Halloo 28 - Kafa Linguistics Project

¹ Ebich Yisaaqi Yaaqobin ceeggiꞌi diiriye; biichoo ishichiye: “Amoommo tunetaa Kanaaneenaꞌochi maache bushiishoo daggoochee mecheen shaaggaahine.

² Tiyiree Mesopotaamee showooch beeti ne indinihoo Batuꞌeel waan hambe. Aroochee ne iyoo Labaanichi maache bushiishoo daggoochee mecheen shaage.

³ Beshe Hakkechi Nuggishoo neen diiribe; shiyi shiijjereree meeti aagetoon ne tunemmoyich tuniibe; ne shiijjereenaꞌonoo meechibe.

⁴ Yeeri Abrahamich bi immiti, newoo and iibboo tunaꞌa ne beeti hini showoon iristo tuniiree neech bi immemmoyich, Abrahamich bi immiti diiroon neennaa ne shiijjereenaꞌonoyich imbe” iye.

⁵ Yisaaqiyoo Yaaqobin daachiihe. Biyoo tiyiꞌi, biinnaa bi manoo Esayinochi iyoo tuneti, Araamee asho Batuꞌeelichi bushoo Labaani beeti Mesopotaamee showooch hammiye.

Esayi Bare Mecheen Shaago

⁶ Yisaaqi Yaaqobin diiriꞌi, mecheen bi shaaggemmoyich Mesopotaamee showooch bi daachiyoon, bi diiriyooba, “Kanaanee maache bushiishoo daggoochee mecheen shaaggaahine” bi geton,

⁷ Yaaqobiyoo bi nihoonaa bi indeenochi getoon waayeꞌi, Mesopotaamee showooch bi hamonoo Esayi waayehe.

⁸ Ebina Kanaaneenaꞌochi maache bushiisheenaꞌo bi nihoo Yisaaqina am shaahoon shichetinaꞌo gaata, ariihe.

⁹ Ebich Esayi Ishmaꞌeel waan hammiye. Abrahami bushoo Ishmaꞌeeli shiyiti, Nebayootichi manee Mahalaatin bi mecheenaꞌo toommooch daakkii shaaggiye.

Beeteelaa Yaaqobi Gummiti Gumo

¹⁰ Yaaqobi Beershaabee tiyiꞌi, Karaan waan hammiye.

¹¹ Hammiibee ikke xaaꞌooch bi shaggaahaa, aabe giyetoyich, are xaaꞌooch qeyiye. Arooch beeti xaqqeenaꞌo daggoochee ikkoon tiijjii, qoyeꞌi tokketehe.

¹² Gumonoo gummiye. Ebi gumona showooch neexeti, bi cilloo shimaajj tuggeti daqqelloon beeggiye; Yeerichi maraakeenaꞌoo ebi daqqelloona kechii kindii beeheete.

¹³ Doono Yeeriyoo ebi daqqellee tookk neexee beehe; ishichiinoo iye: “Ne nihinihoo Abrahamichi Nuggishoo, ne nihoo Yisaaqichi Nuggishoo, Doono Yeeri taane. Hini ne qeyaabeeti showoon neennaa ne shiijjereenaꞌonoyich immemmo taane.

¹⁴ Ne shiijjereenaꞌon showee toommeexi qacoochoommon meechemmo taane; boonoshiyoo aabi-gimo waaninaa aabi-keyo waanina, dambi-waaninaa deshi-waanina gaminnemminaꞌone. Showee toommeexi aageteenaꞌo bulli neennaa ne shiijjereenaꞌona diireyemminaꞌone.

¹⁵ Waayebe; ta neenna tookkaa beeto taane; ne hammaabeeti xaaꞌoo bulliich neen quyemmo taane; hini showooch neen wochiree deebemmo taane; ta getteto bullin neech ta tuniimmi wottoon, ciroona neen qayaachemmo taane” iye.

¹⁶ Yaaqobiyoo tokketoochee tiyiꞌi, “Iberoon Doono Yeeri hini xaaꞌooch beetone; tunebaani ta ebin ariyaano taane” iye.

¹⁷ Biyoo shattiꞌi, “Hini xaaꞌoo am shaahoon shattiihe! Hini Yeerichi kexoani, baroon tuneyaache; ebiyoo shimaajji kelloone” iye.

¹⁸ Yaaqobi bi dechara maaddoona tiyiye. Qoyeꞌi bi qeyiti xaqqoon tiijjii, giimboochoommon xogii neechiye. Ebi xaqqee toommoochoo zayitoon ukkiye.

¹⁹ Ebi xaaꞌoon, Beeteeli ii shigiihe. Shiichiꞌi ebi katemoo, Luuzi gettee beehe.

²⁰ Arooba Yaaqobi ishichii mookkehe: “Yeero, taanna tookkaa ne tunegaata, ta hammaabeeti gommooch taan ne quyegaata, ta maayemmi maayoon, ta tahemmi tahoonoo taach ne imigaata,

²¹ ta nihoo kexooch diggoona taan ne wochigaata, Doono Yeero, neech ta goyinnemmi ta Nuggishoo tunemmo neene;

²² hini ta neechiti xaqqo Yeeri ne kexo tunemmone; taach ne immemmi mooyo bulliicheenoo aashiroochee ikke beeroon neech immemmo taane” iye.