaatooch bi beetaa, Raaheeli, qiddee bi tunetoyich, bi nihoochi bageenaꞌona tookkaa arooch shaggahan.

¹⁰ Yaaqobi bi iyoo bushee Raaheelinaa bi iyoo Labaanichi bageenaꞌonon bi beeggiyooba, aachi oppo beetooch hammiꞌi, xaqqoon oppee kelloochee tiijjiye. Bi iyoo Labaanichi bageenaꞌoyich aacon kittii uchiye.

¹¹ Aroochee Raaheelin shummiye; oogichiinoo eeppiye.

¹² Yaaqobiyoo bi nihoo xiboonaa Ribiqichi bushoona bi tunoon Raaheelich gettiye. Raaheeliyoo woccaa hammaa bi nihoyich ebi mooyon gettahan.

¹³ Labaaniyoo bi manee bushoo Yaaqobi womon waayeꞌi, biinna daneya afaafinoona woccii waahe. Tiqqeꞌinoo shummiye; kexooch daammii giijjiye. Yaaqobiyoo tuneti mooyo bullin Labaanich gettiye.

¹⁴ Labaaniyoo “Iberoon ne ta meeno, ta damoo neene” iye. Yaaqobi ikke agenoon Labaan waan bi kotetoyee gubb,

Yaaqobi Liyinaa Raaheelinon Shaago

¹⁵ Labaani biich “Ta xiboo ne tunetoyich, baad cikki taach shuune beeyenne? Neech ta qoccemmo amo gaata taach gete” iye.

¹⁶ Labaanich gutte maache bushiisheenaꞌo beetinaꞌone; qaabbeechi shigo Liyi, guucheechoo Raaheeline.

¹⁷ Liyi aaf gishiishe bi tunemmona, Raaheeli damoon keqqichaabeeti, mallet gaawe busheene.

¹⁸ Yaaqobiyoo Raaheelin shunniye; ishichiinoo iye: “Ne guuche bushee Raaheelin taach ne immemmo tunegaata, shabaatte naton neech shuunebona” iye.

¹⁹ Labaaniyoo “Bare ashich ta imoyee, neech ta imo gaawiye; taanna tookki beebe” iye.

²⁰ Yaaqobi Raaheelicha iꞌi, shabaatte naton shuunehe. Biin oogichii bi shunnitoyich, shabaatte nato biich aricheyaanoon beshehe.

²¹ Shabaatte nato ciiretoyee gubb, Yaaqobi Labaanin, “Ebiyoche, neennaa taanna taajjeti taajjo ciiretone. Ta mecheen taach ne imaa shaagona” iye.

²² Ebich Labaani are bi showeexi asheenaꞌo bullin kiciꞌi gaaroon geddiye.

²³ Xum Labaani bi qaabbe bushee Liyin daammii Yaaqobich immiye. Yaaqobiyoo Liyina tookkii qeyiye.

²⁴ Labaaniyoo bi gonnee Zilifin gonnee tuniiꞌi Liyich immitone.

²⁵ Dechara maaddoona Yaaqobi ciinniꞌi, Liyi bi tunoon ariihe. Ebich Yaaqobi Labaanin “Amoyich ebin taach shuunenne? Neech ta maddeto, Raaheelicha iyaa toone? Amoyich taan dawushinne?” iye.

²⁶ Labaaniyoo wochiꞌi, “Qaabbee beetaa guucheen shaakkiyoo, no showee doyoo toonoone.

²⁷ Hini gaaree shabaattoon ne ciichimmona, bare shabaatte naton taach ne shuunemmo tunegaata, guucheen immemmo taane” iye.

²⁸ Yaaqobiyoo ebin deꞌa iye. Liyina tookkii shabaatte qemon yagiye. Aroochee Labaani bi bushee Raaheelin Yaaqobich immiye.

²⁹ Bi gonnee Biilinoo gonnee tuniiꞌi Raaheelich immiye.

³⁰ Yaaqobiyoo Raaheelin shaaggiye. Raaheelin Liyiyee beshii shunniye. Bare shabaatte natonoo Labaanich shuunehe.

Yaaqobich Bushiishoo Shiijjo

³¹ Doono Yeeriyoo Liyi shucheyaane bi tunoon beeggiꞌi, bushoon bi shiyemmoyich, bi maacoon qechiye; tunebaani Raaheeli xaafeene.

³² Liyiyoo xifaa anaami bushoon shiyahan. “Doono Yeeri ta iritoon beeggitone. Iberoon ebiyee bekk ta keno taan shunnemmone” iyan. Ebich bushoo shigoon, Roobeeli iyaa shigiihan.

³³ Wotta xifaa anaami bushoon shiyahan. “Shicheti ta tunoon Doono Yeeri bi waayetoyich, hini bushoon taach daakkite” iyan. Ebich bushoo shigoon, Simooni iyaa shigiihan.

³⁴ Wotta xifaa anaami bushoon shiyahan. Biyoo “Keejje anaami bushiishoon ta shiyetoyich, illa ta keno ta waan katinnemmone” iyan. Ebich bushoo shigoon, Lewi iyaa shigiihan.

³⁵ Andoo xifaa anaami bushoon shiyahan. Biyoo “And Doono Yeerin galletoye” iyan. Ebich bushoo shigoon, Yihudi iyaa shigiihan. Ebiyee gubb, shimon neechiyan.